კოსტავას ქუჩაზე, ირანელი ბიზნესმენი მოკლეს - ეჭვმიტანილი დაკავებულია

კოსტავას ქუჩაზე, დღეს, ირანელ ბიზნესმენთა კავშირის თავმჯდომარე, მაგსუდ ბედუსტანი მოკლეს. როგორც შინაგან საქმეთა სამინისტროს პრესამსახურის უფროსმა, ზურა გვენეტაძემ განაცხადა, ამ დროისთვის მკვლელობა გახსნილია და დეტალების დადგენა მიმდინარეობს.

ცნობილია, რომ ბედუსტანი ირანელ ბიზნესმენთა კავშირის ხელმძღვანელი იყო  საქართველოში და ამავე დროს, ის კერძო ბიზნესსაქმიანობასაც ახორციელებდა.  მაქსუდ ბედუსტანის ცხედარი მის სამუშაო კაბინეტში აღმოაჩინეს. ბიზნესმენი საქართველოში დაახლოებით 15 წელია რაც მოღვაწეობს. მანამდე ის ნაქირავებ ბინაში ცხოვრობდა, რამდენიმე თვის წინ  კი ბინა შეიძინა.  

გარდაცვლილი საქართველოს მოქალაქეა, მას ორმაგი მოქალაქეობა ჰქონდა.  ირანელ ბიზნესმენთა კავშირის თავმჯდომარე, მაქსუდ ბედუსტანის ცხედარი უკვე გადასვენებულია ექსპერტიზის ჩასატარებლად. მკვლელობა სავარაუდოდ დღეს შუადღეს მოხდა, რადგან თანამშრომლებმა ბედუსტანი სამსახურში დილით ნახეს. შეგახსენებთ, რომ სამართალდამცავებმა მისი ცხედარი დღის 16:00 საათისთვის, კოსტავას 21 ნომერში აღმოაჩინეს.

ფაქტს უშუალო თვითმხილველი არ ჰყავს, თუმცა იმ დროს, როდესაც ეჭვმიტანილი ბედუსტანის სამუშაო ოთახში შევიდა, ოფისში იმყოფებოდნენ მისი თანამშრომლები. 

რამდენიმე წუთის წინ კი ცნობილი გახდა, რომ ბიზნესმენ მაქსუდ ბედუსტანის მკვლელი დაკავებულია. "ინტერნეტ.ჯის" ინფორმაციით, "ნავიდ ნოუ ბაჰარ დეილამინი, რომელმაც, კოსტავას ქუჩაზე, საკუთარ კაბინეტში, ირანელ ბიზნესმენს დანით ექვსი ჭრილობა მიაყენა, შს სამინისტრომ ოპერატიულად დააკავა. წინასწარი ინფორმაციით, დეილამინმა მას სასიკვდილო ჭრილობები ურთიერთშელაპარაკების ნიადაგზე მიაყენა. შს სამინისტრომ, მიმდებარე ტერიტორიაზე განთავსებული სათვალთვალო კამერების ვიდეო-ჩანაწერების შესწავლისა და თვითმხილველების გამოკითხვის შემდეგ, ცხელ კვალზე გატარებული ოპერატიური ღონისძიებების შედეგად, მკვლელი მარტყოფში დააკავა. ნავიდ ნოუ ბაჰარ დეილამინს, აღკვეთის ღონისძიებას თბილისის საქალაქო სასამართლო შეურჩევს".

მაგსუდ ბედუსტანი საქართველოში 15 წლის წინ ჩამოვიდა. მან თავდაპირველად ბიზნესაქმიანობა დაიწყო, მოგვიანებით კი კონტაქტები სხვა ირანელ ბიზნესმენებთანაც დამყარა.  ბედუსტანმა ათი წლის წინ ცოლად ქართველი გოგონა შეირთო, რომელთანაც ვაჟი შეეძინა. ქორწინებიდან სამი წლის შემდეგ, ავტოკატასტროფაში მედუსტანს მეუღლე გარდაეცვალა. ამ დრომდე შვილს  მაგსუდ ბედუსტანი თავად ზრდიდა, რაშიც მისი ცოლისდა ეხმარებოდა.

ბედუსტანი ქართულად საუბრობდა. ახლობლები მას დადებით და უკონფლიქტო ადამიანად ასახელებდნენ. წარმოშობით ირანელი ბიზნესმენი ახლობლებთან საუბრისას ყოველთვის ამბობდა, რომ სურდა შვილი ისეთი გაეზარდა, რომლითაც მისი მეუღლე, ცოცხალი რომ ყოფილიყო, იამაყებდა.