ჯაფარიძის მკვლელს, მოსკოვში 10 წელი მიუსაჯეს

მოსკოვში, ლუბლინსკის საქალაქო სასამართლომ იური ტიხომიროვი მოსკოვში მცხოვრები ქართველი ანტიფაშისტის, ილია ჯაფარიძის მკვლელობაში დამნაშავედ სცნო და 10 წლით თავისუფლების აღკვეთა მიუსაჯა. ტიხომიროვს მოკლულის ოჯახისათვის კომპენსაციის გადახდაც დაეკისრა.

სასამართლო პროცესი დაზარალებული მხარის თხოვნით დახურულ რეჟიმში მიმდინარეობდა, რადგან მოკლულის ოჯახს ემუქრებოდნენ. ზეწოლის მცდელობა იყო სასამართლოზეც, როცა ერთ-ერთი სხდომის დროს უცნობმა პირებმა დარეკეს და შენობაში ბომბის არსებობის შესახებ განაცხადეს. სასამართლოში ევაკუაცია მოხდა, თუმცა ბომბი ვერ აღმოაჩინეს.

ეკონომიკის უმაღლესი სკოლის სტუდენტი ილია ჯაფარიძე 2009 წლის 28 ივნისს მოკლეს - პერერვის ქიჩაზე, სადაც თავად ცხოვრობდა. ერთ-ერთმა თავდამსხმელმა ტრავმატული პისტოლეტიდან მას რამდენჯერმე ესროლა თავში, მეორემ კი დანით 26 ჭრილობა მიაყენა. ბანდაში იყო მესამე წევრიც, რომელიც მანქანაში იჯდა. ჯაფარიძე საფეხბურთო მატჩის წინა დღეს მოკლეს, რომელზეც ის მეგობრებთან ერთად აპირებდა გამოეკიდა ბანერი „ფეხბურთი რასიზმის წინააღმდეგ“.

ტიხომიროვი 2010 წლის დეკემბერში დააკავეს. მან აღიარა დანაშაული, თუმცა შემდეგ უარი თქვა თავის ჩვენებაზე. მეორე თავდამსხმელი - ბეკლაგინი და მესამე - ვინმე ისაევი, იძებნებიან. მოკლულის დედის დონარა ჯაფარიძის თქმით, 2010 წელს ბეკლაგინი ამ საქმეზე დაკავებული ჰყავდათ, მაგრამ მერე, რატომღაც, გაუშვეს.

როგორც „ნოვაია გაზეტა“ ვარაუდობს, ჯაფარიძის მკვლელებზე, გამოძიება, შესაძლოა ადვოკატ სტანისლავ მარკელოვისა და ჟურნალისტ ანასტასია ბაბუროვას მკვლელობის საქმის ძიებისას გავიდა. ამ საქმეში არის ადვოკატისა და ჟურნალისტის მკვლელობისთვის გასამართლებული ნაციონალისტების საუბრების ჩანაწერები, - ევგენია ხასისი ნიკიტა ტიხონოვს ეუბნება, რომ იცნობს ჯაფარიძის მკვლელებს, ის მათ „სევერნის“ ჯგუფად მოიხსენიებს. ხასისი და ჯაფარიძე ერთად დადიოდნენ სპორტულ კლუბში. ილიას ფოტოები, როგორც ანტიფაშისტური მოძრაობის აქტიური წევრისა, მაშინ, არაერთ ნაცისტურ საიტზე იყო გამოქვეყნებული.