ბრეივიკის დედა დარწმუნებულია, რომ მისი შვილი შეშლილია

77 ადამიანის მკვლელობაში ბრალდებული ნორვეგიელი ტერორისტი ანდრეის ბრეივიკი ბავშვობაში კეთილი და მზრუნველი ბიჭუნა იყო, მაგრამ როცა გაიზარდა, შეიშალა პოლიტიკაზე და „გარდაუვალი სამოქალაქო ომისთვის“ მზადება დაიწყო. ამის შესახებ ბრეივიკის დედა ვენკე ბერინგამ თავის წერილობით ჩვენებებში წერს. მან ოსლოში მიმდინარე შვილის სასამართლო პროცესზე მისვლა ჯანმრთელობის მდგომარეობის გამო ვერ შეძლო.

„ის ძალიან კარგად სწავლობდა, ჰყავდა მეგობრები. იყო კეთილი. მეხმარებოდა, რითიც შეეძლო. უჩვეულოდ კეთილი და მზრუნველი იყო“ - იხსენებს ვენკე ბერინგა. თუმცა 2006 წელს დედამ შეამჩნია, რომ მისი შვილში ცვლილებები იწყებოდა.

„ყოველთვის მხიარულად ვგრძნობდით თავს ერთად, მაგრამ მერე მან მხოლოდ პოლიტიკაზე დაიწყო სუბარი, გარდაუვალ სამოქალაქო ომზე. ლაპარაკობდა ხმამაღლა, - მაშინაც კი, როცა ვცდილობდი თავი ამერიდებინა ამ თემებისთვის“ - წერს ბრეივიკის დედა ჩვენებაში.

ტერორისტის დედა ამბობს, რომ ბრეივიკი იმდენად გადარეული იყო პოლიტიკით, რომ შეშლილს დაემსგავსა, „მე ზეწოლას ვგრძნობდი“ - ამბობს ვენკე ბერინგა, რომელიც აღიარებს, რომ შვილის საქციელი უკვე აღიზიანებდა.

იმავდროულად, ბრეივიკმა რეგულარულად დაიწყო სიარული  სპორტდარბაზში და კომპიუტერულმა თამაშებმაც გაიტაცა. კიდევ ერთი, „შეიშალა“ სისუფთავესა და წესრიგზე.

დედა ყვება, რომ მის შვილს, მაგალითად, არ მოსწონდა, როცა დედამისი ადამიანებს ეკონტაქტებოდა და ძალიან ბევრ ადამიანთან ურთიერთობაში „ადანაშაულებდა“. საკვების მიღებაც განმარტოებულად დაიწყო - თავის ოთახში. ჭამის შემდეგ კი თეფშეფს კარს მიღმა გამოდგამდა. როდესაც სეირნობდა, სახეზე ხელებს იფარებდა, გარკვეული დროის განმავლობაში კი ნიღაბსაც კი ატარებდა.

მაგრამ შვილის მდგომარეობამ დედა ყველაზე მეტად ტერაქტებამდე ცოტა ხნით ადრე შეაშფოთა: დიდი ხნის განმავლობაში ის ნორმალური იყო, მაგრამ 2010 წელს ყველაფერი შეიცვალა: ბრაზდებოდა, თუკი აწუხებდნენ. გატაცებული თავისი მანიფესტის წერით - ყვება ბრეივიკის დედა.

ის თავად იყო მომსწრე, როგორ მოჰქონდა მის შვილს სახლში იარაღი და ამუნიცია. ასევე ხედავდა, როგორ ირგებდა ხოლმე სხვადასხვა უნიფორმას. ერთხელ ოთახიდან სამეფო ჯილდოებით დამშვენებული წითელი კიტელით გამოვიდა.

სასამართლოში ბრეივიკის დედის ჩვენების გამოქვეყნებამდე ერთი დღით ადრე კიდევ ერთი საინტერესო დეტალი გახდა ცნობილი. აღმოჩნდა, რომ გასული საუკუნის 80-იან წლებში სოციალური სამსახურები ბრეივიკის სახლიდან წაყვანის შესაძლებლობას განიხილავდნენ, რადგან დედა ვერ უმკლავდებოდა მის ჰიპერაქტიულ და აგრესიულ ქცევას. თუმცა ბოლოს ის მაინც დედასთან დატოვეს. ვენკე ბერინგამ ისიც მისწერა სასამართლოს, რომ მისმა შვილმა პროცესზე ბევრი ტყუილი თქვა, მაგალითად უამრავ უცხოურ ქვეყანაში მოგზაურობისა და საკუთარი განათლების შესახებ.