ექსპერტიზამ დაადასტურა, რომ დელიანიძეს სხეულზე ცემის კვალი არ აღენიშნება

#18 ბრალდებულთა და მსჯავრდებულთა სამკურნალო დაწესებულებაში, პატიმარ ზურაბ დელიანიძის გარდაცვალებას, ქართულ მედიაში დიდი აჟიოტაჟი მოჰყვა, რის გამოც სასჯელაღსრულების სამინისტრო იძულებული გახდა, საჯარო გაეხადა დეტალები, რომლის გახმაურებისგანაც, ეთიკური მოსაზრებით, თავს იკავებდნენ.

იმის დამადასტურებლად, რომ დელიანიძე ნაცემი და ნაწამები იყო, მედიაში სურათებიც გამოქვეყნდა, სადაც მას კანზე მუქი შეფერილობა და წყლულები აღენიშნება, თუმცა, როგორც აღმოჩნდა, დელიანიძეს ვენერიული დაავადება ჰქონდა, რომელიც მსგავსი დაზიანებებით ხასიათდება.

მედიცინა განმარტავს, რომ ,,ვენერიული, სქესობრივი გზით გადამდები დაავადებები (სგგდ) არის დაავადებები, რომლებიც უპირატესად ვრცელდება ვაგინალური, ანალური ან ორალური სქესობრივი კავშირით.

აღნიშნული ინფექციები უფრო ხშირად ორგანიზმის იმუნიტეტის დაქვეითების შემთხვევაში ვითარდება. არ არსებობს მათი საწინააღმდეგო ვაქცინა. ისინი იწვევენ ისეთ სერიოზულ გართულებებს, როგორიცაა მხედველობის დაკარგვა, უნაყოფობა და სიკვდილი.

სქესობრივი გზით გადამდები დაავადებები (სგგდ) ვრცელდება ძალიან სწრაფად; ყოველწლიურად უამრავი ადამიანი ინფიცირდება და უმეტეს შემთხვევაში მათი ასაკი არ აღემატება 30 წელს.’’

საქართველოს სასჯელაღსრულების, პრობაციისა და იურიდიული დახმარების საკითხთა სამინისტრო, იქიდან გამომდინარე, რომ პატიმრის ჯანმრთელობის ბარათის გასაჯაროება შესაძლებელია მხოლოდ მსჯავრდებულის ან მისი ოჯახის წევრების თანხმობით, რაც ამ ეტაპზე არ არსებობს, დაავადების დეტალებზე არ საუბრობს, თუმცა მედიკოსების განცხადებით, გარეგანი მაჩვენებლები, რომელიც პატიმარს ფოტოზე აღენიშნება, ძალიან ჰგავს სიფილისისთვის დამახასიათებელ მაჩვენებლებს. სამედიცინო პორტალზე აღნიშნული დაავადება ასეა აღწერილი: ,,სიფილისი არის ქრონიკული ინფექციური დაავადება, სიფილისის დროს ზიანდება კანი, ლორწოვანი გარსი, შინაგანი ორგანოები, ძვალსახსროვანი, იმუნური და ნერვული სისტემები.

სიფილისი დაინფიცირების მომენტიდან არის ზოგადი ინფექციური დაავადება, რომელიც არანამკურნალებ ავადმყოფებში გრძელდება წლების განმავლობაში და გამოირჩევა ტალღისებური მიმდინარეობით.  გამწვავების პერიოდში კანზე, ლორწოვანაზე და შინაგან ორგანოებზე შეიმჩნევა სიფილისის აქტიური გამოვლინებები. შესაბამისად, შესაძლოა პატიმარი დაკავების მომენტისთვის უკვე იყო დაავადებული ვენერიული დაავდებით.

საქართველოს სასჯელაღსრულების, პრობაციისა და იურიდიული დახმარების საკითხთა სამინისტრომ, ზურაბ დელიანიძის გარდაცვალებაზე სპეციალური განცხადება გაავრცელა, რომელშიც აღნიშნულია, რომ სამინისტრო ღრმა მწუხარებას გამოხატავს მსჯავრდებულ ზურაბ დელიანიძის გარდაცვალებასთან დაკავშირებით და მზადაა ითანამშრომლოს, როგორც მედია საშუალებებთან, ასევე გარდაცვლილის ოჯახთან, რათა აღნიშნულ საკითხზე ყველა კითხვას ამომწურავი პასუხი გაეცეს.

