ორი მკვლელობა, რომელიც ლევან პირველის სახელს უკავშირდება

ყოფილი დეპუტატი და ბიზნესმენი, ლევან პირველი საქართველოში დაბრუნდა... ის, წინა ხელისუფლების დროს გაქცეული იყო. პირველის სახელს რამდენიმე კრიმინალური ისტორია უკავშირდება...

1999 წლის 29 ივნისს, რესტორან "თამარიონში" ტრაგედია დატრიალდა. იმ დღეს „მოქალაქეთა კავშირის“ წევრი, დეპუტატი ლევან პირველი ვენაში მცხოვრებ დებ მარგარიტა და ლილიანა დოცევებთან, "თბილკრედიტბანკის" გამგეობის თამჯდომარე - დავით ბუაძესთან და ამავე ბანკის სამეთვალყურეო საბჭოს თავმჯდომარესთან, თედო ჟორჟოლიანთან ერთად, დაცვის, გიორგი რჩეულიშვილის თანხლებით რესტორან "თამარიონში" მივიდა. 

იქ მათ დახვდათ "ანგლო-ოილის" წარმომადგენელი საქართველოში, ნიკოლოზ კვანჭახიძე და აგროსერვის "ჯორჯიას" დირექტორი გია ფაღავა. სუფრა რესტორნის ვერანდაზე გაიშალა, ამავე რესტორნის დარბაზში უნივერსიტეტის კურსდამთავრებულები ბანკეტს იხდიდნენ.

შუაღამისას, მათსა და პირველის თანამესუფრეებს შორის ინციდენტი მოხდა, რაც ნიკა უჩანეიშვილის მკვლელობით დასრულდა.

მკვლელობის ბრალდება პროკურატურამ ლევან პირველის დაცვას, რჩეულიშვილს წაუყენა და წინასწარი სამთვიანი პატიმრობა შეუფარდა, თუმცა სიტუაცია გარდაცვლილის მეუღლის, ვიკა უჩანეიშვილის ჩვენების შემდეგ შეიცვალა. მან განაცხადა, რომ ამოიცნო მკვლელი - ლევან პირველი. 

ამის შემდეგ რჩეულიშვილის მიმართ მკვლელობის მუხლით აღძრული საქმე შეწყდა და ბრალდება შეიცვალა, რჩეულიშვილს ბრალი მკვლელობის მცდელობაში, ხულიგნობაში, სხეულის მსუბუქ დაზიანებაში, სამსახურებრივი მდგომარეობის ბოროტად გამოყენებასა და ადამიანების განსაცდელში მიტოვებაში დაედო. 

თუმცა ესეც დროებით, გიორგი რჩეულიშვილმა აღნიშნული ბრალდებისგან გათავისუფლებაც მოახერხა და კვლავ ლევან პირველის დაცვაში დაიწყო მუშაობა.

გამოძიების მიერ დადგენილია, რომ ბანკეტზე მყოფ ახალგაზრდებს შორის იარაღი არცერთს არ ჰქონია, პირველის გარემოცვას კი სამი იარაღი ჰქონდა:  "მაკაროვის", "ზიგზაუერისა" და "ბერეტას" ტიპის. უჩანეიშვილი "ზიგზაუერით" მოკლეს, თუმცა ცნობილია, რომ "ზიგზაუერი" და "ბერეტა" ის იარაღებია, რომელშიც ერთი ტიპის ტყვიები თავსდება.

უჩანეიშვილის მკვლელობას საეჭვოდ დაემთხვა მოკლე დროში, მის მკვლელობაში დადანაშაულებული, ლევან პირველის დაცვის წევრის, გიორგი რჩეულიშვილის მკვლელობა. გაჩნდა მოსაზრება, რომ მოწმე მოიშორეს და თანაც საქმის ხელახალი გამოძიების შემთხვევაში, როგორც იმ დროისთვის ხშირად ხდებობდა, დანაშაულს მიცვალებულს დააბრალებდნენ. 

2002 წლის 10 ივლისს, გიორგი რჩეულიშვილის წელს ზემოთ შიშველი გვამი კასპის რაიონის სოფელ ოკამიდან 6 კმ-ის მოშორებით, ტყეში იპოვეს. გვამთან ზეწარი, საბანი და მაგიდის სუფრა ეყარა, რაც იმაზე მიუთითებდა, რომ გვამი ტყეში სიკვდილის შემდეგ მიიტანეს. სამედიცინო ექსპერტიზით, მას თავში სახრახნისით მიყენებული ჭრილობა აღმოაჩნდა.

უჩანეიშვილის მკვლელობაში, მისი ოჯახის წევრების მიერ დადანაშაულებული ლევან პირველის დაცვის წევრის მკვლელობამ პრესაში ეჭვები გააჩინა, რომ ამ ორ საქმეს ერთმანეთთან კავშირი ჰქონდა.

თუმცა, იმ დროისთვის ლევან პირველი იმუნიტეტით და ედუარდ შევარდნაძის მფარველობით სარგებლობდა, რომელიც ,,მოქალაქეთა კავშირის“ დიდი დახმარებით შეინარჩუნა. ამჟამად კი პირველი ავსტრიაში იმყოფება. თუ აღნიშნულ საქმეებს პროკურატურა გადახედავს, არ არის გამორიცხული იგი დაკითხვაზე დაიბარონ.