დიდმა ბრიტანეთმა შესაძლოა, საქართველოს იუსტიციის სახლის მოდელი გადაიღოს. ამის შესახებ ინიციატივა ლორდთა პალატამ წამოაყენა და ინიციატივითაც მიმართა ინგლისის ხელისუფლებას.

როგორც ლორდთა პალატის მიმართვაშია ნათქვამი, ინგლისის ხელისუფლება  უცხოეთის ქვეყნების ინოვაციებს ყოველთვის უნდა იღებდეს და ითვალისწინებდეს.

„ ვფიქრობთ, რომ გასათვალისწინებელი და გასაზიარებელი უნდა იყოს ნებისმიერი ქვეყნის ახალი პროექტი, რომელიც ინოვაციაა. ამ შემთხვევაში საუბარი გვაქვს საქართველოზე. ამერიკის სახელმწიფო მდივანმა ჰილარი კლინტონმა ცოტა ხნის წინ მნიშვნელოვანი შეფასება გააკეთა იუსტიციის სახლის შესახებ. საქართველოს იუსტიციის სახლმა მოქალაქეების მომსახურეობის პრინციპი გაამარტივა“, - განაცხადა ლორდმა უოლესმა.

პალატაში ასევე სხდომაც გაიმართა და მათ საქართველოს იუსტიციის სახლს უმაღლესი შეფასება მისცეს.

შეგახსენებთ, რომ  პირველი იუსტიციის სახლი გასულ წელს ბათუმში, ქვეყნის დამოუკიდებლობის დღეს გაიხსნა. 2011 წელს გაიხსნა ასევე რუსთავის, მესტიისა და ქუთაისის იუსტიციის სახლები.

იუსტიციის სამინისტროს ინფორმაციით, იუსტიციის სახლი მიმდინარე წელს ქვეყნის თორმეტ დიდ ქალაქში გაიხსნება. ესენია თელავი, გურჯაანი, ახალციხე, ახალქალაქი, ოზურგეთი, ხაშური, გორი, ზუგდიდი, ფოთი, ყვარელი და მარნეული. ბოლოს კი იუსტიციის სახლი თბილისში გაიხსნება.

იუსტიციის სახლის კონცეფცია რამდენიმე წლის წინ შემუშავდა. მისი მიზანია  მომხმარებლებისთვის ეფექტიანი და  ხელმისაწვდომი მომსახურების უზრუნველყოფა. იუსტიციის სახლი რამდენიმე უწყების საქმიანობას ერთი შენობის ფარგლებში, ერთ სივრცეში აერთიანებს, სადაც მომხმარებელს შესაძლებლობა აქვს მიიღოს დაბადების, პირადობის და ქორწინების მოწმობა; დაამოწმოს დოკუმენტი აპოსტილით ან ლეგალიზაციის გზით; შეიტანოს განაცხადი მოქალაქეობის, ბინადრობის, ორდინალური ვიზის მიღების თაობაზე და ა.შ. მოახდინოს უძრავი, მოძრავი, არამატერიალური ქონების რეგისტრაცია (ქონებაზე საკუთრების, იპოთეკის, ქირავნობის, იჯარის, ლიზინგის, აღნაგობის, სერვიტუტის, უზუფრუქტის, გირავნობის და ა.შ. უფლებების რეგისტრაცია);

ქონებაზე საჯაროსამართლებრივი შეზღუდვისა (ყადაღა,აკრძალვა) და საგადასახადო გირავნობა იპოთეკის რეგისტრაცია;

ბიზნესის რეგისტრაცია; საკადასტრო მომსახურება (საკადასტრო გეგმა, საკადასტრო რუკა, ორთოფოტო და ა.შ.). მომხმარებელს შეუძლია არქივში დაცული ცნობებიდან  გამოითხოვონ დაბადების, გარდაცვალებისა და ქორწინების ცნობა;

რეპრესიისა და რეაბილიტაციის ცნობა; სამუშაო სტაჟის დამადასტურებელი ცნობა; გენეალოგიური და ბიოგრაფიული ხასიათის ცნობა; ან სასამართლო გადაწყვეტილების  საფუძველზე, მოითხოვოს აღსრულება: იქვე შეიძლება ალიმენტის საკითხის გადაწყვეტა და ა.შ.