• თბილისი
  • 21°C
  • 27 მაისი, 2017
article

ლიტვინენკოს მკვლელობის ძიების საქმეში ახალი დეტალები გამოჩნდა - "ხელი პუტინმა მოაწერა"

დღეს მსოფლიო მედიის ყურადღების ცენტრში ყოფილი ჯაშუშის, რუსი ალექსანდრ ლიტვინენკოს მკვლელობაა. მართალია, ლიტვინენკო 2006 წელს რადიოაქტიური პოლონიუმ-210-ით მოწამლეს (რომელიც ჩაიში შეაპარეს), მაგრამ საქმის გამოძიებისას გამოიკვეთა ახალი დეტალები, რომელთა მიხედვითაც, ლიტვინენკოს მკვლელობის კვალი ვლადიმერ პუტინამდე მიდის.

საჯარო გამოძიებას ლონდონის სასამართლო ატარებს.

სასამართლოს თავმჯდომარის, სერ რობერტ ოუენის განცხადებით, სავარაუდოდ, სწორედ პუტინმა მოაწერა ხელი ლიტვინენკოს მკვლელობას.

ახალი დეტალების გაგებით ძალიან ბედნიერია ლიტვინენკოს ქვრივი მარინა ლიტვინენკო.

"მიხარია, რომ სიტყვები, რომელიც ჩემმა ქმარმა სიკვდილის წინ თქვა (როდესაც იგი პუტინს სდებდა ბრალს მკვლელობის შეკვეთაში), ახლა ინგლისის სასამართლოს მიერ მტკიცდება", - აღნიშნა მან.

მარინა ლიტვინენკომ ასევე მოუწოდა ბრიტანეთის მთავრობას, ქვეყნიდან გააძევოს რუსი სადაზვერვო ოპერატიული სამსახურის თანამშრომლები, დაუწესოს რუსეთს ეკონომიკური სანქციები, შეუზღუდოს გადაადგილების თავისუფლება გარკვეულ პირებს, მათ შორის, პუტინსაც.

გამოძიების ახალ დეტალებს უკვე მოჰყვა გამოხმაურება რუსეთის მხრიდან. საგარეო საქმთა მინისტრმა განაცხადა, რომ გამოძიება "პოლიტიზირებული" იყო. "ვწუხვართ, რომ წმინდა სისხლის სამართლებრივი საქმე პოლიტიზირებული აღმოჩნდა  და ამან დაჩრდილა ორმხრივი ურთიერთობების ატმოსფერო". მისი თქმით, გამოძიება "არ იყო გამჭვირვალე".

BBC-ის ცნობით, ბრიტანეთის შინაგან საქმეთა მინისტრი ტერეზა მეი ვალდებულია, თემთა პალატას წარუდგინოს მთავრობის პასუხი გამოძიების შედეგებზე.

მკვლელობის შესრულებაში ბრალი ედებათ დუმის დეპუტატ ანდრეი ლუგოვოის და "კაგებეს" ყოფილ აგენტ დმიტრი კოვტუნს. ისინი მკვლელობას უარყოფენ.

ლონდონის სასამართლოს თავმჯდომარის სერ რობერტ ოუენის თქმით, ეს ორი ადამიანი, სავარაუდოდ, ФСБ-ს სადაზვერვო სამსახურის დავალებებით მოქმედებდა. ოუენი თავის 300-გვერდიან დასკვნაში წერს, რომ ФСБ-ს მიერ განხორციელებული ოპერაცია პრეზიდენტ პუტინისა და მაშინდელი ФСБ-ს უფროსის ნიკოლაი პატრუშევის მიერ იყო ხელმოწერილი.

ანდრეი ლუგოვოი დასკვნას რუსული საინფორმაციო სააგენტო Interfax-ის მეშვეობით პასუხობს და აცხადებს, რომ მის მიმართ წაყენებული ბრალი სრული აბსურდია.

"როგორც ჩვენ ველოდით, სიურპრიზები არ ყოფილა. დღეს გამოქვეყნებულმა გამოძიების შედეგებმა კიდევ ერთხელ დაადასტურა ლონდონის ანტირუსული პოზიცია და ლიტვინენკოს სიკვდილის რეალური მიზეზის დადგენის სურვილის არქონა", - ამბობს ლუგოვოი.

თავის მხრივ, სერ რობერტ ოუნეი აცხადებს, რომ ის დარწმუნებულია, რომ ლიტვინენკო ლუგოვოის და კოვტუნის მოკლულია. ორივე პიროვნება დაბარებულია დაკითხვაზე ბრიტანული სასამართლოს მიერ, თუმცა, რუსეთი მათ ექსტრადირებაზე უარს აცხადებს.

ოუენის აზრით, ლიტვინენკოს მკვლელობის მიზეზი ბრიტანეთის სადაზვერვო სამსახურებში მისი მუშაობა და მის მიერ ФСБ-სა და პუტინის მუდმივი კრიტიკა იყო, ასევე, მისი ურთიერთობები სხვა რუს დისიდენტებთან.