• თბილისი
  • 32°C
  • 25 ივლისი, 2017
article

თინათინ მაღალაშვილი: "სოციალურად დაუცველი ბავშვების საჩუქრები მოიპარეს"

დღეს დიზაინერ თინათინ მაღალაშვილს ყაზბეგის გამზირზე მდებარე საკუთარი მაღაზია-სალონი გატეხილი დახვდა. დიზაინერმა სტატუსი ამის შესახებ საკუთარი Facebook-ის გვერდზეც გამოაქვეყნა, რომელსაც მალე დიდი გამოხმაურება მოჰყვა. შემთხვევის დეტალებზე სასაუბროდ Presa.ge თინათინ მაღალაშვილს დაუკავშირდა.

- ქალბატონო თინათინ, მოგვიყევით რა მდგომარეობა დაგხვდათ დილით მაღაზიაში მისულს?

- მაღაზია დაგვხვდა გატეხილი. კარი იყო შემტვრეული. ყველა ნივთი იყო ამოქექილი. სალაროდან კი მცირედი თანხა იყო წაღებული. გარდა ამისა, საქმიანი ქალების ფონდი საახალწლოდ აგროვებს საჩუქრებს სოციალურად დაუცველი ბავშვებისათვის და ამ საჩუქრებიდან, რამდენიმე რომლებიც 31-მდე ვერ დავარიგეთ და ველოდებოდით, რადგან კიდევ იყო მოსატანი, ეწყო ნაძვის ხის ქვეშ და ისინიც წაღებულია. ერთი რაც მახსოვს, ეს არის დიდი პულტიანი მანქანა. ამ საჩუქრებს ახლავთ სოციალურად დაუცველი ბავშვების წერილები, ძალიან მძიმე და გულისამაჩუყებელი წასაკითხი.

ყველაზე მეტად მიხარია, რომ ამ ამბავს უკვე ბევრი ადამიანი გამოეხმაურა და გამოთქვეს სურვილი ბავშვებს საჩუქრები კვლავ შეუძინონ.
სიმართლე გითხრათ, ზარალი ძალიან დიდი არ არის, მაგრამ ფაქტი ძალიან ცუდია.

- ხომ არ იყო დაზიანებული სამოსი?

- არა, სამოსი არ არის დაზიანებული. ჩვენ ადრე 10-11 წლის წინ გვქონდა შემთხვევა, როცა ფალიაშვილზე მდებარე ჩემი სალონიდან მხოლოდ კაბები მოიპარეს. ახლა არც კაბებია დაზიანებული, არც ტექნიკას აქვს ხელი ნახლები, დარბეულიც არ არის. ვფიქრობ, თანხის გამო შემოვიდნენ და შემდეგ საჩუქრებიც გააყოლეს ხელს.

- პოლიციას თუ მიმართეთ?

- პოლიციას დილითვე მივმართე. ისინი მოვიდნენ, საგამოძიებო სამსახური, კინოლოგები. აიღეს ანაბეჭდები. სიმართლე გითხრათ მცირე ზარალზე ცოტა მეუხერხულა კიდეც ასეთი ამბავი რომ ატყდა, მაგრამ ასეთი ფაქტები ყურადღების მიღმა არ უნდა დარჩეს.