ნაფიცმა მსაჯულებმა დავით რუსიშვილი განსაკუთრებული სისასტიკით ჩადენილ მკვლელობაში დამნაშავედ სცნეს

თბილისის საქალაქო სასამართლოში ნაფიც მსაჯულთა განსჯადი მესამე სისხლის სამართლის საქმის განხილვა დასრულდა.

ნაფიცმა მსაჯულებმა, განსაკუთრებული სისასტიკით ჩადენილი განზრახ მკვლელობისთვის (დამამძიმებელ გარემოებებში), დავით რუსიშვილს გამამტყუნებელი ვერდიქტი გამოუტანეს.

დავით რუსიშვილს, ბრალად გასული წლის 17 ოქტომბერს, თბილისში, რუსთაველის გამზირზე, 23 წლის ზურა ტარყაშვილის დამამძიმებელ გარემოებებში ჩადენილი გაზრახ მკვლელობა ედებოდა.

გამოძიების ვერსიით, ნარკოტიკული დანაშაულისთვის პირობითი მსჯავრის მქონე 53 წლის ივერი გოგბერაშვილი, ამავე დანაშაულისთვის მსჯავრდებულ პრობაციონერს - 19 წლის გიორგი რუსიშვილს და ყაჩაღობისთვის გასამართლებულ 23 წლის ირაკლი აგლაძეს დაუკავშირდა და წინასწარი შეთანხმებით, ჯგუფურად, ზურა ტარყაშვილის მკვლელობა განახორციელა თბილისის ცენტრალურ ქუჩაზე, რა დროსაც უამრავი ადამიანი მოძრაობდა.

ზურა ტარყაშვილს, ივერი გოგბერაშვილმა, ირაკლი აგლაძემ, დავით რუსიშვილმა და რამდენიმე პირმა, რომელთა ვინაობაც ჯერჯერობით არ ხმაურდება, ცეცხლი ერთდროულად გაუხსნეს. მას 11 ჭრილობა ჰქონდა მიყენებული, მათ შორის სამი საკონტროლო გასროლა თავის არეში.   

შს სამინისტრომ, რუსიშვილი მკვლელობის მესამე  დღეს დააკავა. მან დანაშაული აღიარა და დეტალურად აღწერა, როგორ დაიგეგმა და განხორციელდა მკვლელობა კრიმინალური ჯგუფის მიერ, თუმცა, მოგვიანებით, ჩვენება შეცვალა და სწორედ ამიტომ წარსდგა იგი ნაფიც მსაჯულთა წინაშე. 

ნაფიც მსაჯულთა სასამართლო სხდომას თბილისის საქალაქო სასამართლოს, სისხლის სამართლის საქმეთა კოლეგიის მოსამართლე ვაჟა ფუხაშვილი უძღვებოდა. სასამართლოს უამრავი ადამიანი ესწრებოდა. 

ბრალდებულის ადვოკატები ორი კვირის განმავლობაში ცდილობდნენ 12 ნაფიცი მსაჯული რუსიშვილის უდანაშაულობაში დაერწმუნებინათ, თუმცა ბრალდების მხარის მიერ წარმოდგენილმა მტკიცებულებებმა მათი მტკიცებულებები გააბათილა.

სხდომა ხვალ 11 საათზეა ჩანიშნული, რომელზეც გამოცხადდება თუ რამდენ წელს გაატარებს ჩადენილი დანაშაულისთვის დავით რუსიშვილი სასჯელაღსრულებით დაწესებულებაში.