გავრცელებული ინფორმაციით, რუსეთში ბოლო პერიოდში ბევრ სხვა „სიკეთესთან“ ერთად სატელეფონო ხულიგნებიც გააქტიურდნენ. ამ კუთხით განსაკუთრებით თავი „გამოიჩინა“ხულიგანმა, მეტსახელად „იესო ქრისტეს მესიამ“, რომელსაც უკვე პოლიცია დაეძებს. მაინც რა ჩაიდინა ისეთი  „მესიამ“?

საქმეც იმაშია, რომ იგი უშუალოდ რუსეთის ფედერაციის პირველ პირებთან მოითხოვდა შეხვედრას. როგორც სააგენტო „ინტერფაქსი“ იუწყება, უცნობი სატელეფონო ხულიგანი ქვეყნის პირველ პირებთან შეხვედრას იმიტომ ითხოვდა, რათა მათთან ერთად განეხილა „ხელისუფლების მშვიდობიანად შეცვლის“ საკითხი.

აი, რას ჰყვება ამის თაობაზე პოლიციის თანამშრომელი: „4 ივლისს რუსეთის ერთ–ერთი  ტელეკომპანიის საკონტაქტო ტელეფონზე დარეკა უცნობმა. მან განაცხადა, რომ 2 აგვისტოს 15:00 საათამდე ქვეყნის ხელმძღანელობა უნდა შეხვდეს „იესო ქრისტეს საიდუმლო მესიის მეთოფეს“ და განიხილოს მასთან ერთად რუსეთში სახელმწიფო წყობის მშვიდობიანად შეცვლის საკითხი“.

უარის შემთხვევაში „მესია“ იმუქრება, რომ რუსეთის მსხვილ ქალაქებში მოაწყობს „სამხედრო დივერსიებს“. ამასთან მან ის შესაძლო სამიზნეებიც ახსენა, სადაც იგი დივერსიული აქტების ჩატარებას გეგმავდა. კერძოდ, მან დაასახელა მოსკოვი და სანკტ–პეტერბურგი.

მიუხედავად იმისა, რომ პოლიციას მიაჩნია, ზარი სულიერად დაავადებულის მიერ განხორციელდა, სამართალდამცველნი „მესიას“ მაინც ეძებენ მის მიერ ნახსენებ მოსკოვსა და პეტერბურგში, თუმცა, ჯერჯერობით, უშედეგოდ და თუ მისი დაკავება 2 აგვისტომდე ვერ მოხერხდება, მაშინ რა მოხდება, მართლაც ძნელი სათქმელია.