ხერსონის ოლქის შს განყოფილების მაიორი, რომელიც „შრომის ბირჟიდან“ მონების გათავისუფლების ოპერაციაში მონაწილეობდა, მონობის დეტალებზე ალაპარაკდა და მოყვა, როგორ ცემდნენ და შიმშილით ტანჯავდნენ ხერსონელ  მონებს.

ხერსონის ოლქში დაფიქსირებული მონობის საქმე საკმაოდ რეზონანსული საქმეა უკრაინაში. ამბავი ქალაქ ახალი კახოვკას სიახლოვეს მოხდა.

სამართალდამცველებმა გამოავლინეს ბანდა, რომელსაც ტყვედ ჰყავდა 40-მდე მამაკაცი, რომლებსაც აიძულებდნენ, ერთი ლუკმა პურისა და წყლის სანაცვლოდ საქონელი ემწყემსა და მინდვრები დაემუშავებინა.

პოლიციამ ინფორმაცია იმ ადამიანისგან მიიღო, ვინც ამ ფერმის არსებობის შესახებ იცოდა. სამართალდამცველებმა ოპერატიული ინფორმაციის მოგოვება დაიწყეს და მონათმფლობელთა არსებობა მართლაც დადასტურდა.

მონები ფერმაში სრულ იზოლაციაში იყვნენ და გაქცევის არანაირი შანსი არ ჰქონდათ. ცხოვრობდნენ ძროხებთან ერთად. თავად ფერმერები არაოფიციალურად მუშაობდნენ, უბრალოდ, მიწა ჰქონდათ იჯარით აღებული, რომელზედაც, სხვათა შორის, კანაფიც მოჰყავდათ.

მოგვიანებით გაირკვა, რომ ფერმის უფროსი აღმოსავლეთის ერთ-ერთი ქვეყნიდანაა. მონებს მისი შვილი და თანაშემწე ეძებდნენ და  თანაც, არც მეტი, არც ნაკლები - შრომის ბირჟებზე.

მაიორი ვიტალი ბაიდაროვი ყვება, რომ მუშები, რომლებიც ფერმაში დახვდნენ, გაძვალტყავებულები, ფაქტობრივად, სიცოცხლის ნიშანწყლის გარეშე იყვნენ. მათ დღეში ერთხელ აჭმევდნენ - გვიან საღამოს. ტერიტორიას კი დიდი ძაღლები იცავდნენ. მონობაში მყოფებმა თქვეს, რომ მცირედი უხარსისხოდ შესრულებული სამუშაოს გამო მათ ჯოხებით სცემდნენ, ხოლო თუ ვინმე გაიქცეოდა, მისდევდნენ, პოულობდნენ და სასტიკად უსწორდებოდნენ.

შსს-ში ამბობენ, რომ ასეთი ისტორიები უკრაინაში უკვე იშვიათობა აღარ არის. ფერმერები ასეთი გზით იაფ მუშა-ხელს შოულობენ: მონებად, ძირითადად, უსახლკარო მოქალაქეები მიჰყავთ, რომლებსაც კარგი პირობებით ჯერ შეიტყუებენ, შემდეგ კი თავისუფლებას უზღუდავენ.

ასეთივე რეზონანსული იყო მაისის თვეში გახსნილი საქმე, ამჟერად, ლუგანსკის ოლქში, სადაც მონობიდან 11 ადამიანი იხსნეს. ისინიც მძიმე სასოფლო-სამეურნეო სამუშაოებს ასრულებდნენ, თან ისე, რომ სახელებს არ ეძახდნენ. მონებს ე.წ. „კლიჩკებს“ აძლევდნენ და როგორც გაირკვა, გარდა იმისა, რომ ანაზღაურების გარეშე ამუშავებდნენ, ხშირად სჯიდნენ კიდეც, რომ მუდმივად „ფორმაში ყოფილიყვენენ“, მაგალითად, გააშიშვლებდნენ და გარკვეულ მანძილზე არბენინებდნენ.