• თბილისი
  • 34°C
  • 26 ივლისი, 2017
article

„ფსბ“ და ბრიტანელი ისტორიკოსები დაობენ - მოიკლა თუ არა თავი ჰიტლერმა

გერმანელმა ახალგაზრდობამ ოსვენციმის შესახებ არაფერი იცის. 18-დან 29 წლამდე ადამიანებში, 5-დან ერთს წარმოდგენა არ აქვს, რა იყო ოსვენციმი. ასეთი მონაცემები გერმანული ჟურნალ „შტერნის“ სოციოლოგიურმა გამოკითხვამ წარმოაჩინა. გამოკითხვა 1945 წლის 27 იანვარს საბჭოთა ჯარების მიერ საკონცენტრაციო ბანაკის გათავისუფლების თარიღის აღსანიშნავად ჩატარდა. გამოკითხულთა 30%-მა ვერც ის გაიხსენა, რომელ ქვეყანაში მდებარეობდა ფაშისტური „სიკვდილის ქარხანა“.

გამოკითხვის ავტორები იმ დასკვნამდეც მივიდნენ, რომ თანამედროვე გერმანიის მცხოვრებთა ნაწილში მემარჯვენე რადიკალური პოლიტიკური შეხედულებების მომხრეებიც შეინიშნებიან.გერმანელი მკვლევარების მიერ ბუნდესტაგში წარდგენილი მოხსენების თანახმადაც, ფაშისტური ლოზუნგების გავრცელების საშიშ წყაროდ ინტერნეტი იქცა. 

ის არ მომკვდარა 1945-ში, არამედ გაიქცა არგენტინაში და სტალინზე მეტ ხანს იცოცხლა - ეს დასკვნა კი ბრიტანელმა ისტორიკოსებმა გააკეთეს, რომლებმაც ცოტა ხნის წინ ადოლფ ჰიტლერის შესახებ გამოსცეს წიგნი „რუხი მგელი: ადოლფ ჰიტლერის გაქცევა“.

ფიურერის თემა აქტუალობას და პოპულარობას დღემდე არ კარგავს. ბრიტანელი ისტორიკოსების ჯერალდ  უილიამსისა და საიმონ დანსტენის ნამუშევარს მათი კოლეგების ნაწილი სენსაციის მცდელობას უწოდებენ, მაგრამ მკვლევარები ამბობენ, რომ მათ მიერ მოთხრობილი ისტორია ფაქტებს ეყრდნობა.

უილიამსი და დანსტენი ამტკიცებენ, რომ ჰიტლერი ომის ბოლოს არ მომკვდარა, რომ ის ევა ბრაუნთან ერთად არგენტინაში გადავიდა და სტალინის სიკვდილიდან 9 წლის შემდეგ გარდაიცვალა.

ამ  ვერსიის თანახმად, 1945 წლის 27 აპრილს, როცა საბჭოთა ჯარები ბერლინს უტევდნენ, ფიურერი და ევა ბრაუნი რაიხსკანცელარიიდან საიდუმლო გვირაბით გაიქცნენ. ჰიტლერის ადგილი მისმა ორეულმა დაიკავა, მისი საყვარლის როლი კი ნაკლებადცნობილმა მსახიობმა მოირგო. სწორედ მათ მოიკლეს კიდეც თავები ბუნკერში.

ბრიტანელი ისტორიკოსების თანახმად, ჰიტლერი და ბრაუნი თვითმფრინავით გადაიყვანეს დანიაში, ხოლო იქიდან ლუფტვაფის ბაზაზე, საიდანაც თვიმთმფრინავით ესპანეთის ქალაქ რეუსში გადავიდნენ. ესპანეთის დიქტატორმა ფრანკომ ფიურერს თავისი ქვეყნის ამოსაცნობნიშნიანი თვთმფრინავი მისცა, რომლითაც  კანარის კუნძულებზე, მომდევნო დღეს კი წყალქვეშა ნავით, წყვილი, შორეული არგენტინისკენ გაემართნენ.

