რუსთაველზე მოკლული ზურა ტარყაშვილის საქმის გამო, ნიკოლეიშვილს თავის მართლება მოუწია

ადამიანის უფლებათა დამცველმა, გელა ნიკოლეიშვილმა მედია-კავშირ „ობიექტივში“ ოფიციალურად უარყო წინა გადაცემაში გაკეთებული განცხადება იმის შესახებ, თითქოს რუსთაველზე მოკლული 23 წლის ზურა ტარყაშვილი სანდრო გოგბერაშვილის მკვლელობაში მონაწილეობდა. 

შეგახსენებთ, რომ „პრესა.ჯი“-მ ორი კვირის წინ გამოაქვეყნა სტატია სათაურით - „ცრუპენტელა ადვოკატმა რუსთაველზე მოკლულ ზურა ტარყაშვილს ცილი დასწამა“. 

სტატიაში აღნიშნული იყო, რომ ტარყაშვილის მკვლელობაში ბრალდებულის, დავით რუსიშვილის ადვოკატმა, ვინმე თეიმურაზ მაგრაქველიძემ, რომელიც „ობიექტივში“ სტუმრად იმყოფებოდა გელა ნიკოლეიშვილის გადაცემაში, რუსთაველზე მოკლულ 23 წლის ზურა ტარყაშვილს საზარელი დანაშაული დააბრალა. 

კერძოდ კი, ვინმე თეიმურაზ მაგრაქველიძემ გადაცემაში აღნიშნა, რომ თითქოს ზურა ტარყაშვილი ბრალდებული იყო გრიბოედოვის ქუჩაზე მომხდარ სანდრო გოგბერაშვილის მკვლელობაში. რომ მას წაყენებული ჰქონდა გოგბერაშვილის მკვლელობის ბრალდება.   

თუმცა, ზურა ტარყაშვილი და მისი მეგობრები, სანდრო გოგბერაშვილის საქმეში ფიგურირებდნენ როგორც დაზარალებულები. ხოლო გამოძიების ოფიციალური ინფორმაციით, სანდრო გოგბერაშვილი მოკლა თორნიკე კაჭარავამ, რომელიც გოგბერაშვილის მკვლელობისთვის, ასევე ტარყაშვილისა და მისი მეგობრების: დავით და ლევან ჩიჩუას დაჭრისთვის დაუსწრებლად გაასამართლეს და 24 წლით თავისუფლების აღკვეთა მიუსაჯეს.   

გამოძიების ოფიციალური ინფორმაციით, სანდრო გოგბერაშვილის სხეულიდან ამოღებული ტყვია, იდენტური იყო ტარყაშვილისა და ლევან ჩიჩუას სხეულიდან ამოღებული ტყვიისა. 

საქმეში, მოწმის სახით ფიგურირებს სანდრო გოგბერაშვილის მეგობარი, მსახიობ ჟანრი ლოლაშვილის შვილიც, რომელიც დეტალურად აღწერს თუ როგორ შევარდა იარაღმომარჯვებული თორნიკე კაჭარავა „არკაში“ სროლით... 

გამოძიების ოფიციალური ინფორმაციით, სწორედ „არკაში“ შევარდნილმა კაჭარავამ დაჭრა ზურა ტარყაშვილი, დავით და ლევან ჩიჩუები და შემთხვევით მოარტყა ტყვია თავისივე მეგობარს, სანდრო გოგბერაშვილს, რაც დასტურდება როგორც ექსპერტიზის დასკვნით, ისე მოწმეთა ჩვენებებით... 

ამ ისტორიის შემდეგ, ზურა ტარყაშვილს ხულიგნობის ბრალდება წაუყენეს და 2 წლით თავისუფლების აღკვეთა მიუსაჯეს. ამავე მუხლით გაასამართლეს ლევან და დავით ჩიჩუებიც. 

23 წლის ზურა ტარყაშვილი ციხიდან 4 ოქტომბერს გამოვიდა, ხოლო 17 ოქტომბერს, იგი რუსთაველის გამზირზე, საკუთარ სახლთან სადისტურად მოკლეს. 

ოფიციალური ინფორმაციით, ტარყაშვილის მკვლელობაში ბრალდებულები არიან: კიევში დაპატიმრებული მკვლელობის მთავარი ორგანიზატორი, ივერი გოგბერაშვილი, თბილისში დაპატიმრებული დავით რუსიშვილი და მიმალვაში მყოფი ირაკლი აგლაძე. მათ უვადო თავისუფლების აღკვეთა ემუქრებათ. 

თუმცა, გამოძიება მუშაობს მკვლელობის სხვა თანამონაწილეებისა და ორგანიზატორების იდენტიფიცირებაზეც.  საქმეში ფიგურირებს ვიდეო-კადრებიც. შემთხვევის ადგილიდან ამოღებულია 20-ზე მეტი მასრა. ზურა ტარყაშვილს 11 ტყვია ჰქონდა მორტყმული, აქედან ორი თავში. 

P.S: სადისტურად მოკლული ზურა ტარყაშვილის ოჯახი, ცრუპენტელა ადვოკატის, ვინმე თეიმურაზ მაგრაქველიძის წინააღმდეგ სასამართლოში სარჩელის შეტანას  აპირებს. ფაქტები იმდენად უტყუარია და იმდენად აშკარაა მაგრაქველიძის ცრუპენტელობა, რომ სავარაუდოდ, მას ოფიციალურად მოუწევს მის მიერვე გავრცელებული ცნობის უარყოფა.