რუსეთსა და განსაკუთრებით კი, ჩრდილოეთ კავკასიაში რომ უკიდურესად მძიმე კრიმინოგენული მდგომარეობაა, არავისთვის საიდუმლოებას არ წარმოადგენს. ოფიციალური ინფორმაციით, გასული კვირის (21–დან 27 მაისის ჩათვლით) მანძილზე, მხოლოდ ჩრდილოეთ კავკასიურ კონფლიქტში, მინიმუმ 13 კაცი მაინც დაზარალდა. აქედან 9 კაცი დაიღუპა, ხოლო 4  – დაიჭრა. ასეთია იმ მონაცემების ჯამი,რაც გასული კვირის მანძილზე კავკასიაში არსებული კონფლქტის შესახებ მასმედიით ოფიციალურად გავრცელდა.

დაღუპულთა შორის სამი ძალოვანი სტრუქტურის თანამშრომელია. მათგან ორი დაღესტანში დაიღუპა, ხოლო ერთი – ინგუშეთში. მათ გარდა, უკანონო ფირმირებათა 6 სავარაუდო წევრი მოკლულ იქნა. მათგან 5 ჩეჩნეთში, ხოლო ერთი – დაღესტანში. ეს რაც შეეხება სტატისტიკას.

უნდა აღინიშნოს, რომ საერთოდ, ჩრდილოეთ კავკასიაში საკმაოდ ხშირია სამართალდამცველ ორგანოთა წარმომადგენლებზე თავდასხმა. კერძოდ, 22 მაისს უცნობებმა დაღესტნის დედაქალაქ მახაჭკალის გარეუბანში პოლიციელთა მანქანა დაცხრილეს, რის შედეგადაც ერთი ადგილზე გარდაიცვალა, ხოლო სამი დაიჭრა.მოგვიანებით, ამ დაჭრილთაგან ერთი გარდაიცვალა. 24 მაისს საღამოს, მახაჭკალაში უკვე სამართალდამცველებმა გაუხსნეს ცეცხლი უკანონო ფორმირების წევრობაში ეჭვმიტანილს, რომელმაც მათ ცეცხლითვე უპსახუხა და საბოლოოდ იგი  ადგილზე იქნა ლიკვიდირებული.

იმავე 24 მაისს ჩეჩნეთში, ურუს–მარტანის რაიონში, ძალოვანებმა სამი „ბოევიკისგან“ შემდგარი დაჯგუფება აღმოაჩინეს, რომლებმაც დანებების მოთხოვნის საპასუხოდ  ცეცხლი გახსნეს. ორმხრივი სროლის შედეგად, სამივე მებრძოლი მოკლულ იქნა. მათგან ორი – ახმედ მანცაევი და ახმედ საიდულაევი ამოცნობილია, რომლებიც , სამართლდამცველთა მტკიცებით,ლორსანოვის უკანონო დაჯგუფებაში შედიოდნენ. მესამის ვინაობა ჯერკიდევ დადგენილი არ არის.

ასევე 24 მაისს ჩეჩნეთში, აჩხოი–მარტანის რაიონში დაკავების დროს, სამართალდამცველებისთვის წინააღმდეგობის გაწევისას მოკლულ იქნა ერთი „ბოევიკი“.

27 მაისს ჩეჩნეთში გროზნოს რაიონის სოფელ კერლა–იურტში ასევე მოკლულ იქნა ერთი უკანონო ფორმირების სავარაუდო წევრი. ოფიციალური მონაცემებით, იგი ამავე სოფლის მკვიდრი, 22 წლის ადნან საპარბაევი აღმოჩნდა.

ჩრდილოეთ კავკასიაში საკმაოდ ხშირია აფეთქებები და ტერაქტები. კერძოდ, 24 მაისს ინგუშეთში, სუნჟას რაიონში დაუდგენელი ასაფეთქებელი მოწყობილობის აფეთქების შედეგად, ერთი სამხედრომოსამსახურე დაიღუპა. აფეთქება ზუსტად იმ დროს მოხდა, როცა რუსეთის შსს–ს შინაგანი ჯარების სამხედრომოსამსახურეები სადაზვერვო–საძიებო ღონისძიებებს აწარმოებდნენ, რომლის დროსაც ახალწვეული მძიმედ დაიჭრა. შემდეგ იგი ჰოსპიტალში გარდაიცვალა.

24 მაისს დაღესტანში, იზბერბაშის მახლობლად უცნობებმა რკინიგზა ააფეთქეს. თუმცა, საბედნიეროდ, ამას ვინმეს მსხვერპლი, ან დაზიანება არ მოჰყოლია.

24 მაისი, რბილად რომ ვთქვათ, საკმაოდ „უხვმოსავლიანი“ გამოდგა აფეთქებებისა და სხვა კანონსაწინააღმდეგო ქმედებების მხრივაც. ამ დღეს საღამოთი გროზნოს ცენტრში, მობილურ ტელეფონში ჩამონტაჟებული მცირე სიმძლავრის ასაფეთქებელი მოწყობილობა ამოქმედდა, რომელიც სახელოსნოში სამხედრო ფორმაში გამოწყობილმა მამაკაცმა მოიტანა. აფეთქების შედეგად ოსტატი და სახელოსნოს მეპატრონე დაზარალდნენ.

გასულ კვირაში ჩრდილოეთ კავკასიაში სამართალდამცველებმა რამდენიმე ადამიანიც დააკავეს. კერძოდ, 22 მაისს, დასახლებულ პუნქტ ეშილხატოის მცხოვრები 43  წლის ქალი აიყვანეს, რომელიც შეიარაღებულ იატაქვეშეთთან კავშირშია ეჭვიტანილი. სამართალდამცველთა მონაცემებით, იგი რამდენიმე წლის მანძილზე უკანონო ფორმირებათა წევრებს წამლებით ამარაგებდა.

23 მაისს უკნონო ფორმირებათა წევრობაში ეჭვმიტანილი უკვე გუდერმესში (ჩეჩნეთი) დააკავეს, ხოლო 24 მაისს ასევე ჩეჩნეთში უკანონო ფორმირებათა წევრებისთვის დახმარებაში ეჭვმიტანილი გროზნოსა და ვედენოს ორი მცხოვრები აიყვანეს. 24 მაისსავე, ისევ გროზნოში, შეიარაღებული იატაქვეშეთის წევრობაში ეჭვმიტანილი 35 წლის მამაკაცი დააკავეს.

26 მაისს კი გუდერმესის რაიონში უკანონო შეიარაღებულ ფორმირებათა წევრებისთვის ხელშეწყობის ბრალდებით, 26 წლის მამაკაცი აიყვანეს.

ჩრდილოთ კავკასიაში კვლავ ხშირია ადამიანების გატაცება. მაგალითად, 25 მაისს შეიარაღებულმა სამხედრო კამუფლიაჟიანმა ნიღბოსნებმა სცემეს და გაურკვეველი მიმართულებით წაიყვანეს მახაჭკალის, კიროვის რაიონის მცხოვრები, გაჯი მუსტაფაევი. ამის თაობაზე გატაცებულის მამამ განაცხადა, მაგრამ ინცინდენტის შესახებ ინფორმაცია არც მახაჭკალის კიროვსკის რაიონის შს განყოფილებასა და არც დაღესტნის შს სამინისტროს არ აღმოაჩნდა. მათი განცხადებით, მომხდარის შესახებ მათ არაფერი იცოდნენ.