• თბილისი
  • 27°C
  • 29 მაისი, 2017
article

შტეფან ფულე, ივანიშვილს, შეხვედრის სანაცვლოდ წინაპირობას უყენებს

„ქართული ოცნების“ ლიდერ ბიძინა ივანიშვილს გაფართოებისა და ევროპის სამეზობლო პოლიტიკის საკითხებში ევროკომისარ შტეფან ფულესთან შეხვედრა სურს, ფულე კი, მას ამის სანაცვლოდ, წინაპირობას უყენებს. კერძოდ, ის მოითხოვს ივანიშვილმა „ნაციონალური მოძრაობის“ მიერ შექმნილი ის დეკლარაცია აღიაროს, რომელიც მმართველმა პარტიამ თავისუფალი, სამართლიანი და მშვიდობიანი საარჩევნო კამპანიის წარმართვის მიზნით ზაფხულში შეიმუშავა. დოკუმენტის თანახმად კი, ხელისუფლება საარჩევნო კამპანიის პროცესში, ძალადობასა და ამომრჩევლის მოსყიდვაზე უარს ამბობს და იღებს პასუხისმგებლობას, ცესკოს მიერ შეჯამებული და სანდო რეპუტაციის მქონე სადამკვირვებლო ორგანიზაციების მიერ ლეგიტიმურად მიჩნეული არჩევნების შედეგების აღიარებაზე.

როგორც ერთ–ერთ მედიასაშუალებას ფულეს სპიკერმა, პეტერ სტანომ განუცხადა, ევროკომისარს ივანიშვილთან შეხვედრის სურვილი თავადაც აქვს, მაგრამ ამისთვის ის გარკვეულ პირობას აყენებს.

მისი თქმით, ივანიშვილისგან თხოვნა მიიღეს, რომ მომავალ კვირას,  ბრიუსელში  მისი და შტეფან ფულეს შეხვედრა შედგეს.

„ბატონი ფულე მასთან შესახვედრად მზად არის, თუ ივანიშვილი დაპირებას მიიღებს, რომ საქართველოში მოახლოებული საპარლამენტო არჩევნებისთვის ქცევის კოდექსს „ქართული ოცნება“ ხელს მოაწერს და, რომ მათთვის მისაღები იქნება არჩევნების შედეგები, თუ მათ ლეგიტიმურად მიიჩნევენ – ავტორიტული სამეთვალყურეო ორგანიზაციები, უწინარეს ყოვლისა კი, ეუთო და ეუთო-ს დემოკრატიული ინსტიტუტებისა და ადამიანის უფლებათა ოფისი“, – აცხადებს სტანო.

გაურკვეველია, ბიძინა ივანიშვილი წინაპირობას მიიღებს თუ არა და დოკუმენტს ხელს მოაწერს თუ არა, მაგრამ თავის დროზე, ივანიშვილი ქცევის კოდექსის იდეას მიესალმა, თუმცა განაცხადა, რომ ასეთი დოკუმენტი პარტიებისა და არასამთავრობო ორგანიზაციების ჩართულობით უნდა შექმნილიყო, რის გამოც, კოალიციამ დოკუმენტს ხელი არ მოაწერა. 

რაც შეეხება მმართველი გუნდის მიერ მომზადებულ ქცევის კოდექსს,  დეკლარაციაში საუბარია, იმაზე, რომ ხელისუფლება უარს ამბობს საარჩევნო კამპანიის პროცესში, ძალადობაზე, სხვა პარტიის კამპანიისა და აქციების ხელის შეშლაზე. ასევე აგრესიაზე ამომრჩეველთან შეხვედრისა და კომუნიკაციისას,  ძალადობისკენ მოწოდებაზე და სიძულვილის ენის გამოყენებაზე უმცირესობებთან დაკავშირებულ თემებზე. 

ამასთან, დეკლარაციაში აღნიშნულია, რომ მმართველი ძალა უარს ამბობს ამომრჩევლის მოსყიდვაზე და მზად არიან განუხრელად დაიცვან ცესკოს, არასამთავრობო ორგანიზაციების და უწყებათაშორისი კომისიის რეკომენდაციები ადმინისტრაციული რესურსის გამოყენების შეზღუდვასთან დაკავშირებით. ასევე იღებენ პასუხისმგებლობას, ცესკოს მიერ შეჯამებული და სანდო რეპუტაციის მქონე სადამკვირვებლო ორგანიზაციების მიერ ლეგიტიმურად მიჩნეული არჩევნების შედეგების აღიარებაზე.

შეგახსენებთ, რომ „ნაციონალური მოძრაობის“ მიერ ამ საარჩევნო ქცევის წესების შემუშავებიდან რამდენიმე კვირაში, არასამთავრობო ორგანიზაციებმა დამოუკიდებელი, 17-პუნქტიანი დეკლარაცია შექმნეს, რომელშიც აგვისტოს ბოლოს გარკვეული შესწორება შევიდა და მას მმართველი გუნდის მიერ დაწერილი ქცევის წესებიც დაემატა, მათ შორის ერთ-ერთი კი სწორედ ის მეოთხე პუნქტია, რომლის მიხედვითაც, პარტიები „სანდო რეპუტაციის მქონე სადამკვირვებლო ორგანიზაციების მიერ არჩევნების ლეგიტიმურად მიჩნეულ შედეგებს აღიარებენ“. უნდა ითქვას, რომ „ქართულ ოცნება“ ამ დოკუმენტს მიესალმება, მაგრამ ამასთან დაკავშირებითაც გარკვეულ პირობას აყენებს. კერძოდ, კოალიცია მიიჩნევს, რომ 17 პუნქტიან დოკუმენტში არსებული პუნქტები თუ შესრულდება, მაშინ მას ხელს მოაწერენ.