ჰოლანდიის ნაკრებმა ბოლო წლებში ერთ-ერთი ყველაზე უსუსური მატჩი ჩაატარა და ლოგიკური მარცხი განიცადა გერმანიასთან B ჯგუფის მთავარ შეტაკებაში 1:2. მარიო გომესის დუბლმა გერმანელებს მეოთხედფინალი ფაქტობრივად გაუნაღდა, ხოლო ჰოლანდიელებს ახლა საოცრებაღა თუ იხსნით.

იაოხიმ ლიოვის გუნდი აკონტროლებდა შეხვედრის მსვლელობას და გაცილებით დიდი ანგარიშითაც შეეძლო გამარჯვება, რომ არა “ფორთოხლისფერთა” მეკარის მაარტენ სტეკელენბურგის რამდენიმე თავგანწირვული მოგერიება. ჰოლანდია გუნდი არ იყო…

            B ჯგუფი, ხარკოვი “მეტალისტი”

            გერმანია - ჰოლანდია 2:1

            გოლები: გომესი 24,38 - ვან პერსი 73

            ყვითლები: ბოატენგი 87 - ნაიჯელ დე იონგი 80, ვილემსი 90

Castrol EDGE Index-ის საუკეთესო მოთამაშეები: 1.მარიო გომესი (გერმანია) – 9.43, 2.ჰოლგერ ბადშტუბერი (გერმანია) – 9.13, 3.რობინ ვან პერსი (ჰოლანდია) – 9.08.

მარიო გომესი (გერმანიის ნაკრების თავდამსხმელი): “ჩემპიონატის წინ მოლოდინები ყოველთვის ძალიან დიდია, მაგრამ შენ არ იცი როგორ განვითარდება მოვლენები სტარტზე, აქ შეიძლება ყველაფერი მოხდეს. აი მაგალითად, ჰოლანდიას ორი მატჩის შემდეგ ნული ქულა აქვს და დიდი შანსია, რომ ტურნირს გამოეთიშოს პირველივე ეტაპზე. ჩვენ კი საპირისპიროდ, კარგი სტარტი ავიღეთ, მაგრამ წინ კიდევ დიდი გზაა ფინალამდე.”

უესლი სნაიდერი (ჰოლანდიის ნაკრების ნახევარმცველი): ”ყველას მინდა ბოდიში მოვუხადო ჩვენი თამაშის გამო. ძნელია სიტყვების შერჩევა - ვერც კი წარმოვიდგენდით, თუ ასეთ სიტუაციაში აღმოვჩნდებოდით. ახლა აზრი აღარ აქვს რაიმე სატურნირო ნიუანსებზე ფიქრს, უბრალოდ უნდა გამოვიდეთ და მოვუგოთ პორტუგალის. სიმართლე გითხრათ, ჯგუფური ეტაპის წარმატებულად დასრულების უკვე ნაკლებად მჯერა.”

video