• თბილისი
  • 6°C
  • 24 ნოემბერი, 2017
article

ომალოს ბიბლიოთეკის მომვლელი თამარ თურქოშვილი პრეზიდენტმა ღირსების ორდენით დააჯილდოვა

საქართველოს პრეზიდენტმა პანკისის ხეობის სოფელ ომალოში მცხოვრები თამარ თურქოშვილი ღირსების ორდენით დააჯილდოვა. 56 წლის თამარ თურქოშვილი, 9 წელია ომალოს ავარიულ ბიბლიოთეკას ანაზღაურების გარეშე უვლის.ინფორმაციას "კახეთის საინფორმაციო ცენტრი" ავრცელებს.

თამარ თურქოშვილი ომალოს ბიბლიოთეკაში 20 წელი მუშაობდა. 2007 წელს, ყველა თანამშრომელი გაათავისუფლეს და ბიბლიოთეკა დაიხურა. თუმცა, თამარ თურქოშვილის თქმით, წიგნების სიყვარულმა აიძულა ბიბლიოთეკაში არსებული 20 000-ზე მეტი წიგნი უყურადღებოდ არ მიეტოვებინა.

"1987 წლიდან ვმუშაობდი ამ ბიბლიოთეკაში. ახლა ძალიან ავარიულ მდგომარეობაშია, წყალი ჩამოდის, იატაკი დაზიანებულია. უკვე 9 წელია უსასყიდლოდ ვუვლი ამ ბიბლიოთეკას, წიგნების სიყვარულმა მაიძულა ასე მოვქცეულიყავი. მე რომელ ოთახშიც ვმუშაობდი, ის შედარებით კარგ მდგომარეობაშია და იქ შევიტანე წიგნები, რომ ძალიან არ დაზიანდეს", - განუცხადა "კახეთის საინფორმაციო ცენტრს" თამარ თურქოშვილმა.

მისივე თქმით, ღირსების ორდენი, რომელიც დღეს პრეზიდენტმა გადასცა, მისთვის ყველანაირ ანაზღაურებაზე მნიშვნელოვანია.

"ძალიან გახარებული და ამაყი ვარ. ყველანაირ ხელფასს მირჩევნია ის, რაც დღეს მოხდა", - აღნიშნა თამარ თურქოშვილმა.

საქართველოს პრეზიდენტი პანკისის ხეობაში აშშ-ს და ევროკავშირის ელჩებთან ერთად ჩავიდა. გიორგი მარგველაშვილი მოსახლეობას ხვდება და მათ პრობლემებს ეცნობა.