რუსეთში მოკლული მამუკა კახიშვილის ოჯახსა და მოწმეებზე, ზეწოლა ხორციელდება

რუსეთის პირველ არხზე  სამარელი პოლიცილების მიერ მოკლულ მამუკა კახიშვილზე საუბარი ტაბუირებული თემაა. გადაცემაში „О чем говорят“, რომლის დროსაც რუსეთში აქტუალური საკითხი - მილიციის მიერ მოქალაქეებზე ძალადობის პრობლემა უნდა განეხილათ, კახიშვილის მშობლებიც იყვნენ მიწვეულები - იუწყება regionsamara.ru, თუმცა გადაცემის ჩაწერამდე კახიშვილების ოჯახს ტელეფონით დაუკავშირდნენ, როგორც უთხრეს, ურეკავდნენ გადაცემა „О чем говорят“ რედაქციიდან და შეატყობინეს, რომ  რედაქციაზე ზეწოლას ახორციელებდნენ.

კახიშვილის ადვოკატის, მაია საკსონოვას განცხადებით, გოგონას არ უთქვამს, თუ ვინ ახორციელებს ზეწოლას. მისი თქმით, გადაცემაში უნდა განეხილათ სამი ეპიზოდი: ყაზანში, სანკტ-პეტერბურგსა და სამარაში მომხდარი ძალადობის ფაქტები. სანკტ-პეტერბურგში, მას შემდეგ, რაც პოლიციაში ნაცემი დაკავებული მოუკვდათ, თანამდებობიდან გაათავისუფლეს ადგილობრივი შს განყოფილების უმაღლესი ხელმძღვანელობა. ყაზანში, მსგავსი შემთხვევის შემდეგ, დაპატიმრებულია პოლიციის 4 თანამშრომელი. და ერთადერთი ადგილი, სადაც აბსოლუტური განუკითხაობაა, სამარა და კონკრეტულად, კახიშვილის საქმეა.

დღესვე ცნობილი გახდა, რომ ცემით მოკლული ქართველის ოჯახზე და მოწმეებზე, რუსი სამართალდამცველები, ზეწოლის მიზნით, საქმეებს თითხნიან. კერძოდ, მოკლულის მამა ლუდის ქურდობაში დაადანაშაულეს. პოლიცია ლევან კახიშვილს 600 რუბლის ღირებულების ლუდის მოპარვას აბრალებს. მის სახლში უკვე ჩხრეკაც ჩაატარეს.  „ეჭვმიტანილი“ არ დაუკავებიათ, თუმცა ის დაკითხვაზე გამოძახებას ელოდება.

ასევე, ცნობილი გახდა, რომ დიმიტრი ტრიშკინი, რომელიც კახიშვილის საქმეში მოწმედ გადის და რომლის ავტომანქანაც მამუკას ცემის შემდეგ დამწვარი ნახეს, დაკავებულია, როგორც ყაჩაღურ თავდასხმაში ეჭვმიტანილი. კახიშვილების ოჯახის ადვოკატი ამბობს, რომ პოლიციის განცხადებით, ტრიშკინმა და მისმა ორმა მეგობარმა, 25 მარტს, ღამით, მანქანით, ძალიან ახლოს ჩაუარეს ფეხით მოსიარულე მამაკაცს, რომელმაც მათი მისამართით ყვირილი დაიწყო, რის შემდეგაც მანქანაში მსხდომები გადავიდნენ, ტრიშკინის ერთ-ერთმა მეგობარმა კი, თითქოსდა, დანა ამოიღო. თავად ტრიშკინი ამტკიცებს, რომ მანქანიდან საერთოდ არ გადასულა, თუმცაღა სასამართლო მისი დაპატიმრების საკითხს მაინც განიხილავს.

და რაც მთავარია, როგორც სამარის საზოგადოებრივ-პოლიტიკური ინტერნეტ-პორტალი parkgagarina.ru იუწყება, კახიშვილების ადვოკატს ამ საქმესთან დაკავშირებით დადგენილება ანახეს, რომელშიც აღნიშნული ყაჩაღური თავდასხმის მონაწილედ მამუკა კახიშვილის მამაც სახელდება.

ადვოკატი მაია საკსონოვა მიიჩნევს, რომ ეს მოწმეებსა და მოკლულის ოჯახის წევრებზე ღია ზეწოლაა.

შეგახსენებთ, მამუკა კახიშვილი სამარის პოლიციამ 2011 წლის 10 ნოემბერს სასტიკად სცემა. ის საავადმყოფოში მიყვანამდე გარდაიცვალა. ამის გამო, საქმე პოლიციელების მხრიდან უფლებამოსილების გადამეტების ბრალდებითაა აღძრული, თუმცა ოჯახი აცხადებს, რომ ეს მკვლელობა იყო. მათ საქმის დამოუკიდებელი გამოძიება დაიწყეს. ცოტა ხნის წინ კი გაირკვა, რომ კახიშვილის ცხედარს გული ჰქონდა ამოცლილი. სწორედ ამის გამო რუსეთის პოლიცია ახლა ყველანაირად ცდილობს თავი დაიცვას და მოკლულის ოჯახისა და მოწმეების მიმართ პროვოკაციებს ახორციელებს.