• თბილისი
  • 32°C
  • 25 ივლისი, 2017
article

კრემლის დოკუმენტი: მტრები - აშშ, ნატო, ევროკავშირი, მეგობრები - აფხაზეთი და "სამხრეთ ოსეთი"

რუსეთის ფედერაციის ეროვნული უსაფრთხოების განახლებულ სტრატეგიაში, რომელიც ქვეყნის ეროვნულ ინტერესებს, სტრატეგიულ პრიორიტეტებსა და შიდა თუ საგარეო პოლიტიკის ამოცანებს განსაზღვრავს და რომელშიც რუსეთის მსოფლიოს ძლევამოსილ სახელმწიფოდაა გამოყვანილი, საქართველოს ოკუპირებული რეგიონები აფხაზეთი და ე.წ. სამხრეთ ოსეთი მის სტრატეგიულ მოკავშირეებად არიან მოხსენიებული.

გარდა ამისა, დოკუმენტში, რომელიც პუტინის მიერაა დამტკიცებული, ქვეყნის უსაფრთხოებისთვის რისკის წყაროდ აშშ, ნატო და ევროკავშირია განხილული. ზოგადად, დოკუმენტში დასავლეთისადმი მოსკოვის უარყოფითი დამოკიდებულება მკვეთრად იგრძნობა.

რაც შეეხება საქართველოს, დოკუმენტში ის არც მტრებშია მოხსენიებული და არც მეგობრებში. სამაგიეროდ, სტრატეგიულ მოკავშირეებად არიან განხილული რუსეთის მიერ ოკუპირებული საქართველოს რეგიონები:

„ორმხრივი და მრავალმხრივი თანამშრომლობის განვითარება დამოუკიდებელ სახელმწიფოთა თანამეგობრობის წევრ სახელმწიფოებთან, აფხაზეთის რესპუბლიკასა და სამხრეთ ოსეთის რესპუბლიკასთან, წარმოადგენს ერთ-ერთ ძირითად მიმართულებას რუსეთის ფედერაციის საგარეო პოლიტიკისთვის. რუსეთი ავითარებს რეგიონალური და სუბრეგიონალური ინტეგრაციის პოტენციალსა და კოორდინაციას დსთ-ს სივრცეში, ამ თანამეგობრობის ჩარჩოებში და ასევე კოლექტიური უსაფრთხოების ხელშეკრულების ორგანიზაციის სივრცეში, ევრაზიული ეკონომიკური კავშირის სივრცეში, ასევე მოკავშირე სახელმწიფოს სტატუსით, რაც ხელს უწყობს საერთო მდგომარეობის სტაბილურობას რეგიონებში, რომლებიც ესაზღვრებიან დსთ–ს ქვეყნებს, აფხაზეთის რესპუბლიკასა და სამხრეთ ოსეთის რესპუბლიკას“.

დასავლეთთან მიმართებით, მოსკოვის მოთხოვნაა, რომ სამხედრო- პოლიტიკური დაგეგმარების დროს ნატომ გაითვალისწინოს მისი„კანონიერი ინტერესები“. ახალი სტრატეგიის თანახმად, აშშ და მისი მოკავშირეები ეწინააღმდეგებიან რუსეთის მიერ დამოუკიდებელი საგარეო და საშინაო პოლიტიკის წარმოებას, ამას რუსეთი მსოფლიო საქმეებში ჩარევისადმი მათ სწრაფვას მიაწერს.

"რუსეთის ქმედებები წარმოადგენს პრობლემას შეერთებული შტატებისა და მისი მოკავშირეებისთვის", – განაცხადა აშშ-ის შეიარაღებული ძალების შტაბების უფროსთა გაერთიანებული კომიტეტის თავმჯდომარემ, გენერალმა ჯოზეფ დანფორდმა დოკუმენტის კომენტირებისას. დანფორდის აზრით, მოსკოვის მიერ ამ დოკუმენტში გამოხატული პოზიცია არ ცვლის მის წარმოდგენებს რუსეთისგან მომავალ საფრთხეებთან დაკავშირებით, რომელსაც ქმნის რუსეთის კუთვნილი ბირთვული და სხვა სახის იარაღი, ასევე დამოკიდებულება აშშ-ის პარტნიორების მიმართ.

მან ასევე თქვა, რომ  რუსეთის ქმედებები უკრაინასა და საქართველოში აიძულებს ვაშინგტონს სერიოზულად მიუდგეს მოსკოვის სამხედრო პოტენციალს.