ამერიკელი პედაგოგი ქართველ ჯარისკაცს ძალადობაში ადანაშაულებს

2012 წლის 26 აპრილს, ამერიკელმა მოხალისე პედაგოგმა (27 წლის ქალბატონმა ქალაქ კანზასიდან) გორის პოლიციაში განცხადება შეიტანა იმის შესახებ, რომ იგი მისთვის დაუდგენელმა ახალგაზრდამ გააუპატიურა.

ამერიკელი პედაგოგის გაუპატიურების ფაქტზე ბრალდებულის, გორის რაიონის სოფელ შინდისის მცხოვრები, 22 წლის ჯარისკაცის ლ. ფ-შვილის საქმე, განსახილველად უკვე სასამართლოში გადაიგზავნა.

დაკავებული ჯარისკაცის ადვოკატი, ფრიდონ მაღრაძე შიდა ქართლის საინფორმაციო ცენტრთან საუბრისას ამბობს, რომ მისი დაცვის ქვეშ მყოფი დანაშაულს არ აღიარებს და საპროცესო შეთანხმების გაფორმებას არ აპირებს. 

გორის რაიონის სოფელ შინდისში ასობით ხელმოწერა შეგროვდა 22 წლის ახალგაზრდის გასათავისუფლებლად. ხელმოწერებში მოსახლეობა თავიანთ თანასოფლელს დადებითად ახასიათებს.

,,ამ ქალბატონმა ჯარისკაცთან ჯერ თავად დაამყარა გაუკუღმართებული ურთიერთობა, (იგულისხმება – კუნილინგუსი) ხოლო შემდეგ იგივეს გამეორება მას მოსთხოვა. ქართველმა მამაკაცმა ამაზე უარი უთხრა. აქ საკითხავია, თუ ვინ ვისზე ახორციელებდა ძალადობას? ამის შემდეგ გაბრაზებული ქალბატონო წავიდა პოლიციაში და უჩივლა მას.“ – ამბობს ადვოკატი.

„მე განვიცადე მორალური და ფიზიკური დაზიანება, კერძოდ, თავის, ყელის, გულმკერდის, წელის და ბარძაყის არეებში და მოვითხოვ დამნაშავის სათანადოდ დასჯას“ – წერს ამერიკელი პედაგოგი ჩვენებაში.

სასამართლო ექსპერტიზის დასკვნის მიხედვით, ბოლო სექსუალური კავშირი პედაგოგს ,,გაუპატიურებიდან” ერთი კვირით ადრე, სხვა ქართველ მამაკაცთან ჰქონდა.

სამედიცინო ექსპერტიზამ აჩვენა, რომ ყელის, თავის და გულმკერდის არეში ამერიკელ პედაგოგს დაზიანებები არ აღენიშნება. ეს ის ადგილებია, სადაც გამოძიებას პედაგოგი უშუალოდ უთითებდა ძალადობის აღწერისას; და რომლის გამოც თითქოს ის ვერ ყვიროდა და წინააღმდეგობას ვერ უწევდა ქართველ ახალგაზრდას. სამაგიეროდ, ექსპერტიზამ სისხლნაჟღენთები მარჯვენა და მარცხენა ბარძაყის შიგნითა ზედაპირზე, ასევე მარჯვენა სარძევე ჯირკვლის მიდამოებში აღმოაჩინა. ექსპერტის ცნობით, ეს დაზიანებები რაიმე მკვრივი-ბლაგვი საგნის მოქმედებითაა გამოწვეული. ხოლო ხანდაზმულობით არ ეწინააღმდეგება საქმის გარემოებაში მითითებულ თარიღს.

ქართველი ჯარისკაცი სისხლის სამართლის კოდექსის 137-ე მუხლის პირველი ნაწილით სამართლდება, რომელიც თავისუფლების აღკვეთას 4-დან 6 წლამდე ითვალისწინებს.

წყარო