ბრეივიკი გიჟადაც სცნეს და სრულიად ჯანმრთელადაც

ნორვეგიის სასამართლო-ფსიქიატრიულმა კომისიამ ანდრეს ბრეივიკის ჯანმრთელობის მდგომარეობასთან დაკავშირებული ორივე ფსიქიატრიული დასკვნა დაამტკიცა, რამაც მასობრივი კრიტიკა გამოიწვია.

როგორც ცნობილია, ბრეივიკს ფსიქიური შემოწმება ექსპერტთა ორმა ჯგუფმა ჩაუტარა.

ფსიქიატრებმა - სიუნე სერხეიმმა და ტორგეირ ხუსბიუმ დაადგინეს, რომ ის შეუაცხადია და პარანოიდალური შიზოფრენია აქვს. ანგარ ასპოსომ და ტერიე ტერისენმა კი ტერორისტი, „მთლიანობაში ჯანმრთელად“  სცნეს.

ნორვეგიის სასამართლო-ფსიქიატრიულმა კომისიამ პირველი დასკვნა მაშინვე დაამტკიცა. ექსპერტთა მეორე ჯგუფს კი დეტალების დაზუსტება მოსთხოვა. თუმცა ამის შემდეგ ოფიციალურად გამოცხადდა, რომ ეს დასკვნაც დამტკიცებულია. ამან ყველაზე მეტად პრობლემა ბრეივიკის ადვოკატებს შეუქმნა, რომლებიც ცდილობენ, მათი კლიენტი სასამართლომ ჯანმრთელად სცნოს. ბრეივიკს ფსიქიატრიულ საავადმყოფოში მოხვედრა არ სურს.

გაურკვევლობაში აღმოჩნდა თავად ოსლოს სასამართლოც, რომელმაც  ფსიქიატრიულ კომისიაში წერილი გაგზავნა, რათა საბოლოოდ ჩამოყალიბებულიყვნენ - სცნობენ თუ არა ბრეივიკს შერაცხადად.

ვითარებას ნათელი ბოლო სხდომაზე მოეფინა, რომელზეც თავად წარსდგა კარლ ჰეინრიკ მელე. მან თქვა, რომ ორივე ფსიქიატრიული დასკვნა დამტკიცებულია და ბრეივიკის შერაცხად-შეურაცხადობის საკითხი საბოლოოდ სასამართლომ უნდა გადაწყვიტოს.

პრობლემა იმაშია, რომ ორი ფსიქიატრიული ექპერტიზის დასკვნა რადიკალურად განსხვავდება ერთმანეთისგან. პირველი დიაგნოზის თანახმად, ნორვეგიელი ტერორიტი „სერიოზულად ავადაა ფსიქიურად. აქვს პარანოიდალური შიზოფრენია“. მეორე დასკვნაში კი წერია, რომ „მას აქვს  ნარცისული აშლილობა“.

ამასთან სერხეიმისა და ხუსბიუს დასკვნაში აღნიშნულია, რომ ბრეივიკის არაადამიანურად სასტიკი პოლიტიკური გამონათქვამები, ფსიქოტური ბოდვაა, მეორე დასკვნით კი ეს განცხადებები ტერორისტის უკიდურესად რადიკალური პოლიტიკური შეხედულებების გამომხატველია.

პირველი დასკვნის მიხედვით, ბრეივიკის აზრი, რომ აქვს უფლება ადამიანები ხოცოს, მისი განდიდების მანიითა განპირობებული. მეორე დასკვნის მიხედვით კი ეს ტერორისტის ნარცისიზმის შედეგია, რომელიც ბრეივიკის აზრით, მას ყველაფრის უფლებას აძლევს.

საბოლოო ჯამში კი, პირველი ფსიქიატრიული დასკვნის თანახმად, რომელიც ბრეივიკს შეურაცხადად აღიარებს, ტერორისტი სულიერად ავადმყოფია და არ შეუძლია პასუხისმგებლობა აიღოს ჩადენილ დანაშაულზე. მას იძულებითი ფსიქიატრიული მკურნალობა უნდა დაენიშნოს.

მეორე დასკვნა კი, რომელიც ბრეივიკს შერაცხადად სცნობს, ამბობს, რომ ტერორისტი საღ გონებაზეა და სისხლის სამართლის პასუხისმგებლობასაც ექვემდებარება. ამიტომ მის მიმართ, სხვა დამნაშავეთა მსგავსად, საპატიმრო სასჯელი უნდა იქნას გამოყენებული.

ამასობაში კი ბრეივიკი წერა-კითხვითაა გატაცებული და ულტრამემარჯვენე პატიმართა პანევროპული ქსელის შექმნას აპირებს. ინტერნეტში ამის შესახებ ბრეივიკის წერილიც გავრცელდა, საიდანაც ჩანს, რომ მას უკვე რუსეთის განყოფილების ხელმძღვანელიც დაუნიშნავს. ეს არის ნიკოლაი კოროლიოვი, რომელსაც სამუდამო პატიმრობა აქვს მისჯილი, ჩერკიზოვსკის ბაზარზე მოწყობილი აფეთქებების გამო.

ორგანიზაციის ამოცანა, ბრეივიკის აზრით, უნდა გახდეს ციხეებში „თეთრების მუსულმანებისგან დაცვა“. თუმცაღა ბრეივიკისთვის სამაგალითოა „ალ-ქაედა“, რომლისგანაც ის გამოცდილების გადმოღებაზე ფიქრობს.

ასევე წერს, რომ ახლა ამყარებს კონტაქტებს გერმანელ, შვედ ნეონაცისტებთან, რომლებიც მკვლელობებისთვის არიან დაპატიმრებულები. რუს ნაციონალისტებს კი ყველაზე მეტად აქებს, რადგან ისინი „აგრესიულები არიან“.