ექსპერტიზის დასკვნა: მამუკა კახიშვილი სამარელმა პოლიციელებმა დაახრჩვეს

სარატოველომა სასამართლო-სამედიცინო ექსპერტებმა სამარელი კოლეგების დასკვნა უარყვეს და პოლიციის მიერ ჩადენილი დანაშაულიც გამოააშკარავეს.
სარატოვის სასამართლო-სამედიცინო საოლქო ბიუროს სპეციალისტების დასკვნით, 19 წლის მამუკა კახიშვილი დაახრჩვეს.

დოკუმენტში წერია, რომ  სიკვდილის მიზეზი „მექანიკური ასფიქსიაა, რომელიც ყელის ორგანოებზე ბლაგვი საგნის ზემოქმედებითაა გამოწვეული“. ამ ჩანაწერით გამართლდა სამარაში მოკლული კახიშვილის ოჯახის ეჭვი იმის შესახებ, რომ მათი შვილი პოლიციამ მოკლა.

დანაშაულის დამალვის მიზნით, სამართალდამცავების მიერ შეთხზული ვერსიით, მამუკა კახიშვილი ნარკოტიკების ზემოქმედების ქვეშ იყო, ხელჩართული ჩხუბის გამო დაკავების მომენტში კი გონება დაკარგა, წაიქცა და გარდაიცვალა. პოლიცია ამტკიცებს, რომ  კახიშვილი ნარკოტიკის სახით თვალის წვეთების „ტროპიკამიდის“ მოხმარების შემდეგ სუნთქვის შეჩერების შედეგად დაიღუპა.

თუმცა სარატოვის ექსპერტიზამ მათი მტკიცება ამ ნაწილშიც ეჭვქვეშ დააყენა. ექსპერტიზის დასკვნაში, რომელიც კახიშვილის ადვოკატეს უკვე ხელთ აქვს, წერია, რომ  ექსპერტებმა გარდაცვლილის ორგანიზმში ვერც „ტროპიკამკიდი“ აღმოაჩინეს და ვერც  და ინექციის კვალი სხეულზე.

იმისათვის, რომ კახიშვილის მკვლელობის ფაქტი დადასტურდეს, მესამე ექსპერტიზაა საჭირო. ის მიმდინარე კვირაში დაიწყება და დასკვნას 3 თვეში დადებს. თუკი ეს დოკუმენტი სარატოველი ექსპერტების დასკვნის ანალოგიური იქნება, შესაძლებელი გახდება საერთოდ, სისხლის სამართლის საქმის გადაკვალიფიცირება, ანუ საქმის აღძვრა მკვლელობის გამო, რისთვისაც პასუხისგება სამარელ პოლიციელებს მოუწევთ.