სამინისტროს ინფორმაციით, მსჯავრდებული ზ.დელიანიძე  2011 წლის 13 დეკემბერს  გასამართლებულ იქნა ბათუმის საქალაქო სასამართლოს მიერ, საქართველოს სსკ 260-ე მუხლის მე-2   ნაწილით (ნახევარი კილოგრამი მარიხუანას უკანონო შეძენა/ შენახვა), რისთვისაც  6 წლით თავისუფლების აღკვეთა მიესაჯა.

 2012 წლის 7 მარტს, იგი, შემდგომი მკურნალობის მიზნით  გადაყვანილ იქნა #18 ბრალდებულთა და მსჯავრდებულთა სამკურნალო დაწესებულებაში და დაეწყო ინტენსიური მკურნალობის კურსი, მაგრამ სამწუხაროდ, მიმდინარე წლის 1 მაისს დადგა პაციენტის ლეტალური შედეგი.

სამინისტროს მიერ გავრცელებულ განცხადებაში ნათქვამია: ,,კონფიდენციალურობის დაცვის პრინციპიდან გამომდინარე, სამინისტროს არ სურდა დეტალური ინფორმაციის გავრცელება მსჯავრდებულის ჯანმრთელობის მდგომარეობის შესახებ, თუმცა, საზოგადოების მაღალი ინტერესიდან გამომდინარე და ზოგიერთ საინფორმაციო საშუალებაში გავრცელებული ინფორმაციის გამო, სამინისტრო საჭიროდ მიიჩნევს ცნობილი გახადოს ზოგიერთი დეტალი: მსჯავრდებული ავადმყოფობდა ვენერიული დაავადების მწვავე ფორმით და მას სამედიცინო დეპარტამენტის მედპერსონალის მიერ ყოველგვარი შესაძლებელი მკურნალობა უტარდებოდა. 

მსჯავრდებულის გარდაცვალებასთან დაკავშირებით,  2012 წლის 1 მაისს, საქართველოს სასჯელაღსრულების, პრობაციისა და იურიდიული დახმარების საკითხთა სამინისტროს საგამოძიებო დეპარტამენტში, ისევე როგორც ნებისმიერი პატიმრის გარდაცვალების  შემთხვევაში, მყისიერად დაიწყო გამოძიება და დაინიშნა სასამართლო-სამედიცინო ექსპერტიზა.

სამინისტრო მიიჩნევს, რომ გარდაცვალების ფაქტი საჭიროებს დეტალურ შესწავლას, თუმცა წინასწარი ვარაუდით, შესაძლებელია, რომ გარდაცვლილ მსჯავრდებულს, ავადობით გამოწვეული ნაწოლები და გვამური ლაქები აღენიშნება.

ზემოაღნიშნულის შესწავლა შესაძლებელია  მოითხოვოს და განახორციელოს  ასევე გარდაცვლილის ოჯახმა ალტერნატიული სამედიცინო ექსპერტიზის დანიშვნის გზით.

სამინისტრო, თავის მხრივ, მას შემდეგ, რაც დასრულდება გამოძიება ზემოაღნიშნულ ფაქტთან დაკავშირებით, ამცნობს საზოგადოებას მსჯავრდებულ ზ.დელიანიძის გარდაცვალების შესახებ დამატებით ინფორმაციას.’’

საქართველოს სასჯელაღსრულების, პრობაციისა და იურიდიული დახმარების საკითხთა სამინისტრომ, ასევე მოუწოდა მასმედიის წარმომადგენლებს თავი შეიკავონ წინასწარი შეფასებებისა და პროგნოზებისაგან.

ამ წუთებში, საინფორმაციო საშუალება TS press–მა, გამოაქვეყნა დელიანიძის ოჯახის წევრების მიერ დანიშნული ალტერნეტიული ექსპერტიზის დასკვნაც, რომელიც მომზადებულია ცენტრ "ვექტორის" ექსპერტის, ალექსანდრე გეჯაძის მიერ. დასკვნაში ნათქვამია: "პატიმარ ზურაბ დელიანიძის გვამის დათვალიერებით შესაძლოა ვივარაუდოთ, რომ მას არ აღენიშნება მექანიკური დაზიანებები და მის ქუსლებზე, კიდურებზე და სხეულის სხვა ნაწილებზე არსებული დაზიანებები ხანგრძლივი უმოძრაობითაა გამოწვეული."

(ფოტოილუსტრაცია)