• თბილისი
  • 29°C
  • 23 სექტემბერი, 2017
article

"რუსული გაზი თუ სომხეთით შემოვა, გაცილებით ძვირი დაგვიჯდება, ვიდრე აზერბაიჯანული"

აზერბაიჯანმა ქართული მხარის სურვილს მიიღოს რუსული გაზი, რაზეც უკვე მიმდინარეობს მოლაპარაკებები "გაზპრომთან", პოლიტიკური ხასიათის გადაწყვეტილება უწოდა.

გავაღიზიანებთ თუ არა მეზობელ სახელმწიფოს რუსული გაზისადმი ქართული ხელისუფლების ლტოლვით, ამაზე პოლიტოლოგმა სოსო ცინცაძემ Presa.ge-სთან ისაუბრა.

- ბატონო სოსო, როგორია თქვენი მოსაზრება "გაზპრომთან" დაწყებული მოლაპარაკებებისა და ამ საკითხზე აზერბაიჯანული მხარის გამოხმაურების შესახებ?

- მე შემიძლია მხოლოდ ზოგადად ვისაუბრო ამაზე, რადგან ინფორმაცია იმის შესახებ, გვყოფნის თუ არა გაზი, არის "მადრიდის სასახლის საიდუმლოებად" ქცეული, უკვე დიდი ხანია.

პრინციპში, დივერსიფიკაცია კარგია. ჩვენმა ენერგეტიკის სამინისტრომ ააშენა თბოელექტრო სადგური და მერე დაიწყო ფიქრი იმაზე, საიდან ეშოვა გაზი. გამოირკვა, რომ ეს გაზი არ ყოფნის. აზერბაიჯანის მხარე ამბობს, რომ ჩვენ გაზი კი გვაქვს, ოღონდ დროულად უნდა გვითხრათ მოწოდებაზეო. დაიწყო რუსული გაზის ძებნა.

რუსული გაზი თუ სომხეთით შემოვა, სადაც ყველაფერი რუსეთის საკუთრებადაა ქცეული ერთი კუბური მეტრი გაცილებით ძვირი დაგვიჯდება, ვიდრე აზერბაიჯანული გაზი. მაშინ რასაკვირველია ეს წამგებიანია. გარდა ამისა, როცა აზერბაიჯანი ამბობს ოფიციალურად, რომ ჩვენ ასი წელი შეგვიძლია მოგამარაგოთ გაზითო, ვერ ვხვდევი ამ ნაბიჯს რა გამართლება აქვს.

თვითმიზანი დივერსიფიკაცია არ შეიძლება იყოს. რასაკვირველია კარგია რომ ერთი მომწოდებლის ნაცვლად სამი-ოთხი გყავდეს და რაც მეტი გყავს პოტენციური მომწოდებელი მით უფრო კარგია, მაგრამ რისთვისაა კარგი? რომ კონკურენციის პირობებში გქონდეს არჩევანი და უფრო იაფად ვიყიდოთ. მაგრამ თუ შენ დივერსიფიკაციის შემთხვევაში უფრო ძვირ მომწოდებელს შოულობ, ეს პოლიტიკურადაც და ეკონომიკურადაც წამგებიანია და აქ სხვა ინტერესებზე შეიძლება ფიქრი.

საჭიროა მეტი გამჭვირვალობა. ჩვენმა ენერგეტიკის მინისტრმა უნდა მისცეს საზოგადოებას უფრო დამაჯერებელი ახსნა და არა ასეთი ლაკონური განცხადებები. მოსახლეობას კარგად უნდა აუხსნას, თუ შეუძლია, რატომ რუსული და რით ჯობს რუსული გაზი იგივე აზერბაიჯანის გაზს.

საქართველოს არ აქვს დიდი მეტალურგიული ქიმიური მრეწველობა, როგორც უკრაინას. მე ერთი რამე არ მესმის, კალაძესთან კომუნიკაცია რომ მქონდეს, ვკითხავდი რომ თუ უკრაინას შეუძლია განაცხადოს, რომ რუსეთის გაზის გარეშე ვიცხოვრებო, ჩვენ რა უკრაინაზე მეტი მოთხოვნილება გვაქვს გაზის? ჩვენ რატომ ვერ ვცხოვრობთ?