ბიძინა ივანიშვილის ადვოკატები ხუთი დღის განმავლობაში გამოაქვეყნებენ ქონების იმ ნუსხას, რომელსაც ოლიგარქი საქართველოში ფლობს. 

კოალიცია „ქართული ოცნების“ ლიდერი კვლავ უარს აცხადებს მისთვის კონტროლის პალატის განცხადების საფუძველზე, თბილისის საქალაქო სასამართლოს მიერ დაკისრებული ჯარიმის გადახდაზე.

აღსრულების ეროვნული ბიუროს მიერ, ბიძინა ივანიშვილს უკვე გაეგზავნა დოკუმენტი, სადაც მითითებულია, რომ მას ჯარიმის გადასახდელად დამატებით შვიდ დღიანი ვადა ეძლევა.

ბიძინა ივანიშვილის ადვოკატი შალვა თადუმაძე „პრესა.ჯი“-სთან საუბრისას აცხადებს, რომ ოლიგარქი დაკისრებული ჯარიმის გადახდას არ აპირებს.
„ძალაში რჩება ის გადაწყვეტილება, რომელიც მიიღო ბიძინა ივანიშვილმა. ჯარიმას არ გადაიხდის“.

თუმცა, აღსრულების ეროვნულ ბიუროში განმარტავენ, რომ ბიძინა ივანიშვილს ჯარიმის გადასახდელად კიდევ ერთი კვირა აქვს. ამ უწყების წარმომადგენლები იმედოვნებენ, რომ ივანიშვილი შეასრულებს კანონის მოთხოვნებს და სახელმწიფო არ გახდება იძულებული, ჯარიმის იძულებით ამოღების წესი გამოიყენოს.

„აღსრულების ეროვნულ ბიუროში შემოვიდა თბილისის სააპელაციო სასამართლოს მიერ გაცემული 2 სააღსრულებო ფურცელი, რომელთა თანახმადაც ბიძინა ივანიშვილს სახელმწიფო ბიუჯეტის სასარგებლოდ დაეკისრა ჯარიმის სახით თანხა 74 325 065. 65 (63 110 095 ლარი და 11 214 970.65 ლარი) ლარის ოდენობით“-ნათქვამია აღსრულების ეროვნული ბიუროს განცხადებაში.

აღსრულების ეროვნულმა ბიურომ საქმის წარმოება უკვე დაიწყო. თუ ივანიშვილი, რომელიც აღსრულების ეროვნული ბიუროს მიერ მიღებული გაფრთხილების საფუძველზე, 7 დღის ვადაში არ გადაიხდის დაკისრებულ ჯარიმას, მაშინ უწყება აღსრულების იძულებით წესს გამოიყენებს.

„ახალგაზრდა იურისტთა ასოციაციის“ იურისტი ბექა დოჭვირი „პრესა.ჯი“-სთან საუბრისას აცხადებს, რომ თუ აღსრულების ეროვნული ბიურო ბიძინა ივანიშვილის ქონებას ყადაღას დაადებს, ეს შეეხება მხოლოდ იმ უძრავ-მოძრავ ქონებას და საბანკო ანგარიშებს, რაც ოლიგარქს საქართველოში აქვს.

იურისტი განმარტავს, რომ ქონებას ყადაღა იძულებითი აღსრულების დამთავრების შემთხვევაში ეხსნება. მისი თქმით, ვალის ამოღების რამდენიმე ფორმა არსებობს. პირველი - ქონება გაიტანონ აუქციონზე და გაყიდონ. მეორე - განახორციელონ სეკვესტრი, ამოიღონ ვალი და შემდეგ გაათავისუფლონ ქონება ყადაღისაგან. იურისტის განცხადებით, აღსრულება გადაწყვეტს, რა ფორმას გამოიყენებს ვალის ამოსაღებად.

მართალია, ივანიშვილის (საქართველოში არსებული) ქონების ნუსხას ოლიგარქის იურისტები 5 დღეში გამოაქვეყნებენ, თუმცა, „პრესა.ჯი“-მ უკვე მოიძია იმ ინფორმაციის ნაწილი, რომელიც ოლიგარქის საქართველოში რეგისტრირებულ უძრავ-მოძრავ აქტივს ეხება.

მაშ ასე, რა ქონების პატრონია ივანიშვილი საქართველოში?

საქართველოს იუსტიციის სამინისტროს საჯარო რეესტრის ამონაწერში ვკითხულობთ, რომ ბიძინა ივანიშვილი უძრავ ქონებას ფლობს საჩხერის რაიონის სოფელ ჭორვილაში, ასევე დაბა ბაკურიანში, მისამართზე - კობა წაქაძის ქ. N26.

კოალიცია „ქართული ოცნების“ ლიდერი საჩხერის რაიონში, მხოლოდ სოფელ ჭორვილაში არ ფლობს ქონებას უძრავი ნივთის სახით. საჯარო რეესტრის ამონაწერში მითითებულია, რომ ივანიშვილის კუთვნილ ქონებაში შედის მიწის ნაკვეთები საჩხერის რაიონის სოფელ ჯალაურთაშიც.

ოლიგარქისვე საკუთრებაშია ოზურგეთის რაიონში, სოფელ ნატანებში მიწის ნაკვეთიც. კიდევ ერთი უძრავი ნივთის მისამართი ფიქსირსება საჯარო რეესტრის ამონაწერში - დაბა წყნეთში (სტალინის შესახვევი N10). ბიძინა იანიშვილი ფლობს ასევე უძრავ ქონებას ბორჯომსა და საგურამოშიც.

ადვოკატი შალვა თადუმაძე ჩვენთან საუბრისას აცხადებს, რომ ბიძინა ივნიშვილმა უკვე მიიღო დოკუმენტი აღსრულების ეროვნული ბიუროსგან, სადაც მითითებულია, რომ ოცნებააშლილმა მილიარდერმა დაკისრებული ჯარიმა 7 დღის ვადაში უნდა გადაიხადოს.

შალვა თადუმაძე არ ფლობს ინფორმაციას, თუ ვის საკუთრებაშია შუშის სასახლე, რომელშიც ბიძინა ივანიშვილი ოჯახთან ერთად ცხოვრობს. ოლიგარქის „შუშის სასახლე“ 30 მილიონი დოლარი დაჯდა. ის იაპონელი არქიტექტორის - შინ ტაკამაცუს პროექტით არის აშენებული. მშენებლობა კი, ათი წლის განმავლობაში მიმდინარეობდა.

ივანიშვილის ქონების დაყადაღების საკითხზე ჯერჯერობით კომენტარს არ აკეთებენ აღსრულების ეროვნულ ბიუროში. აღსრულების ეროვნული ბიუროს ხელმძღვანელის, ნიკა მელიას განცხადებით, იძულებითი აღსრულების რომელ წესს გამოიყენებენ ეს მხოლოდ მაშინ გახდება ცნობილი, როდესაც ივანიშვილისთვის მიცემული 7 დღიანი ვადა ამოიწურება.

შეგახსენებთ, რომ ბიძინა ივანიშვილი სასამართლომ კონტროლის პალატის ორი ოქმის საფუძველზე თავდაპირველად 150 მილიონამდე ლარით დააჯარიმა. ხოლო სააპელაციო სასამართლოს გადაწყვეტილებით, ივანიშვილს ჯარიმები გაუნახევრდა და მათი რაოდენობა 74 მილიონი ლარით განისაზღვრა.