• თბილისი
  • 32°C
  • 25 ივლისი, 2017
article

მთავრობის გადაწყვეტილებით, სახელმწიფო ქონების ეროვნული სააგენტო იქმნება

მთავრობის გადაწყვეტილებით, სახელმწიფო ქონების ეროვნული სააგენტო (სსიპ) იქმნება, რომლის ფუნქციაში სახელმწიფო პრივატიზაცია და მართვასთან დაკავშირებული საკითხები გაერთიანდება.

ამასთან დაკავშირებით ცვლილება - „სახელმწიფო ქონების შესახებ“ კანონში შედის, რომლის ინიცირებაც, პარლამენტში უკვე მოხდა. პროექტის განხილვა კი, უახლოეს მომავალში დაიწყება.

როგორც პრესა.ჯი-ს მთავრობის საპარლამენტო მდივანმა, გია ხუროშვილმა განუცხადა, სააგენტოს შექმნის შემდეგ, პრივატიზაციისაა და ქონების მართვის დეპარტამენტების რეორგანიზაცია მოხდება და მათი ფუნქციები, სწორედ ქონების მართვის ეროვნულ სააგენტოზე გადანაწილდება.

„მნიშვნელოვანია, რომ სააგენტოს ის ფუნქციები ექნება, რომლითაც ადამიანებს ცხოვრება გაუმარტივდებათ. მაგალითად, აუქციონზე არსებულ ქონებასთან დაკავშირებით, დაინტერესებულ პირს უფლება ექნება სააგენტოს მიმართოს და ამ ქონების შესახებ დეტალური ინფორმაცია მოიპოვოს. ასევე, მოხდება ინვესტორების შემთხვევაშიც. მათ საშუალება ექნებათ სახელმწიფო პრივატიზაციასთან დაკავშირებით, ინფორმაცია მოითხოვონ და მათ ქონების მართვის სააგენტო დახმარებას გაუწევს“, - აცხადებს ხუროშვილი.

რაც შეეხება უშუალოდ მთავრობის მიერ წარდგენილ პროექტში განსახორციელებელ ცვლილებებს, - „სახელმწიფო ქონების შესახებ“ კანონის მე-10 მუხლს მე-12 პუნქტი ემატება, სადაც აღნიშნულია, რომ სახელმწიფო საკუთრებაში არსებული იჯარით გაუცემელი სასოფლო-სამეურნეო დანიშნულების მიწის ნაკვეთის პირდაპირი მიყიდვის, ან კონკურენტული შერჩევის საფუძველზე პირდაპირი მიყიდვის ფორმით პრივატიზებისას, სახელმწიფო ქონების შემძენის მიერ ნასყიდობის ხელშეკრულებით გათვალისწინებული პირობების განმეროებით შეუსრულებლობის შემთხვევა ან/და დაწესებულ ვადაში პირგასამტეხლოს გადაუხდელობა პრივატიზების განმახორციელებელი ორგანოს მიერ ხელშეკრულების ცალმხივად მოშლის საფუძვლად განიხილება. ასეთ შემთხვევაში კი,  პრივატიზებული ქონება - ქონების მმართველს უბრუნდება. ამავე პუნქტის თანახმად, სახელმწიფო ქონების შემძენს გადახდილი თანხები და გაწეული დანახარჯები არ უნაზღაურდება და საქართველოს მთავრობას უფლება აქვს, ყოველ კონკრეტულ შემთხვევაში, ხელშეკრულების დადებამდე ხელშეკრულების მოშლის განსხვავებული სამართლებლივი შედეგები და პირობები დაადგინოს.

ამას გარდა, კანონის 36-ე მუხლს 1(3) პუნქტი ემატება, რომლის მიხედვით, სახელმწიფო ქონებით მოსარგებლე, რომელსაც აღნიშნული ქონებით მართლზომიერად სარგებლობის უფლების დამადასტურებელი დოკუმენტი არ გააჩნია და ქონებას სამეწარმეო საქმიანობისთვის (კომერციული მიზნით) იყენებს, ვალდებულია ქონების მმართველის წერილობითი მოთხოვნის საფუძველზე, საქართველოს სახელმწიფო ბიუჯეტში გადაიხადოს - სარგებლობის საფასური, საბაზრო ღირებულების შესაბამისად,  (საექსპორტო/აუდიტორიული დასკვნის საფუძველზე) სარგებლობის მთელი პერიოდისთვის.

აღსანიშნავია, რომ ცვლილებებით, განსზღვრულია თუ ვინ შეიძლება იყოს სახელმწიფო ქონების შემძენი. პროექტით, სახელმწიფო ქონების შემძენი (გარდა სახელმწიფო საკუთრებაში არსებული სასოფლო-სამეურნეო დანიშნულების მიწის ნაკვეთის პრივატიზების შემთხვევებისა) შეიძლება იყოს - საქართველოს, ან უცხო ქვეყნის, ან კერძო სამართლის იურიდიული პირი, ან პირთა გაერთიანება, რომლის ქონებაშიც საქართველოს სახელმწიფოს, ან ადგილობრივი თვითმართველობის ორგანოს მონაწილეობის წილი 25 პროცენტზე ნაკლებია, ასევე სახელმწიფოს, სხვა სუბიექტის ან სახელმწიფოსა და სხვა სუბიექტის მიერ ერთობლივად დაფუძნებული არასამეწარმეო იურიდიული პირი, საქართველოს ეროვნული ბანკი, ხოლო საქართველოს პრეზიდენტის გადაწყვეტილებით პირდაპირი მიყიდვისას - ასევე საქართველოს სამოციქულო ავტოკეფალური მართლმადიდებლური ეკლესია.

მთავრობის მიერ მომზადებულ ცვლილებებს, პარლამენტი საგაზაფხულო სესიის დასრულებამდე მიიღებს. მას შემდეგ კი, რაც საკანონმდებლო ორგანო კანონს დაამტკიცებს,  ეს ცვლილებები სრულყოფილად 2012 წლის 17 სექტემბერს ამოქმედდება, თუმცა, ამ დრომდე, მთავრობას სახელმწიფო ქონების ეროვნული სააგენტოს დებულების მიღება და ქონების მმართველი პირების უფლებამოსილებისა და განხორციელების წესების დადგენა მოუწევს.