ჯავახეთის დიასპორა რუსეთში, 2008 წლის აგვისტოს ომის ოთხი წლისთავთან დაკავშირებით გამოდის ინიციატივით, გასამართლებულ იქნას საქართველოს ექს-პრეზიდენტი ედუარდ შევარდნაძე. დიასპორის წარმომადგენელთა თქმით, ეს, შეიძლება, ერთ-ერთი მთავარი პირობა გახდეს ქართულ-აფხაზური და ქართულ-ოსური შერიგებისათვის.

დიასპორამ გაავრცელა განცხადება, რომელშიც ნათქვამია, რომ ედუარდ შევარდნაძემ ყველაზე დამანგრეველი დარტყმები მიაყენა საქართველოს სახელმწიფოებრიობას: ძალისმიერი გზით მიიტაცა ხელისუფლება, დაიწყო ომი აფხაზეთში, ატარებდა სადამსჯელო ექსპედიციებს სამხრეთ ოსეთსა და სამეგრელოში, დაანგრია უმაღლესი განათლების სისტემა, გაანადგურა მეცნიერება, დასავლური ღირებულებები ნაციონალური ინტერესების საზიანოდ გაავრცელა და საზოგადოებაში ნატო-ში სწრაფად შესვლის მითი ჩანერგა, გაანადგურა საქართველოს ეკონომიკა, მიითვისა ხალხის ქონება და ა.შ.

„შევარდნაძის ძველი ინტელიგენციისა და ახალგაზრდა რეფორმატორთა პოლიტიკური სიმბიოზი ის ძალა აღმოჩნდა, რომელმაც დაანგრია სახელმწიფო, დაყო ქართული საზოგადოება. შევარდნაძისა და მისი მაშინდელი დანაშაულებრივი გარემოცვის მოღვაწეობა, საერთაშორისო ნორმების შესაბამისად, სამხედრო დანაშაულად ითვლება “- ნათქვამია განცხადებაში და ამიტომ, ჯავახეთის დიასპორა რუსეთში მოუწოდებს საქართველოს ხელისუფლებას, ოპოზიციასა და ქართველ ხალხს,  მიმართონ ჰააგის სასამართლოს, რათა გამოძიებულ იქნას აფხაზეთის, ე.წ. სამხრეთ ოსეთისა და სამეგრელოს მოახლეობის მიმართ ჩადენილი გენოციდის ფაქტი. ასევე, იმას, რომ ჩატარდეს სისხლის სამართლის საქმეების საერთაშორისო ნორმების ფარგლებში გამოძიება ზნეობის პრინციპების, მორალისა და ადამიანურობის მიმართულებით შევარდნაძის მიერ ჩადენილი დანაშაულებების გამო.

„შევარდნაძის უნიჭო და დანაშაულებრივი მმართველობა სიცოცხლის ფასად დაუჯდა საქართველოს ათასობით მოქალაქეს. ასობით ათასი დევნილი არსებობის საშუალებების გარეშე და უსახლკარდოდაა დარჩენილი, მაშინ, როცა შევარდნაძე ფუფუნებაში ცხოვრობს“ - აღნიშნულია განცხადებაში.

ჯავახეთის დიასპორა რუსეთში თვლის, რომ აგვისტოს ომის წლისთავზე ეს საკითხი აქტუალურია, რამდენადაც საქართველოს ექს-პრეზიდენტის პასუხისგებაში მიცემა გარანტია იქნება იმისა, რომ მსგავსი აგრესია მომავალში აღარ მოხდება და „ ეს იქნება მონანიება ქართველი, აფხაზი და ოსი ხალხის წინაშე, რომლის გარეშეც შერიგება შეუძლებელია“ - ნათქვამია განცხადებაში, რომელსაც PanARMENIAN.Net აქვეყნებს.