სოჭში, იარაღით უკანონოდ მოვაჭრე აფხაზი აიყვანეს

რუსული საინფორმაციო წყაროების ცნობით, რამდენიმე თვის წინ, კრასნოდარის მხარის შინაგან საქმეთა სამმართველოში შევიდა შეტყობინება, რომ სოჭში მცხოვრები „აფხაზეთის რესპუბლიკის“ აფზახი ეროვნების 46 წლის „მოქალაქე“ იარაღისა და ასაფეთქებელ ნივთიერებათა უკანონოდ დამზადებასა და რეალიზაციას ეწევა.

ცხადია, ამ პიროვნებაზე სამართალდამცველთა მხრიდან მაშინვე დაწესდა თვალთვალი.

„ რამდენიმე თვის მანძილზე სამართლდამცველები დეტალურად აგროვებდნენ ყველა აუცილებელ ინფორმაციას. ბოლოს აღნიშნულ პირს რუსმა ოპერმუშაკებმა იარაღის შესასყიდად  პოლიციელი მიუგზავნეს, რომელმაც მისგან  ჯერ „ეფ–1“ ტიპის ყუმბარა შეიძინა, ხოლო შემდეგ პისტოლეტი და გადაჭრილლულიანი სანადირო თოფი“, –განუცხადა Life News–ს კრასნოდარის მხარეში შს სამმართველოს პრესსამსახურის წარმომადგენელმა, ლარისა ტუჩკოვამ.

ამის შემდეგ, სამართალდამცველებმა იარაღით მოვაჭრის სახლი გაჩრიკეს და იქ მთელი არსენალი აღმოაჩინეს. კერძოდ: „აკ“ სისტემის ავტომატი მჭიდითურთ და მასთან ერთად 29 ვაზნა, ვაზნებით სასროლად გადაკეთებული გაზის რევოლვერი, „ მაკაროვის“ სისტემის ორი პისტოლეტი, „ეფ–1“ სისტემის ოთხი ყუმბარა, სამოქმედოდ გამზდებული თვითნაკეთი ასაფეთქებელი მოწყობილობა, შორი მანძილიდან ასაფეთებელი ნივთიერების მოქმედებაში მომყვანი 5 მექანიზმი, ასევე დიდი რაოდენობით ვაზნები და ცეცხლსასროლი იარაღისთვის დამზადებისთის საჭირო სხვა ელემენტი.

ამოღებული ცეხლსასროლი იარაღი და ასაფეთქებელი ნივთიერებები გადაგზავნილია ექსპერტიზაზე, რის შემდეგაც დადგინდება იარაღისა და ტყვია–წამლის  მიმწოდებელი წყაროც.

ჯერჯერობით, რუსი სამართალდაცველები სოჭში დაკავებული იარაღითა და ასაფეთქებელი ნივთიერებებით მოვაჭრე აფხაზის  ვინაობასაც არ ამხელენ.

ისე, ხაზგასასმელია ერთი რამ, ბოლო ხანებში აფხაზ კრიმინალებს სოჭი რატომღაც განსაკუთრებით „შეუყვარდათ“.