• თბილისი
  • 34°C
  • 26 ივლისი, 2017
article

რატომ და როდის ირჩევენ გოგონები „ცუდ“ ბიჭებს

რეალურ ცხოვრებაში ხშირად ვხდებით ისეთი სურათის მომსწრენი, როდესაც ნამდვილად კარგსა და წესიერ გოგონებს რაღაც დაუძლეველი ძალა იზიდავთ „ცუდი“ ბიჭებისაკენ. ზოგჯერ  გვეჩვენება, თითქოს  საზოგადოებაც  შეგუებული იყოს  ამ ამბავს და   მშვიდად აფასებდეს მსგავს მოვლენებს. მაგრამ ბრიტანელი მეცნიერები ასე არ ფიქრობენ.

მათ გადაწყვიტეს  ამ მოვლენის არსის გამოკვლევა - რატომ ხდება, რომ მშვენიერთა სქესის წარმომადგენლები აკეთებენ არჩევანს იმ ვაჟების სასარგებლოდ, რომლებიც ცნობილნი არიან ცუდი რეპუტაციითა და არაკეთილსაიმედოობით. და აი, რა დასკვნები გამოიტანეს:

დავიწყოთ ფსიქოლოგიური ასპექტით. ვიგულისხმოთ,  რომ ჯეიმს ბონდის ტიპის მამაკაცში  ქალი, პირველ ყოვლისა, ხედავს ძალას, სიმამაცესა და მხნეობას. თუმცა, აქვე აუცილებლად უნდა აღვნიშნოთ, რომ   სიბრძნე და ცხოვრებისეული გამოცდილება  ბევრ  მათგანს კარნახობს, შორს დადგნენ ამგვარი კაცებისაგან, რადგან მათი ავანტიურიზმი და თავგადასავლებისმოყვარეობა  გულზე არ ეხატება არცერთს იმ ქალთაგან, ვისაც მშვიდი ოჯახისა და ბავშვების ყოლის სურვილი აქვს. საგულისხმოა, რომ ქალების უმეტესობა მაინც უფრო ოჯახურ სიმყუდროვესა და სტაბილურობას არჩევს, რაც გამორიცხავს  თვისებებს, რომლებიც ჯეიმს ბონდს ახასიათებს.

მაგრამ ბრიტანელი მეცნიერები არ თვლიან, რომ ფსიქოლოგიური პირობებია დამნაშავე ქალების არჩევანში „ცუდი“ ბიჭების სასარგებლოდ. ყველაფერი თურმე იმაზეა დამოკიდებული, მენსტრუაციის რომელ ფაზაში იმყოფება ქალი!

 უკანასკნელ ხანს ჩატარებულმა გამოკვლევებმა საინტერესო ფაქტები გამოავლინა: ასზე მეტ გოგონას, რომლებიც ოვულაციის ფაზაში იმყოფებოდნენ, ამოარჩევინეს მამაკაცის ფოტოები (მათ შორის ცნობილი ადამიანების: მსახიობების, პოლიტიკოსების, ხელოვნების და კულტურის მოღვაწეების), რომლებიც ყველაზე მეტად შეესაბამებოდა მათ წარმოდგენას  მეუღლისა და ოჯახის მამის როლზე. მიღებულმა შედეგებმა საყოველთაო განცვიფრება გამოიწვია  - ყველა ქალმა, როგორც ერთმა, ხმა მისცა მამაკაცებს, რომლებსაც მეტისმეტად ცუდი სახელი ჰქონდათ.  

ორი კვირის შემდეგ კი, როცა კვერცხუჯრედის მორიგ მომწიფებამდე საკმაო დრო რჩებოდა, გოგონები უკვე „დადებით გმირებს“ ირჩევდნენ, რომლებიც მართლაც ასოცირდებოდნენ სანაქებო ქმრებთან და მამებთან.

ექსპერიმენტი გაგრძელდა.  იგივე ქალებს, შემდეგი ოვულაციის დროს, მიეცათ საშუალება სწორედ იმ კანდიდატებთან შეხვედრისა, რომლებსაც ხმა მისცეს წინა ოვულაციის დროს. და რა? მათთან ურთიერთობის დროს ქალები კვლავ ირჩევდნენ ყველაზე „ცუდ  ბიჭებს“.

არსებული მონაცემების მიხედვით, სპეციალისტები მივიდნენ დასკვნამდე, რომ საპირისპირო სქესის წარმომადგენლის გაცნობის ჟამს  კვერცხუჯრედის მომწიფების პერიოდში ქალი ძალიან უნდა გაფრთხილდეს, რადგან ამ დროს მის მაგივრად მოქმედებენ არა სიბრძნე და გამოცდილება, არამედ „ჰორმონები“, რომლებიც ბოროტად  ხუმრობენ.