• თბილისი
  • 21°C
  • 27 მაისი, 2017
article

"საარჩევნოდ "ქართულ ოცნებას" სასამართლოში ისეთი ხალხი სჭირდება, ვინც ყველაფერზე წავა"

პარტია "ახალი მემარჯვენეების" ლიდერი მამუკა კაციტაძე Presa.ge-სთან ქვეყანაში მიმდინარე პოლიტიკური პროცესების შესახებ საუბრობს.

- ბატონო მამუკა, თქვენ ერთ-ერთი იყავით იმ ადამიანებს შორის, ვინც ლევან მურუსიძის საააპელაციო სასამართლოში გამწესებას აპროტესტებდა. რა იყო ამ პროტესტის მიზეზი და როგორ ფიქრობთ, რამ განაპირობა იუსტიციის უმაღლესი საბჭოს მიერ ასეთი საკამათო გადაწყვეტილების მიღება.


- ლევან მურუსიძის დანიშვნა იუსტიციის უმაღლესი საბჭოს მიერ სააპელაციო სასამართლოს მოსამართლედ არ არის ჩვეულებრივი საკადრო საკითხი. ეს არის პრობლემა სახელმწიფოსთვის, ზოგადად მართმსაჯულებისთვის. ეს არის მორალურ კანონთან დაკავშირებული პრობლემა და ასევე პოლიტიკურიც.

ლევან მურუსიძე დღეს რომ არის იუსტიციის უმაღლესი საბჭოს მდივანი, მისნაირებში სარგებლობს ავტორიტეტით და პიროვნება ასეთი წარსულითა და აწმყოთი ინიშნება მოსამართლედ, ეს არის მარტივი შეფასება იმისა, რომ კოალიცია  "ქართული ოცნება", მისი ლიდერები და კონკრეტულად ბიძინა ივანიშვილი დაინტერესებულია ამით.

ბიძინა ივანიშვილის 30 დეკემბრის გამოსვლა იყო სხვა არაფერი თუარა მფარველობა ლევან მურუსიძისა. უმრავლესობის ცალკეული წევრები კიდევ ამბობენ, რომ არ ვეთანხმებით, ეს არ უნდა გაკეთებულიყო, ზოგი საერთოდ ამბობს, რომ სირცხვილია, მაგრამ მან თქვა, რომ ყველას ხომ ვერ დავსჯით, ადამიანებს მთავრიდან ვერ ჩამოვიყვანთ, ამიტომ მათ უნდა ვაპატიოთო. ე.ი ვიღაც რიგითი, რომელიც ჭანჭიკის ფუნქციასაც არ ასრულებდა და მურუსიძე, რომელიც მართმსაჯულების ბოროტების შემოქმედი იყო ყოფილა თურმე  ერთი და იგივენაირად საპატიებელი ფიგურაა. ეს კარგად გამოჩნდა მისი გამოსვლის დროს და ამით ილუსტრირდა ლევან მურუსიძე, მისნაირები, რომლებიც კოლექტიურად ერთ ხმაში ამბობენ რომ "ჩვენ ყველა მურუსიძეები ვართ", ბიძინა ივანიშვილმა შეიკედლა ერთი მარტივი საჭიროებიდან გამომდინარე.

2016 წელი არის საარჩევნო. დაწყებული კამპანია ცალკეული მედიასაშუალებების მიმართ "ქართულმა ოცნებამ" ვერ დაამთავრა წარმატებით და მეორე ტალღისთვის, რომელიც დაიწყება მედიასაშუალებებზე და გაძლიერდება წინა საარჩევნო და პოსტ საარჩევნო პერიოდში დავების სახით, მათ სჭირდებათ სააპელაციო სასამართლოში მყარი საყრდენი, ანუ ადამიანები, რომლებიც წავლენ ყველაფერზე, ყველაფერს მოაწერენ ხელს და შეუსრულებენ საარჩევნო ოცნებებს ივანიშვილსა და "ქართული ოცნების" სხვა ლიდერებს. ესაა მურუსიძის მფარველობის, მისი მობრუნების, ლობირების და  წახალისება-დაწინაურების ახსნა.

- როგორ ფიქრობთ, გაართმევს "ქართული ოცნება" თავს 2016 წლის საპარლამენტო არჩევნებს წარმატებით?

-  ერთი რამ შემიძლია გითხრათ, არჩევნები და არჩევნებისთვის თავის გართმევა ხელისუფლების მიერ არ ნიშნავს მხოლოდ პროცენტების მიღებასა და შედეგის დადებას. თუ ხელისუფლება არჩევნებს ართმევს თავს, ეს ნიშნავს, რომ ის ართმევს თავს წინასაარჩევნო პერიოდს, არჩევნებისადმი ლეგიტიმაციისა და ნდობის უზრუნველყოფის პერიოდს და მერე თვითონ არჩევნებს. დღევანდელ დღემდე რაც კოალიცია "ქართულმა ოცნებამ" გააკეთა, არის ის რომ 2016 წლის არჩევნებისთვის შეიქმნას დელეგიტიმაციისა და უნდობლობის გარემო.

განახორციელა თითქოსდა "ცვლილებები" საარჩევნო კანონმდებლობაში, სრული იგნორირება გაუკეთა პოლიტიკურ, სამოქალაქო სექტორს, საერთაშორისო საზოგადოების რეკომენდაციებს, მოირგო საკუთარ თავზე კანონმდებლობა და ასეთი ფორმით მიდის არჩევნებთან, რომელიც უკვე ძალიან დიდი კითხვის ნიშნის მატარებელია.

რაც შეეხება რეიტინგულ მომენტს, ივანიშვილმა განაცხადა, რომ აპირებს ამ საკითხისკენ მობრუნებას და "სერიზოული ფულის" დახარჯვას ამაზე. მან თქვა საკუთარ რესურსებს დავხარჯავო, მას კი ფულის გარდა სხვა რესურსი არ გააჩნია, მას არ აქვს გამორჩეული პოლიტიკური გონიერება, გამოცდილება, სიბრძნე. ამის გათვალისწინებით გასაგებია რომ "ქართული ოცნება" არჩევნებში კარგი შედეგის ჩვენების ყველაზე მაღალი შანსის მატარებელია. თუმცა რა ძალაუფლებას მოიპოვებს ის სხვა ძალების გარეშე, ესეც სერიოზული კითხვის ნიშნის ქვეშაა. წინ ცხრა თვეა და ისეთი დინამიკის ქვეყნისთვის როგორიც საქართველოა, ბევრი რამ შეიძლება ამ დროში შეიცვალოს, ამიტომ ხელისუფლების მორიგი შეცდომების იმედითა და ქართული საზოგადოების სწორი ხედვის იმედით ვემზადებით 2016 წლის არჩევნებისთვის, უმთავრესი იმედი საკუთარი თავის გვაქვს.