• თბილისი
  • 21°C
  • 27 მაისი, 2017
article

ღარიბაშვილის პოლიციის რებრენდინგი ახალი ფორმებითა და შევარდნაძის დროინდელი პოლიციელებით

შინაგან საქმეთა მინისტრს სურს იყოს შინაგან საქმეთა მინისტრი. ისეთი, როგორიც ვანო. მართალია, ირაკლი ღარიბაშვილი დაყენებული  მიმიკით, აჩქარებული ინტონაციითა და  საუბრის მანერით ცდილობს მიემსგავსოს მერაბიშვილს, მაგრამ კარგი მინისტრობისთვის მხოლოდ ჟესტიკულაცია არ კმარა.   

დღეს  „ქორთიარდ მარიოტში“  შინაგან საქმეთა მინისტრმა სტუდენტებთან შეხვედრისას  პოლიციის რებრენდინგი დაანონსა: ახალ პოლიციას ვქმნი, ახალ ფორმებს შევუკერავთ პატრულს და კრიმპოლიციასო. ფორმები შინაგან საქმეთა სამინისტროში სულ რაღაც 6 თვის წინ განაახლეს, თანაც შსს-ში აჯობებს ჯერ ციხეებიდან  ათასეულობით გამოშვებულ კრიმინალს მიხედონ. თუმცა რამდენადაც შეყიდვებისა და ტენდერებისთვის ეს ხელის მოთბობის უნიკალური საშუალებაა, ღარიბაშვილიც არ იტყოდა უარს. თუმცა მთავარი პრობლემა არც იმაშია, რა ფერის და ვის მიერ შეკერილი უნიფორმა ეცმევა პატრულს. მთავარი ისაა, რომ ღარიბაშვილი ამ რებრედინგს შევარდნაძის დროინდელი მანკიერი პოლიციური სისტემის კადრებით აპირებს.   ვისაც არ სჯერა, ფაქტებისა და უკვე დანიშნული კადრების მხოლოდ ერთ ნაწილს გადაავლოს თვალი:

შს სამინისტროს გენერალური ინსპექციის უფროსად დაინიშნა შს მინისტრის, ირაკლი ღარიბაშვილის სიმამრის, კახა თარგამაძის დროინდელი პოლიციის უფროსის,  თამაზ თამაზაშვილის დისშვილი, ზვიად ჯანყარაშვილი. შინაგან საქმეთა მინისტრის მოქმედი  მოადგილე ალეკო ტაბატაძე სოსო ალავიძის კადრების სამჭედლოა, ის თარგამაძის დროინდელი ვაკე-საბურთალოს პოლიციიდან მოდის, რევოლუციის შემდგომი მისი აღზევება ბადრი ბიწაძესაც უკავშირდებოდა, მოგვიანებით კი ის უკრაინაში მიდის და ივანიშვილის გამოჩენის შემდგომ - ალასანიას პარტიაში. ზვრლი პოლიციელი - გია კობაჩიშვილი ღარიბაშვილის რეფორმირებულად გამოცხადებული''სოდის'' ახალი უფროსია.

კიდევ ერთი ფაქტი ღარიბაშვილის ახლდადანიშნული ნაფტალინებიდან ამოღებული პოლიციელების:  დუშეთის პოლიციის ახლად დანიშნული უფროსის, ზაზა კაკაჩიას ქმედებები ადგილობრივმა მოსახლოებამ  გააპროტესტა. ამის შესახებ ინფორმაციას ტელეკომპანია "რუსთავი 2" ავრცელებდა. გამგეობასთან შეკრებილი მოსახლეობის თქმით, თანამდებობაზე სამი კვირის წინ დანიშნული კაკაჩია დაკავებულებს ხშირად ფიზიკურ და სიტყვიერ შეურაცხყოფას აყენებს.

მთლად „გვირგვინია“ ღარიბაშვილის ფავორიტი დავით ბედია. 2007 წლის 8 ნოემბერს ბათუმის უნივერსიტეტის სტუდენტები დაარბიეს. სპეცდანიშნულების რაზმი უნივერსიტეტში შეიჭრა და მხუთავი გაზიც გაუშვეს. ამ დარბევის ერთ-ერთი ხელმძღვანელი დავით ბედია - შს სამინისტროს აჭარის სამმართველოს მაშინდელი უფროსი, ახლახან შს სამინისტროს კრიმინალური პოლიციის უფროსად დაინიშნა. 
სპეცრაზმი სტუდენტებს სკოლებშიც შეჰყვა. იმ დღეს სტუდენტები სასტიკად სცემეს. იმავე დღეს ნიღბიანთა ჯგუფი შევიდა „ტელეარხ 25“-ში და არხიდან გადამცემი აპარატურა წაიღო. არხის მაშინდელი დირექტორი აცხადებდა, რომ ჯგუფს ამ შემთხვევაშიც დავით ბედია ხელმძღვანელობდა.

კიდევ ერთი ძველი პოლიციელი შევარდნაძის დროინდელი შსს-დან: იმერეთის, რაჭა-ლეჩხუმის და ქვემო სვანეთის შს სამხარეო მთავარი სამმართველოუფროსი ზურაბ გამეზარდაშვილი, რომელიც კობა ნარჩემაშვილის დროინდელ პოლიციაში მუშაობდა და კახეთის სამხარეოს უფროსი იყო. როგორც ამბობენ, პოსტზე ის სიმამრის  რჩევით დანიშნა მინისტრმა.

აი კიდევ ერთი ფაქტი, როგორ მუშაობს ღარიბაშვილის უწყება  მოწმეებთან.  დეპუტატი ირმა ნადირაშვილი: "აღსანიშნავია, რომ განყოფილებაში ქავთარაძე მოწმის სტატუსითაც არ იყო მიყვანილი. პოლიციაში ცდილობდნენ გამოეძალათ ინფორმაცია მათთვის საინტერესო ადამიანზე. როცა ეს არ მოხერხდა, ლევან გეგენიშვილმა, ვანის პოლიციის ორ თანამშრომელთან ერთად, ალეკო ქავთარაძე პოლიციის მანქანით წაიყვანა ტყეში, რიონის პირას, ესროლა მას ცეცხლსასროლი იარაღი და დაჭრა ფეხის არეში“. საქმის მიჩქმალვის მთავარ მოტივიდ ირმა ნადირაშვილი იმ ფაქტს ასახელებს, რომ  იმ ორ თანამშრომელს შორის, რომლებიც რიონის პირას გეგენიშვილთან ერთად  იმყოფებოდნენ, ერთ-ერთი იმერეთის სამხარეო პოლიციის უფროსის  მოადგილე რაულ შველიძის ოჯახის წევრია.  „ორი თანამშრომელი კი, რომლებმაც სასურველი ჩვენების მისაღებად მოქალაქე ალეკო ქავთარაძე ტყეში წაიყვანეს, დღემდე რჩებიან თანამდებობებზე“,- განმარტა საპარლამენტო უმცირესობის წევრმა.

ეს ღარიბაშვილის პოლიციის სახეების მხოლოდ ნაწილია,  ბაბუს დროინდელი პოლიციელებით  შსს-ს რებრენდინგი პოსტსაახალწლო ბახუსით გამოწვეულ  ხუმრობას უფრო ჰგავს ან იმ   სტუდენტებისთვის თვალებში ნაცრის შეყრას, რომელსაც  ღარიბაშვილი  „ქორთიარდ მარიოტში“ უბრალოდ „აბოლებდა“.