რუსეთი ცვლის თავის დამოკიდებულებას აფხაზეთისა და ცხინვალის რეგიონის მიმართ. ერთი წლის განმავლობაში, მნიშვნელოვნად გაიზარდა იმ მოქალაქეთა რაოდენობა, რომლებიც ეჭვობენ, რომ საქართველოს ოკუპირებული ტერიტორიები დამოუკიდებელი სახელმწიფოები უნდა იყვნენ.

იმავდროულად, მნიშვნელოვნად გაიზარდა აფხაზეთისა და ე.წ. სამხრეთ ოსეთის რუსეთის შემადგენლობაში ხილვის მსურველთა რიცხვიც.
ამის შესახებ „ლავადა-ცენტრის“ მიერ ჩატარებული გამოკითხვის შედეგებიდან გახდა ცნობილი - იუწყება რუსული მედია.

გამოკითხული მოქალაქეების ნახევარზე ნაკლებია დარწმუნებული იმაში, რომ სოხუმი და ცხინვალი დამოუკიდებლები უნდა იყვნენ. პროცენტული მაჩვენებლები, შესაბამისად, ასეთია: 41% და  43%. ერთი წლის წინ საქართველოს ოკუპირებული რეგიონების დამოუკიდებლობა „ლავადა-ცენტრის“ გამოკითხულთა 53%-ს სურდა.

ერთი წლის განმავლობაში,  მნიშვნელოვნად გაიზარდა იმ ადამიანთა რიცხვიც, რომლებიც ამ ორი რეგიონის რუსეთის შემადგენლობაში შესვლის მოსურნენი არიან. ეს მაჩვენებელი შარშანდელი 25%0დან წელს 34%-მდე გაიზარდა აფხაზეთთან მიმართებაში, ცხინვალის რეგიონთან მიმართებაში კი 23%-დან 35%-მდე. ისევ უმცირესობაში არიან ისინი, ვინც ფიქრობენ, რომ ეს ტერიტორიები საქართველოს შემადგენლობაში უნდა დაბრუნდნენ. ასეთთა რაოდენობა ერთი წლის წინ 9% იყო, წელს კი 8%-ია.

 გამოკითხულ რესპონდენტთა 48% თვლის, რომ აფხაზეთისა და ცხინვალის რეგიონის დამოუკიდებლობის აღიარებამ რუსეთს არც სარგებელი მოუტანა და არც ზიანი. 11% დარწმუნებულია, რომ ამით მოსკოვმა საკუთარ თავს ავნო, 28% კი ფიქრობს, რომ პირიქით, ეს კარგი იყო.

იმავდროულად, როგორც გამოკითხვის შედეგები უჩვენებს, გასული წლის შემდეგ შემცირდა იმ რუსეთის მოქალაქეთა რაოდენობა, რომლებიც ნეგატიურად არიან საქართველოსადმი განწყობილები: დღესდღეობით, რუსეთის მოქალაქეთა 43% საუბრობს კარგი დამოკიდებულების თაობაზე იმ საქართველოსადმი, რომელსაც მიხეილ სააკაშვილი ხელმძღვანელობს. აღსანიშნავია, რომ გასული წლის ივლისში ასეთთა რაოდენობა 37% იყო. შესაბამისად, 50%-დან 40-%-მდე შემცირდა მათი რიცხვი, ვინც საქართველოს ნეგატიურად მოიხსენიებს.