• თბილისი
  • 36°C
  • 26 ივნისი, 2019
article

"რძალს ეჩხუბებოდა - უშვილო ხარ და სახლი შენი ძმისშვილებისთვის გინდაო" - რას ჰყვებიან მეზობლები 85 წლის მამაკაცზე, ვინც შვილი, რძალი და ორი მეზობელი მოკლა, ცოლი კი დაჭრა

საგარეჯოს მუნიციპალიტეტის სოფელ ყანდაურაში ოთხი პირის მკვლელობაში ბრალდებულს დღეს ბრალს ოფიციალურად წაუყენებენ.

85 წლის ომარ გამყრელიძეს გამოძიება ოჯახური ძალადობის ნიადაგზე დამამძიმებელ გარემოებებში ჩადენილ განზრახ მკვლელობას ედავება.

ფაქტთან დაკავშირებით შინაგან საქმეთა სამინისტროს საგარეჯოს პოლიციის რაიონულ განყოფილებაში უკვე დაიკითხენ მოწმები, ასევე გამოკითხული ბრალდებული მამაკაციც.

4 ადამიანის მკვლელობასა და ერთი ადამიანის დაჭრაში ბრალდებული პოლიციამ გუშინ დააკავა. ის საგარეჯოს პოლიციის განყოფილებაშია გადაყვანილი. მომხდარზე გამოძიება ოჯახური ძალადობის ნიადაგზე, დამამძიმებელ გარემოებებში ჩადენილი განზრახ მკვლელობის ფაქტზე, სისხლის სამართლის კოდექსის 11 პრიმა 109-ე მუხლის მე-2 და მე-3 ნაწილებით დაიწყო.

გამოცემა "პრაიმ ტაიმის" ცნობით, 85 წლის მამაკაცი, რომელმაც შვილი, რძალი  და მეზობელები - დედა და შვილი ცეცხლსასროლი იარაღით მოკლა, დანაშაულს არ აღიარებს. ამბობს, რომ მისი ოჯახის წევრები და მეზობლები ბუჩქებში დამალულმა, მისთვის უცნობმა პირმა მოკლა.

ირკვევა, რომ ომარ გამყრელიძეს უკვე დიდი ხანია ოჯახის წევრებთან კონფლიქტი ჰქონდა, - ამის შესახებ სოფელ ყანდაურაში მოკლული ქალის ნათესავი საუბრობს.

როგორც მოკლული რძლის დეიდა ამბობს, წყვილს შვილი არ ჰყოლია. ისინი 10 წელი იყვნენ ქორწინებაში. მამამთილი კი ფიქრობდა, რომ მისი უძრავი ქონება რძალს თავისი ახლობლებისთვის უნდოდა.

"ოჯახში უკმაყოფილება იყო, სულ ჩხუბი იყო. თავიდან ერთად ცხოვრობდნენ, შემდეგ ცალკე აიშენა მამამთილმა სახლი და გადავიდა. ხშირად მოდიოდა ხოლმე და ამბობდა, ეს სახლი ჩემი აშენებულია და უნდა ვიაროო. ჩემს დიშვილს ეჩხუბებოდა უშვილო ხარ და სახლი შენი ძმიშვილებისთვის გინდაო," - აცხადებს გარდაცვლილის დეიდა.

მეზობლების თქმით, ომარ გამყრელიძეს ბადიაურში ვენახები აქვს. მას სულ სამი შვილი ჰყავდა. ის წლების განმავლობაში არ ელაპარაკებოდა შვილს და რძალს. ბრალდებულთან ურთიერთობას სოფელში ყველა ერიდებოდა.

მოკლულ შვილს ბავშვობიდან ჯანმრთელობის პრობლემები ჰქონდა. როგორც ადგილობრივი ამბობს, რძალი კარგი და მშრომელი გოგო იყო, ვინაიდან ოჯახს ძალიან უჭირდა, ახალგაზრდა გოგო მინდვრებში მუშაობდა და ბოსტნეულს ჰყიდდა.

მეზობლები ამბობენ, რომ მკვლელობაში ბრალდებული ომარ გამყრელიძე წარსულში პირუტყვის ქურდობისთვის არის ნასამართლევი. მამაკაცმა საპატიმრო 1989 წელს დატოვა.

შეგახსენებთ, გუშინ საგარეჯოში 85 წლის კაცმა შვილი, რძალი და ორი მეზობელი ცეცხლსასროლი იარაღით მოკლა.


თეგები :