სამარაში მოკლულ მამუკა კახიშვილს საქართველოში გადმოასვენებენ

რუსეთის ქალაქ სამარაში, მოკლულ 19 წლის მამუკა კახიშვილს დღეს, საქართველოში გადმოასვენებენ და ხაშურში დაკრძალავენ. აღნიშნულ საქმესთან დაკავშირებით კი, საქართველოს პარლამენტი, საერთაშორისო საზოგადოებისა და ორგანიზაციების ინფორმირებას გეგმავს.

ქართული მხარის შეფასებით, რუსეთი არადემოკრატიული ქვეყანაა, სადაც ადამიანის სიცოცხლეს დაბალი ფასი აქვს და ამიტომ რუსეთში მცხოვრები საქართველოს მოქალაქეები ფრთხილად უნდა იყვნენ.

რაც შეეხება კახიშვილის საქმეს, 19 წლის ახალგაზრდა 2011 წლის 10 ნოემბერში, ერთ-ერთ კაფესთან მილიციელებმა ცემით მოკლეს. მოკლულს სხეულზე წამების კვალი აღენიშნებოდა. ამ ფაქტთან დაკავშირებით, რუსულმა პოლიციამ საკუთარი ვერსია გაავრცელა, სადაც ნათქვამი იყო, რომ სამართალდამცველები კაფეში პროფესიულ დღესასწაულს აღნიშნავდნენ. მათ ახალგაზრდა დაინახეს, რომელიც ძებნილს მიამსგავსეს. პოლიციელებმა ახალგაზრდის დაკავება სცადეს, თუმცა, იგი კაფედან გაიქცა. მას დაეწივნენ, მიწაზე დააგდეს, შებორკეს და მანქანაში ჩასვეს. ამ დროს კი აღმოაჩინეს, რომ დაკავებული უკვე გარდაცვლილი იყო.

უნდა ითქვას, რომ პოლიციისგან რადიკალურად განსხვავებულ ინფორმაციას ავრცელებდნენ გარდაცვლილის მეგობრები. მათი ინფორმაციით, თავისუფალი ადგილის მოსაძებნად კაფეში მხოლოდ მამუკა კახიშვილი შევიდა, თუმცა, რამდენიმე წუთში დაბრუნდა და თქვა, რომ კაფე ბანკეტისთვის იყო დაკავებული და ადგილები არ იყო. ამის შემდეგ, მეგობრები იქვე შეყოვნდნენ და მსჯელობდნენ, თუ სად წასულიყვნენ. ამ დროს, კაფედან სამი მამაკაცი გამოვიდა, მამუკა კახიშვილთან მივიდა, მიწაზე დააგდეს, ცემა დაუწყეს და ხელბორკილებიც დაადეს. მოგვიანებით შემთხვევის ადგილზე პოლიციის მანქანა მივიდა და მამუკა კახიშვილი მანქანაში დამნაშავეებისთვის განკუთვნილ ადგილზე „ისე შეაგდეს, როგორც ქვიშის ტომარა“. მანქანაში მყოფმა პოლიციელებმა შენიშნეს, რომ კახიშვილი აღარ სუნთქავდა. ერთ-ერთმა მათგანმა კი, რომელიც ცემაში მონაწილეობდა, უგონოდ მყოფ კახიშვილს მუცელზე ანთებული სიგარეტი დაადო, რათა შეემოწმებინა, ცოცხალი იყო თუ არა. კახიშვილი არ გაინძრა.

კახიშვილის ოჯახმა, რომელიც სამარაში საცხოვრებლად 17 წლის წინ გადავიდა, მაისში სამართლიანი გამოძიება და დამნაშავეების დასჯა კიდევ ერთხელ მოითხოვა, რის გამოც, სარატოვის ექსპერტიზის ბიუროში მოკლულს ექსპერტიზა ჩაუტარდა და ოფიციალურად დაადასტურა, რომ სამარაში მოკლული ქართველი გაგუდულია. დასკვნაში წერია, რომ სიკვდილის მიზეზი მექანიკური ასფიქსია გახდა და სასუნთქი გზის გადაკეტვა ბლაგვი საგნის მეშვეობით მოხდა. ასევე ექსპერტიზამ აჩვენა, რომ კახიშვილი ნარკოტიკული ნივთიერებების ზემოქმედების ქვეშ არ იმყოფებოდა, რასაც რუსი სამართალდამცავები ამტკიცებდნენ.

ოჯახის ადვოკატის ინფორმაციით, მკვლელობისთვის არავინ არ არის დაკავებული და ისინი ითხოვენ, რომ ამ ტრაგიკული საქმის მონაწილეები სათანადოდ დაისაჯონ, რის გამოც ბრძოლას გააგრძელებენ.

მამუკა კახიშვილს მარჯვენა ხელი განუვითარებელი ჰქონდა და მეორე ჯგუფის ინვალიდი იყო.