• თბილისი
  • 35°C
  • 22 აგვისტო, 2017
article

პრეზიდენტის ვეტოს დაძლევა პარლამენტს დაჩქარებული წესით მოუწევს

პრეზიდენტის ვეტოს დაძლევა პარლამენტს დაჩქარებული წესით მოუწევს.

როგორც პარლამენტის იურიდიულ საკითხთა კომიტეტის თავმჯდომარე ეკა ბესელიამ განაცხადა, რაც არ უნდა ეწეროს პრეზიდენტის შენიშვნებში ე.წ. მოსმენების შესახებ კანონპროექტთან დაკავშირებით, პრეზიდენტმა დისკუსიის დროც აღარ დატოვა.

ეკა ბესელიას თქმით, პრეზიდენტის ვეტო აღნიშნულ კანონპროექტთან დაკავშირებით მისთვის  მოულოდნელი არ იყო. 

”პირველი, რაც მაწუხებს, ის არის ვადები, რომელიც შეზღუდულია საკონსტიტუციო სასამართლოს მიერ და ეს ვადა 31 მარტს იწურება. 

პრეზიდენტმა ბოლომდე გამოიყენა ვადა, რაც მგონია, რომ ამ პროცესს უქმნის საფრთხეს. აქ საქმე ეხება უსაფრთხოების სისტემას და სისტემას, რომლითაც ჩვენ მთელი ქვეყნის მოსახლეობის დაცვის გარანტიებზე გვევალება პასუხისმგებლობა. ამ მოცემულობიდან გამომდინარე, მოგვიწევს ძალიან სწრაფ რეჟიმში მივიღოთ გადაწყვეტილება. 

ეს იმას ნიშნავს, რომ რაც არ უნდა ეწეროს ამ შენიშვნებში, დისკუსიის დროც აღარ დატოვა პრეზიდენტმა იმიტომ, რომ ეს არის ამ თვის ბოლო სასესიო კვირა, ეს კი ნიშნავს, რომ პარლამენტმა ამ კვირაში გადაწყვეტილება უნდა მიიღოს. 

როდესაც დღეს იგზავნება ვეტო, ეს ნიშნავს, რომ დისკუსიის დრო უბრალოდ აღარ არის. ჩვენ, რა თქმა უნდა, ამ კანონს მივიღებთ და მოსახლეობას საფრთხეების წინაშე არ დავტოვებთ”, - განაცხადა ბესელიამ. 

პრეზიდენტმა ე.წ. მოსმენების კანონს დღეს ვეტო დაადო. შესაბამისად, საკანონმდებლო ცვლილებათა პაკეტი პარლამენტს მისი მოტივირებული შენიშვნებით დაუბრუნდება.