• თბილისი
  • 32°C
  • 25 ივლისი, 2017
article

დღეს ლეგენდარული ქართველი ფეხბურთელის მიხეილ მესხის 79 წლის იუბილეა

დღეს ლეგენდარული ქართველი ფეხბურთელის მიხეილ მესხის 79 წლის იუბილეა. ფეხბურთელი , 1937 წელს თბილისში დაიბადა. სპორტის დამსახურებული ოსტატი თბილისის № 35 საფეხბურთო სკოლის აღზრდილი იყო.  1969-91 წლებში მუშაობდა სპეციალიზირებული საბავშვო საფეხბურთო სკოლა „ავაზას“ მწვრთნელად და დირექტორად.
მისი საფეხბურთო კარიერის განმავლობაში თამაშობდა თბილისის "დინამოსა" (1954-69) და "ლოკომოტივში (1970). გატანილი აქვს 35 გოლი საბჭოთა კავშირის ეროვნული ნაკრებში და მონაწილეობა აქვს მიღებული 1962 წლის მსოფლიო ჩემპიონატში. ის ასევე გამოჩნდა ევროპის ერთა თასის პირველ გათამაშებაზე 1960 წელს, რომელიც საბჭოთა კავშირმა მოიგო.
1998 წელს მესხი საქართველოს ფეხბურთის ისტორიაში საუკეთესო მოთამაშედ და საქართველოს მე-20 საუკუნის „საოცნებო გუნდის“ წევრად დაასახელეს.

მიხეილ მესხის სახელს ატარებს თბილისის ლოკომოტივის სტადიონი. 2014 წლის 19 ნოემბერს, ამავე სტადიონზე გაიხსნა მისი ძეგლი.

ფეხბურთელი 1991 წლის 22 აპრილს. 54 წლის ასაკში გარდაიცვალა.

ამონარიდი არჩილ გეგელიას წიგნიდან "სპორტული ცხოვრება", რომელიც მიხეილ მესხს მიუძღვნა: 

"მსოფლიოს ბევრ ქვეყანაში, სადაც მესხს უთამაშია, ლეგენდები დადის ამ ფეხბურთელის ხელოვნებაზე. რატომღაც ჩვენში მიღებულია უცხოელი ფეხბურთელის გაღმერთება, საკუთარს კი ისე ვერ ვაფასებთ, როგორც საჭიროა. ლეგენდა კი, ცოცხალი ლეგენდა ჩვენს გვერდით ცხოვრობს, ჩვენს გვერდით მოღვაწეობს…

ნებისმიერი სტადიონის მაყურებელი ინატრებდა თავისი თვალით ენახა მიხეილ მესხის ოსტატობა. ჩვენ გვენატრება მისი თამაში. ზოგჯერ, როცა სტადიონზე ვართ ან ტელევიზორს ვუყურებთ, უცებ დაგვეცემა მოწყენილობა და საიდანღაც მოსული ნოსტალგია. უცებ გაგვახსენდება მესხი, გაგვახსენდება ზაფხულის ხვატით გათანგული ტრიბუნები და განუმეორებელი ოსტატი სტადიონის მწვანე მინდორზე. ჩვენ – მესხის ოდინდელი გულშემატკივრები, ვისაც ბედნიერება გვხვდა საკუთარი თვალით გვენახა მისი ხელოვნება, დღემდე ვერ შევგუებივართ იმ აზრს, რომ იგი კვლავინდებურად ვეღარ დასცემს თავზარს მეტოქეთა დაცვას."