2012 წლის 6 ივნისს, თბილისის საქალაქო სასამართლომ დაასრულა კიდევ ერთი სისხლის სამართლის საქმის განხილვა, რომელიც  სოციალურ ქსელ "facebook”-ზე განთავსებული ფოტოს გამო, მოზარდებს შორის მომხდარ დაპირისპირებასა  და "ქუჩურ გარჩევის” ეხება.

საქმის მასალების მიხედვით: "დავით კ-სა და დიმიტრი ხ.-ს შორის კონფლიქტური ურთიერთობის მიზეზი სოციალურ ქსელ - "facebook”-ზე შეურაცხმყოფელი ფოტოს განთავსება გახდა. აღნიშნული ფოტო დავით კ.-ს მიერ იქნა ატვირთული. დიმიტრი ხ.-მ  დავით კ.-ს არაერთხელ  სთხოვა ფოტოსურათის წაშლა, თუმცა დავით კ. ყოველთვის უარით პასუხობდა. 

2011 წლის 25 სექტემბერს, დიმიტრი ხ. მეგობართან - დავით გ.-სთან ერთად ირაკლი აბაშიძის ქუჩაზე იმყოფებოდა, სადაც მათ შემთხვევით დავით კ. და მისი ძმა საბა კ. შეხვდათ.  დიმიტრი ხ.-მ დავით კ.-ს  იქვე მდებარე კორპუსების უკან გასვლა მოსთხოვა. დიმიტრი  ხ.-ს წინადადებას დავით კ. უყოყმანოდ დათანხმდა. საუბარის თემა კვლავ "facebook”-ზე განთავსებულ ფოტოს შეეხებოდა. საუბრისას დიმიტრი ხ.-მ საკმაოდ აგრესიულად მოსთხოვა დავით კ.-ს ფოტოსურათის წაშლა, რაზედაც ამ უკანასკნელისგან   კვლავ უარი  მიიღო. დიმიტრი ხ.-სა და დავით კ.-ს შორის დაწყებული სიტყვიერი შელაპარაკება მალე ფიზიკურ დაპირისპირებაში გადაიზარდა. საბა კ. და დავით გ. ცდილობდნენ დაპირისპირებული მხარეები გაეშველებინათ, თუმცა სწორედ ამ დროს დიმიტრი ხ.-ს მიერ მოქნეული ხელი შემთხვევით საბა კ.-ს მოხვდა. 

ბრალდებული ძმის ცემის ფაქტმა კიდევ უფრო აღაშფოთა და მან დიმიტრი ხ.-ს თანნაქონი დანით გულმკერდის არეში უმძიმესი დაზიანება მიაყენა. დანაშაულის ჩადენის შემდეგ დავით კ. და საბა კ. შემთხვევის  ადგილიდან მიიმალნენ, ხოლო დავით გ.-მ დაჭრილი მეგობარი ს. ხეჩინაშვილის სახელობის კლინიკაში გადაიყვანა, სადაც ექიმებმა მას სიცოცხლე შეუნარჩუნეს.

სასამართლო სხდომაზე საქმის არსებითი განხილვისას ბრალდებულ დავით კ.ს მიმართ წარდგენილი ბრალი დადასტურებულ იქნა: მოწმეთა და დაზარალებულთა ჩვენებებით, სასამართლო -სამედიცინო ექსპერტიზის დასკვნით, ბიოლოგიური ექსპერტიზის დასკვნით და საქმეში არსებული სხვა უტყუარი მტკიცებულებების ერთობლიობით.თბილისის საქალაქო სასმართლომ, ამჟამად ძებნაში მყოფი დავით კ. დამნაშავედ ცნო განზრახ მკვლელობის მცდელობის ფაქტზე და მას სასჯელის სახედ და ზომად 9 წლის ვადით თავისუფლების აღკვეთა განუსაზღვრა, რაც როგორც არასრულწლოვანს შეუმცირდა ¼-ით და საბოლოოდ, განესაზღვრა თავისუფლების აღკვეთა 6 წლისა და 9თვის ვადით.