• თბილისი
  • 21°C
  • 27 მაისი, 2017
article

როცა პატრიარქისა და ეკლესიის სახელს იყენებ...

ჯერ კიდევ რამდენიმე დღის წინ წერდა პრესა.ჯი იმის შესახებ რომ საგანგებო ბრიფინგზე, მთავარმა პროკურორმა, ირაკლი შოთაძემ იცრუა, როდესაც განაცხადა რომ მამა გიორგი მამალაძე მაღალი იერარქიის მქონე სასულიერო პირის მკვლელობის მომზადების ბრალდებით დააკავეს.

მთავარი პროკურორის გარდა, ასევე იცრუა საქართველოს პრემიერ მინისტრმა, გიორგი კვირიკაშვილმაც, როდესაც საჯაროდ და შეშფოთებული სახით განაცხადა რომ „აღკვეთილია ჩვენი ქვეყნის წინააღმდეგ დაგეგმილი  დანაშაული - ეკლესიის  წინააღმდეგ ვერაგული თავდასხმა".

შოთაძისა და კვირიკაშვილის გარდა, იცრუა პარლამენტის იურიდიული კომიტეტის თავმჯდომარემ, ეკა ბესელიამაც, როდესაც ასევე შეშფოთებული სახით აღნიშნა რომ „მზადდებოდა უმძიმესი დანაშაული პატრიარქის წინააღმდეგ“...

შოთაძე-კვირიკაშვილი-ბესელიას გარდა, ასევე იცრუეს ხელისუფლების სხვადასხვა წარმომადგენლებმა, მათ შორის ვოლსკიმ და იუსტიციის მინისტრმა წულუკიანმაც.

ეს უკანასკნელი განსაკუთრებულად ტრაგიკული მიმიკებით ცდილობდა დავერწმუნებინეთ იმაში, რაც დღეს უკვე ოფიციალურად აღმოჩნდა სრული სიცრუე.

მოკლედ, ხელისუფლებამ საზოგადოებას დაუმალა სიმართლე და ვითარება ისე წარმოაჩინა, თითქოს ვიღაც პატრიარქის მკვლელობას გეგმავდა.

თუმცა, კვანძი მაშინ გაიხსნა, როდესაც ჩვენი წყაროს ინფორმაციით, გამოჯანმრთელებულმა პატრიარქმა კატეგორიულად უარყო ხელისუფლების ვერსია, მისი მოწამვლის მცდელობის შესახებ.

მეტიც, უწმინდესი მზად იყო საზოგადოებისათვის ეთქვა სიმართლე. განემარტა რომ პროკურატურის ვერსია მცდარია, თუ ცხადია, ამას თავად სამართალდამცველი ორგანო არ გააჟღერებდა.

ასეც მოხდა. შოთაძის უწყება და მთელი სახელისუფლებო შტო იძულებული გახდა განეცხადებინა რომ დეკანოზ გიორგი მამალაძეს ბრალი არა სასულიერო, არამედ საერო პირის მკვლელობის მომზადების მცდელობისათვის წაუყენეს.

ხოლო, სისხლის სამართლის ის საქმე, რომლის გამოც შეშფოთებული სახეებით ჩამწკრივდნენ ხელისუფლების უმაღლესი პირები, შესაძლოა, სრულად დაინგრეს და საპნის ბუშტივით გასკდეს, არსებული ურთიერთგამომრიცხავი და მთელი რიგი საეჭვო მტკიცებულებებისა თუ მოწმეთა მიმართ არსებული უნდობლობის გამო.

თუმცა, საბოლოო ჯამში, დეკანოზ მამალაძის საქმეზე მაინც სასამართლომ უნდა იმსჯელოს. სასამართლომ უნდა გადაწყვიტოს დამნაშავეა თუ არა იგი საერო და არა სასულიერო პირის მკვლელობის მომზადებაში.

მანამდე კი, თითოეულმა ჩვენგანმა შეგვიძლია უბრალოდ ვიკითხოთ: რა ჰქვია ისეთ ხელისუფლებასა თუ პოლიტიკოსს, რომელიც მართლაც ასე ერთმნიშვნელოვნად ცდილობს პატრიარქისა და ეკლესიის სახელით მანიპულირებას?