ჰიტლერის გაქცევის გეგმა, როგორც ბრიტანელი ისტორიკოსები ამტკიცებენ, 1943 წელს ფიურერის თანამებრძოლმა და ნაცისტური პარტიის ხელმძღვანელმა მარტინ ბორმანმა მოამზადა, რომელსაც სურდა, რომ სამხრეთ ამერიკაში მეოთხე რაიხი შექმნილიყო, რომელიც ნაცისტური გერმანიის მემკვიდრე გახდებოდა.თავად ბორმანმა, რომელიც ვეღარსად იპოვეს, ასევე ისარგებლა ამ გეგმით. მკვლევარების ვერსიით, ის, ბერლინის ბუნკერიდან 1945 წლის 1 მაისს გაიქცა. შემდგომ მოხვდა მოკავშირეებთან, რომლებმაც ის შვეიცარიის ბაზელში გადაიყვანეს, იქიდან კი ინგლისში ჩავიდა. ბორმანს, თითქოსდა, გაუკეთეს პლასტიკური ოპერაცია, შეუცვალეს სიარულის მანერა და ხმა და 1956 წელს არგენტინაში გაგზავნეს. მოგვიანებით კი ჰიტლერის მეგობარი პარაგვაიში ჩავიდა, სადაც ბევრი სამხედრო დამნაშავე იმალებოდა და იქვე მოკვდა კიდეც 3 წლის შემდეგ.

რაც შეეხება ფიურერსა და ევას, ისინი, თითქოსდა, ქალაქ მარ-დელ-პლატას შეეფარნენ. 1953 წელს ევა დაშორდა ჰიტლერს და ქალაქ ნეუკენში - ქვეყნის დასავლეთით გადავიდა. თავად ჰიტლერი მარ-დელ-პლატაში 19672 წლამდე ცხოვრობდა, სიცოცხლის ბოლოს სიბერის ჭკუასუსტობას განიცდიდა, თუმცაღა ნაცისტების გამარჯვების მაშინაც სჯეროდა.

ბრიტანელი მკვლევარები ამტკიცებენ, რომ ადოლფსა და ევას ორი ქალიშვილიც კი ჰყავდათ, რომლებიც დღემდე სამხრეთ ამერიკაში ცხოვრობენ.

ჯერალდ  უილიამსი და საიმონ დანსტენი აცხადებენ, რომ მათი ვერსიები სარწმუნოა, ამის მტკიცებულებად კი ის ფაქტიც კმარა, რომ რუსებმა საიდუმლოდ შეინახეს ჰიტლერის ჩონჩხის ნაწილი, რომელზეც ნატყვიარია. ცოტა ხნის წინ კი მოლეკულური ბიოლოგიის ამერიკელმა სპეციალისტებმა დეენემის ანალიზი ჩაატარეს და მივიდნენ დასკვნამდე, რომ ჩონჩხი ეკუთვნის არა ჰიტლერს, რომელიც 1945 წელს 56 წლის იყო,  არამედ 40 წელზე ნაკლები ასაკის ქალბატონს. თუმცა ეს არც ევა ბრაუნია, რადგან ფიურერის მეუღლემ თავი კალიუმის ციანიდით მოიკლა და არა იარაღით.

ამ ნაშრომისა ბევრს არ სჯერა, მათ შორის, ბრიტანელი ისტორიკოსების გამოკვლევა მთელი სერიოზულობით გააკრიტიკა რუსეთის „ფსბ“-მ, რომელიც დაინტერესებულ პირებს, ანალიზისათვის, ფიურერის ჩონჩხის ნაწილებს სთავაზობს, თუმცა ამისათვის, ჯერ ადოლფთან ნათესაობის დამადასტურებელ დოკუმენტებს ითხოვს.