უკრაინელმა სამართალდამცველებმა უკვე დაადგინეს პიროვნება, რომელმაც უკრაინა-სლოვაკეთის დამაკავშირებელი მიწისქვეშა გვირაბი გათხარა, რათა მისი საშუალებით კონტრაბანდული სიგარეტის ტრანსპორტირება მოეხდინა. სლოვაკი სამართალდამცველები ამ აღმოჩენით შოკირებულები იყვნენ. ისინი უკრაინელ კოლეგებთან ერთად დაუჯერებელი ფაქტის მოწმენი გახდნენ: გვირაბი სათავეს იღებს უჟგოროდის კიდიდან - უკრაინა-სლოვაკეთის საზღვრიდან სულ რაღაც 220 მეტრში და მთავრდება თითქმის ნახევარი კილომეტრის შემდეგ - ევროკავშირისა და შენგენის ზონის სიღრმეში, სლოვაკეთის ორ სოფელს შუა.

საზღვრის ქვეშ, გვირაბის სიღრმე 6 მეტრია, სხვა ადგილებში კი 3 მეტრი.  „ეს გვირაბი, შესაძლოა, შენგენის საზღვარზე დამნაშავეობის მუზეუმის შემადგენელი ნაწილი გახდეს“ – „აღფრთოვანება“ ვერ დამალა სლოვაკეთის ფინანსთა მინისტრმა პეტერ კაჟიმირმა, რომელიც მოიხიბლა გვირაბში შესრულებული საინჟინრო სამუშაოებით. მინისტრმა განაცხადა, რომ ვერასოდეს დაიჯერებდა მსგავს ამბავს და დასძინა, რომ უყურებს ჰოლივუდურ ფილმს ამერიკა-მექსიკის საზღვრის შესახებ.

გვირაბის დათვალიერებისას აღმოაჩინეს მცირე ელექტრო ლოკომოტივი და 16 ვაგონი, რომელსაც კონტრაბანდული სიგარეტი გადაჰქონდა. ამოღებულია 13,1 ათასი ბლოკი სიგარეტი.

თუ გავითვალისწინებთ, რომ ეს ეს მატარებელი კვირაში 2-3-ჯერ მიმოდიოდა, სახელმწიფოს საერთო წაგებამ შესაძლოა წელიწადში 50 მილიარდი ევროც შეადგინოს - განაცხადა სლოვაკეთის ფინანსთა მინისტრმა. მანვე არ გამორიცხა, რომ გვირაბით არა მარტო სიგარეტის კონტრაბანდა, არამედ სხვა კრიმინალიც ხდებოდა, მაგალითად, ადამიანებით ვაჭრობა. უჟგოროდში გვიარბი კერძო სახლიდან არის გათხრილი, რომლის მეპატრონედაც ერთი მსხვილი უჟგოროდელი ბიზნესმენი ითვლება.

მედიამ გამოარკვია, რომ 2004 წელს სასაზღვრო ზონის სიახლოვეს მიწის ნაკვეთები გამოუყვეს უკრაინის უშიშროების საბჭოს რამდენიმე თანამშრომელს. თუმცა ის მიწის ნაკვეთი, სადაც გვირაბის უკრაინული ბოლო ამოდის, პირველმა მესაკუთრემ გაყიდა. ახალმა პატრონმა კი მისი ათვისება ძალიან აქტიურად დაიწყო: მეზობლები ხედავდნენ, როგორ გამოჰქონდათ მანქანებით მიწა, სანაცვლოდ კი მილები, არმატურა და სხვა სამშენებლო მასალა შეჰქონდათ. გადაწყვიტეს, რომ აუზს აშენებდნენ, თუმცა ასეთი რამ იქ არავის უნახავს. ადგილობრივებს ისიც აოცებდა, რომ სახლის ტერიტორიაზე უამრავი ადამიანი შედიოდა, უკან გამოსულებს კი ვეღარავის ხედავდნენ.

სპეციალისტების თქმით, გვირაბი ახალი გაყვანილია და დაახლოებით, ერთი წელია მოქმედებს. ამას მოწმობს ისიც, რომ უჟგოროდშიაღნიშნულ მიწის ნაკვეთზე სახლი სწორედ 2009 წელს წამოიჭიმა, სლოვაკეთში კი ამავე დროს, გვირაბის მეორე ბოლოს ბაღი გაჩეხეს და პატარა შენობა დადგეს.

სამართალდამცველებს, კრიმინალების დაჭერა-დასჯის გარდა კიდევ ერთი საფიქრალი აქვთ: რა მოუხერხონ გვირაბს?

საბოლოო გადაწყვეტილებით, გვირაბს ან ააფეთქებენ, ან დატბორავენ.
თუმცა საქმე ამით არ დასრულდება. აღმოჩენამ საერთაშორისო სკანდალი გამოიწვია და ახლა გამომძიებლებმა ისიც უნდა დაადგინონ, ხომ არ ხორციელდებოდა ამ გვირაბით უკანონო მიგრაცია და ტრეფიკინგი.