ცხინვალი ფიჭური კავშირგაბმულობის რუსული კომპანია „მეგაფონით“ უკმაყოფილოა, თუმცა უკმაყოფილების მოთმენა მოუწევთ, რადგან ეს სფეროც ოკუპირებულია, რაც რეგიონში სხვა ოპერატორს, ყოველ შემთხვევაში, ამ დრომდე, გამოჩენის შანსს არ აძლევდა.

ცხინვალში რუსული „მეგაფონი“ 2008 წლის აგვისტოს ომის შემდეგ შევიდა. მანამდე მოსახლეობა ფიჭვური კავშირის ქართული ოპერატორებით სარგებლობდა, რაც სრულებით აწყობდათ კიდეც - წერს ჟურნალისტი ირინა ქელეხსაევა ცხინვალიდან.
თუმცა ომის შემდეგ ჩათვალეს, რომ აღარ შეიძლებოდა ქართული მომსახურებით სარგებლობა და „მეგაფონიც“ გამოჩნდა.

თავიდან ადგილობრივები კმაყოფილები იყვნენ, რადგან ეს ოპერატორი ჩრდილოეთ კავკასიას უფრო იაფად ემსახურებოდა. მაგრამ 2009 წელს, ცხინვალში მოქმედ მეგაფონის შვილობილ კომპანიასთან „ოსტელეკომთან“ პირველი დაძაბულობა წარმოიქმნა, რომელმაც არსებული კოდი 928, 929-ით შეცვალა, რამაც ცხინვალელთა ჯიბეს დიდი დარტყმა მიაყენა. ამოქმედდა როუმინგიც და ჩრდილოეთ ოსეთში, სადაც ცხინვალელებს ნათესავები ჰყავთ, სატელეფონო საუბრების ფასი გაიზარდა.

ყველაზე მოკრძალებული გათვლებით, მაშინ, „ოსტელეკომმა“ ოკუპირებული რეგიონის მოსახლეობის ხარჯზე მილიონ 250 ათასი დოლარი გააკეთა.

ე.წ. პარლამენტის სპიკერი სტანისლავ კოჩიევი ამბობს, რომ ვიღაც ძალიან გამდიდრდა: „ხარჯები სახელმწიფოს მიერ ფინანსდება, შემოსავალს კი კერძო პირები ითვისებენ. ასე არ ხდება. და „მეგაფონმაც“ უნდა აჩვენოს თავისი კონკურენტუნარიანობა, სხვებთან ერთად მუშაობის ფონზე. ჩვენ ყველა დაინტერესებული ვართ ჯანსაღი კონკურენციით და არა დარგის მონოპოლიზაციით, რომელიც ყველაფერს თავად აწესებს: ფასებსაც, შემოსავალ-გასავალსაც, ანუ თავად აკონტროლებს ყველაფერს“.

ბევრ რამეზე მეტყველებს ის ფაქტიც, რომ „მეგაფონ-იუგ“-ის დირექტორთა საბჭოში შედის მარიონეტული რეჟიმის ყოფილი ლიდერის ედუარდ კოკოითის ძმა რობერტ კოკოითი და ე.წ. პრეზიდენტობის ყოფილი კანდიდატი და ე.წ. კავშირგაბმულობის ექს-მინისტრი გიორგი კაბისოვი, რომელიც ამტკიცებდა, რომ ე.წ. სახელმწიფოს კუთვნილი წილი - 49% არ გაიყიდებოდა, თუმცა „ოსტელეკომი“ საბოლოოდ კერძო პირის მიერ იქნა პრივატიზებული.

მოსახლეობა კი მაღალი ფასებით შეწუხდა, თანაც უხარისხო კავშირის ფონზე. ამასთან ახალი კოდით ვერანაირად ვერ უკავშირდებიან რუსეთში ყველაზე პოპულარული მტს-ის აბონენტებს.

სტაციონარული ტელეფონებით ცხინვალის მოსახლეობას დარეკვა შეუძლია მხოლოდ საქართველოში, რუსეთსა და კანადაში. დანარჩენ ქვეყნებში კი მხოლოდ ადგილობრივი „მეგაფონის“ მომხმარებლები რეკავენ. სპეციალისტები დარწმუნებულები არიან, რომ ეს სპეციალურად გაკეთდა, სატელეფონო საუბრებიდან შემოსავლები მთლიანად ამ კომპანიას  რომ შესვლოდა. კავშირგაბმულობის კომიტეტშიც ამბობენ, რომ კაბისოვის, ანუ კოკოითის დროს ტექნიკურად, სისტემა, საამისოდ, სპეციალურად მოაწყვეს. ახლა ცხინვალში სხვა ფიჭვური ოპერატორების შესვლას ითხოვენ. „მეგაფონის“ ჩასაჩოჩებლად ე.წ. სამთვარობო დონეზეც უკვე აქტიურად მუშაობენ.