• თბილისი
  • 9°C
  • 17 დეკემბერი, 2017
article

ჯამარაულის გასამარჯვებლად ოპოზიციის ლიდერთა ოჯახის წევრებს აპატიმრებენ

საარჩევნო წლის დადგომასთან ერთად ხელისუფლებამ პოლიტიკური ტერორი დაიწყო. გარდაბნის საარჩევნო შტაბის უფროსის, დავით კირკიტაძის ძმა, პროკურატურამ ფაქტობრივად, მძევლად აიყვანა, რათა ქართულმა ოცნებამ გარდაბნის გამგებელი კახი კალაძის ფავორიტი, გოჩა ჯამარაული გახადოს.

შს სამინისტროს ინფორმაციით, ირაკლი კირკიტაძეს ბრალად ედება ხულიგნობა. მას, პროკურატურის მოთხოვნის საფუძველზე, რამდენიმე საათის წინ თბილისის საქალაქო სასამართლოში წინასწარი პატიმრობა შეუფარდეს. მთავარი ოპოზიციური პარტიის წარმომადგენლები პროვოკაციაზე საუბრობენ და აცხადებენ რომ ირაკლი კირკიტაძის დაპატიმრება სახელისუფლებო დაკვეთა იყო, რასაც მმართველ გუნდში უარყოფენ.

თუმცა, ფაქტია რომ ნაციონალური მოძრაობის ერთ-ერთი ლიდერის, დავით კირკიტაძის ძმის მძევლად აყვანის პარალელურად, ენერგეტიკის მინისტრმა, კახი კალაძემ გარდაბნის გამგებლის კანდიდატად ზარზეიმით წარადგინა გოჩა ჯამარაული, რომლის პოლიტიკური და მენეჯერული გამოცდილება ნულს უტოლდება.

როგორც ჩანს, რეიტინგდაცემულ ქართულ ოცნებაში მყარად გადაწყვიტეს რომ არჩევნები ყველაფრის ფასად მოიგონ, მათ შორის პოლიტიკური ტერორის ფასადაც. 

"ოცნებაში" იციან რომ დავით კირკიტაძე, რომელიც წინა ხელისუფლების დროს ქვემო ქართლის გუბერნატორი იყო, რეგიონში და კონკრეტულად გარდაბანში, დღემდე საკმაოდ დიდ გავლენებს ინარჩუნებს. სავარაუდოდ, სწორედ ამიტომ გადაწყდა მისი ოჯახის წევრების შევიწროვებაც...

თუმცა, საკითხავია, იქნება კი დამაჯარებელი სხვისი უბედურების ფასად მოპოვებული გამარჯვება, რომელიც ექსპერტთა აზრით, მიუხედავად დაწყებული პოლიტიკური რეპრესიებისა, ამ ეტაპზე, მაინც სათუოა?