საზარელი შემთხვევა რუსეთში: მშობლებმა ცხრა თვის შვილი სადისტურად მოკლეს

რუსეთში შემზარავი დანაშაული მოხდა: რუსეთის მოქალაქეები, 9 თვის გოგონას მშობლები, აღიარებით ჩვენებაში საუბრობენ, თუ რა სასტიკი გზებით მოკლეს შვილი და შემდეგ როგორ დაფარეს სამხილები.

სამართალდამცავებმა საზოგადოებისთვის ხელმისაწვდომი გახადეს ალექსანდრ კულაგინის დაკითხვის ვიდეოჩანაწერი, სადაც ეს უკანასკნელი ცხრა თვის ქალიშვილის, ანა შკაფცოვას მკვლელობას აღიარებს.

როგორც გამომძიებლებს კულაგინმა უამბო, ტრაგედია ჯერ კიდევ მიმდინარე წლის თებერვალში დატრიალდა. ცოლსა და ქმარს შორის მომხდარი უთანხმოების შედეგად, ბავშვი შემთხვევით დაბლა დავარდა და ამის საფუძველზე ცუდად გახდა. პირველ წუთებში ბავშვის დედა, სვეტლანა შკაპცოვა ბავშვის გადარჩენას ცდილობდა.

„მან ხელოვნური სუნთქვების ჩატარება დაიწყო, შემდეგ გულის მასაჟებზე გადავიდა. მაგრამ შედეგი არაფერმა გამოიღო. მე კი როცა შევხედე ბავშვს და მისი ლურჯი ტუჩები დავინახე, ცოლს ვუთხარი, რომ აზრი აღარ ჰქონდა, რადგან ყოველივე დასრულდა. ამის შემდეგ მან მითხრა რომ ყოველგვარი სამხილი უნდა გაგვენადგურებინა “, - აღნიშნა ეჭვმიტანილმა.

სამხილების გასანადგურებლად, კულაგინი დანაშაულის ადგილს 100 კილომეტრით მოშორდა დ ბავშვის სხეული დაწვა.

დაკითხვის დროს კულაგინმა არ დამალა, რომ ქალაქგარეთ გასვლისა და სხეულის წაღების დროს, მუდმივად ეკონტაქტებოდა ცოლს და ეუბნებოდა სამხილების განადგურების მსვლელობას.

ცოლ-ქმარმა, მეზობლისა და ნათესავებისთვის კი, ნამდვილი სპექტაკლი გაითამაშეს. ისინი ორი კვირის განმავლობაში საგულდაგულოდ „გადახვეული“ ბავშვით სეირნობდნენ. დადიოდნენ მაღაზიებში და ყოველივე საჭირო ნივთსა თუ ბავშვისთვის აუცილებელ საკვებ პროდუქტებს ყიდულობდნენ. შკაპცოვა კი საჭირო თანხას დედას ართმევდა.

11 მარტს გარდაცვლილი გოგონას დედამ პოლიციაში განცხადება შეიტანა ბავშვის გატაცებასთან დაკავშირებით. ახალ სპექტაკლში კულაგინიც მონაწილეობდა. მან ქალის ტანისამოსი გადაიცვა და ბავშვის ცარიელი საწოლი გაიტაცა. მთელი ამ ხნის განმავლობაში, პოლიცია გამტაცებელ ქალს ეძებდა.

ამის შემდეგ, პოლიციამ დაადგინა, რომ კულაგინი წარსულშიც იყო შემჩნეული სადისტური მიდრეკილებისკენ. როგორც ბავშვის მკვლელის ყოფილმა მეუღლემ განაცხადა, რომელთანაც ეს უკანასკნელი 10 წლის განმავლობაში ცხოვრობდა, კულაგინი მის დაწვას ცდილობდა.

„საშასთან თანაცხოვრების პერიოდი ნამდვილი ჯოჯოხეთი იყო. მაშინ როცა ჩვენი გოგონა სულ რამდენიმე თვის იყო, საშა მას დაუნდობლად სცემდა, ანალოგიურ ვითარებაში იყო უფროსი ვაჟიც. მასზე ალკოჰოლი მეტად უარყოფითად მოქმედებს. იგი მუდამ ფიზიკურად მისწორდებოდა და ერთხელ ჩემი ცოცხლად დაწვაც კი სცადა“, - აკონკრეტებს ქალბატონი.

როგორც სვეტლანა აღნიშნავს, რიგითი ჩხუბის შემდეგ, კულაგინმა მას ბენზინი გადაასხა და ცეცხლი მოუკიდა, რამდენიმე წამი ცოლის ტანჯვას აკვირდებოდა, შემდეგ კი წინასწარ მომზადებული კასრიდან მას წყალი გადაასხა. ალექსანდრს არ სურდა ცოლის მოკვლა, მაგრამ სიამოვნებდა მისი ტანჯვისთვის თვალყურის დევნება. როგორც ცნობილია, ქალბატონს სახე, კისერი და მხრები სასტიკად დაეწვა და დღემდე საშინელი იარები შემორჩა.

როგორც ცნობილი გახდა, კულაგინის სისასტიკე მემკვიდრეობითია. ამ უკანასკნელის თქმით, მისმა მამამ საკუთარ ცოლს, ერთ-ერთი კამათის დროს, ცეცხლსასროლი იარაღიდანაც კი ესროლა.

ჯერჯერობით, უცნობია, თუ რა ზომებს მიმართავს სასამართლო მკვლელი მშობლების გასასამართლებლად.