უშანგი კუზანაშვილს სხვისი დაწერილის კითხვა უსწავლია. ახლახანს განცხადება ჩააბულბულა, ზეწოლაა ჩვენზეო. განცხადებას ხელს ბეთქილ შუკვანი, ამბაკო ავალიანი და ნოდარ მეტრეველი აწერენ. 

ამ ბიჭებს, ვიდრე ოლიგარქი იყიდდა, სხვადასხვა დროს წარმატებები ჰქონდათ ძიუდოსა თუ სამბოში. ახლა თავიდან ფეხებამდე „ოცნებაში“ გადავარდნენ და მარცხს მარცხზე განიცდიან. 

ნოდარ მეტრეველი, რომელსაც საზოგადოება ძირითადად სამბოთი იცნობს, სხვა კუთხითაც ყოფილა მოქნილი. შარშანწინ, აზერბაიჯანში ფრანგების დელეგაციის წევრს მობილური ააწაპმა. თან ისე ოსტატურად, მაგაშიც რომ ყოფილიყო ჩემპიონატი, იქაც ჩემპიონი გახდებოდა.

თუმცა, ერთ რამეში არ გაუმართლა ნოდარს. კამერებმა გადაიღეს მისი „ოსტატობა“ და სამბოს ჩემპიონს ტელეფონი უკან დააბრუნებინეს. 

ამ ქურდობის ფაქტის გამო, მეტრეველმა დისკვალიფიკაციაც მიიკრა. არ გაუმართლა ნოდარს. არ იყო მაშინ ოლიგარქი პოლიტიკაში, თორემ მობილურის ქურდობის ფაქტს სხვანაირად შეფუთულს მიაწვდიდა საზოგადოებას.

მაგალითად ასე: „აზერბაიჯანში, ჩემზე ზეწოლა ხდებოდა. მავიწროვებდა ალიევების ოჯახი. ისინი მთხოვდნენ რომ საქართველოს ხელისუფლების მომხრე ვყოფილიყავი. განერვიულებულმა გადავწყვიტე, საქმის კურსში "დედა ბუს" ჩაყენება. 

იქვე ფრანგის მობილური ავიღე, რომ თბილისში დამერეკა. არაფერი მომიპარავს, იმ ფრანგის მობილური მინდოდა „ქართული ოცნებისთვის“ მიმეძღვნა“.

ასეა თუ ისე, ცუდ დროს მოიპარა ჩემპიონმა მეტრეველმა ფრანგის მობილური და დღეს რაღაც განცხადებას აწერს ხელს. სავარაუდოდ, მას ეს განცხადება წაკითხულიც არ აქვს. უკეთეს შემთხვევაში, სხვამ წაუკითხა. თორემ, აუცილებლად გაახსენდებოდა აზერბაიჯანულ–ფრანგული ეპიზოდი საკუთარი ცხოვრებიდან.

ბეთქილ შუკვანს კი ბედმა გაუღიმა, რომ ოლიგარქი უკვე პოლიტიკაში ფაფხურობს. ბეთქილმა, საკუთარი უნიათობა მისტიკურად ახსნა. მას მთელი ჩემპიონატის მანძილზე დასდევდნენ მოჩვენებები და ჩასძახოდნენ: „შენ უნდა დამარცხდე ბეთქილ“. დამარცხდებოდა აბა რა. ვის გაუმარჯვია მოჩვენებებთან?

ისე ბეთქილსაც ჰქონია ერთი სევდიანი ისტორია. ეს გერმანიაში მომხდარა. მას და უშანგი კუზანაშვილს ბოტასები და წინდები მოუპარავთ. 

მერე ქართულმა დელეგაციამ ჯარიმის თანხა გადაიხადა და შერცხვენილი სპორტსმენები დაიხსნა ორდღიანი "ტყვეობიდან". სწორედ ეს დრო გაატარეს შუკვანმა და კუზანაშვილმა გერმანიის პოლიციის იზოლატორში.

ბეთქილმა ამას წინ თქვა, მე არ მომიპარავს, იქ სხვები იყვნენო. კი, უშანგი კუზანაშვილიც იქ იყო. ნუ, დეტალები თავად შეათანხმონ. რომელმა ბოტასი მოიპარა და რომელმა - "ნასკი".  

თავის მხრივ, ფრთხილად იყოს ბატონი ოლიგარქიც. ყველას შეშვება პარტიაში არ შეიძლება. შეუშვით, შეუშვით. აწი მაინც იყავით ფრთხილად. რას უპირებთ ერს, ის თქვენი თეთრი წინდები რომ მოგპაროთ ბეთქილმა ან უშანგიმ, ამას წინათ, ტრენაჟორების დარბაზში რომ გეცვათ?

თან მოგეხსენებათ, წინდის ქურდი და ტრუსის ქურდი, ორივე ქურდია. იმ ისტორიულ ფოტოზე გამოსახულ ტრუსებს და "ლაკის ტუფლებსაც" გაუფრთხილდით, ერმა მაგ ფოტოთი უფრო ახლოს გაგიცნოთ თქვენ, ბატონი ბიძინა.

მოკლედ, ამ ვიღაცის დაწერილ განცხადებაში ერთადერთი „პატიოსანი კაცი“ ამბაკო ყოფილა ავალიანი. ფაქტი, ევროპის რომელიმე ქვეყანაში, მის მიერ, ნიფხავის ან პერანგის მოპარვის თაობაზე, ჯერჯერობით არ ვრცელდება. ნუ, ახლა, ათი ათასი დოლარი რომ გადაურიცხა ბიძინამ ანგარიშზე, როგორც კი „ოცნების“ მაისური გადაიცვა თავზე, ეგ არაფერი.  

სამი დღე რომ იტირა გასათხოვარი ქალიშვილივით, გამიტაცესო, მერე - არა კაცო, არ გამიტაცესო, მერე ისევ - გამიტაცესო, ესეც არაფერი.

მთავარი მაინც ისაა, რომ ამბაკოსაც, ნოდარსაც, უშანგისაც და ბეთქილსაც სხვისი ნაწერის კითხვა უსწავლიათ. იმ განცხადების დამწერს, კი წერა - ვერა.