გალში, კაფე „ზოლუშკაში“, დაუდგენელმა პირებმა აფხაზი მილიციელები ჩაცხრილეს

აფხაზ სეპარატისტთა „სამფლობელოში“ კრიმინოგენურმა სიტუაციამ რომ კრიტიკულ მასშტაბებს მიაღწია და არსებულ ვითარებას ისინი თავს ვერ ართმევენ, ცხადზე უცხადესია. დღე არ გავა, რომ სადმე ან იარაღის საწყობი არ აღმოაჩინონ, ან ვინმეს დღისით-მზისით თავს არ დაესხან.

აფხაზ სეპარატისტთა „სახელმწიფო“ საინფორმაციო სააგენტო „აფსნიპრესის“ ინფორმაციით, 28 მაისს 11:40 სთ–ზე გალში, აქირთავას ქუჩაზე მდებარე კაფე „ზოლუშკაში“, ორმა დაუდგენელმა პიროვნებამ შეირბინა და „კალაშნიკოვის“ სისტემის ავტომატიდან იქ მყოფთ ცეცხლი გაუხსნა. სროლის შედეგად მიღებული ჭრილობებისგან გარდაიცვალნენ, 1953 წელს დაბადებული აფხაზური მილიციის მაიორი, ლეონიდ კვიცინია და გალის აფხაზური სისხლის სამართლის სამძებროს ოპერრწმუნებული, 1975 წელს დაბადებული, დევი ბუავა და ასევე გალის რაიონის სოფელ ნაბაკევის მცხოვრები, 1957 წელს დაბადებული გულთაზ ყოლბაია.

ამის შემდეგ შეიარაღებულმა თავდამსხმელებმა სათადარიგო გასასვლელით კაფე დატოვეს და ლურჯი ფერის ავტომანქანა „ვოლგით“ გაურკვეველი მიმართულებით გაუჩინარდნენ.

როგორც იმავე „აფსნიპრესს“ მარიონეტული ხელისუფლების შინაგან საქმეთა სამინისტროს პრეს–სამსახურიდან აცნობეს, მოგვიანებით სეპარატისტთა ეგრეთწოდებულმა  სამართლდამცველებმა ავტომანქანა „ვოლგა“, რომლითაც თავდამსხმელები მიიმალნენ, გალის რაიონის სოფელ მახუნჯიაში, ტყის მასივში აღმოაჩინეს. თავიანთი უგერგილობა აფხაზმა მარიონეტებმა, ბუნებრივია, მაშინვე ქართულ სპეცსამსახურებს მიაწერეს. 28 მაისს კაფე „ზოლუშკაში“ მომხდარი შემთხვევა მათ შეაფასეს, „როგორც მორიგი დივერსიულ–ტერორისტული აქტი  ქართული სპეცსამსახურების მხრიდან“.

მათივე გავრცელებული ინფორმაციით, შემთხვევის ადგილზე „სამართალდამცველებმა“ აღმოაჩინეს და ამოიღეს „მაკაროვის“ სისტემის პისტოლეტის ვაზნებიც.