• თბილისი
  • 26°C
  • 23 ივნისი, 2017
article

საქართველოში, C ჰეპატიტზე, 500 ადამიანს უფასოდ უმკურნალებენ

საქართველოში, ცე ჰეპატიტით დაავადებულ იმ კატეგორიის პაციენტებს უმკურნალებენ უფასოდ, რომლებიც ამ ვირუსის გარდა, შიდსითაც არიან ინფიცირებულები.

ამის შესახებ „პრესა.ჯი“-ს ინფექციური პათოლოგიის, შიდსისა და კლინიკური იმუნოლოგიის სამეცნიერო-პრაქტიკული ცენტრის სამეთვალყურეო საბჭოს თავმჯდომარემ, თენგიზ ცერცვაძემ განუცხადა.

მისი ინფორმაციით, ამ კატეგორიის პაციენტთა მკურნალობა, სავარაუდოდ, დეკემბერში ან იანვარში დაიწყება.

ცერცვაძის თქმით, აღნიშნულ პროგრამას შიდსთან და ჰეპატიტთან ბრძოლის გლობალური ფონდი აფინანსებს და ამ პროექტით, ჰეპატიტზე მკურნალობა 500 ადამიანს ჩაუტარდება.

რაც შეეხება საქართველოში შიდსით დაავადებულ ადამიანთა მონაცემებს, ცერცვაძის ინფორმაციით, ამ ვირუსით 3080 ადამიანია ინფიცირებული, რომელთაგან 500-ს ჰეპატიტიც აღმოაჩნდა.

ამასთან, „პრესა.ჯი“-სთან საუბარში, ცერცვაძემ ყურადღება შიდსის ვირუსის გავრცელების პრევენციულ ღონისძიებებზეც გაამახვილა და განაცხადა, რომ უახლოეს პერიოდში, რისკ ჯგუფების, პირველ რიგში კი, ნარკომანების გამოკვლევა უნდა დაიწყოს.

’’რაც შეიძლება, მეტ ნარკომანს უნდა დავუკავშირდეთ და გამოვიკვლიოთ. ფაქტები რაც მალე გამოვლინდება, მით უფრო კარგია პაციენტების სიცოცხლისთვის და ასევე, სხვა ადამიანებისთვის, რადგან მკურნალობის ეტაპზე მყოფი პაციენტი საფრთხეს სხვისთვის არ წარმოადგენს, ანუ, სხვას არ აინფინცირებს, რაც მნიშვნელოვანია’’, - განაცხადა ცერცვაძემ.

უნდა ითქვას, რომ ზოგადად, საქართველოში, ცე ჰეპატიტი, დღეისათვის, ერთ-ერთ სერიოზულ პრობლემას წარმოადგენს და მისი აქტუალობა დღითიდღე იზრდება. ამასთან, საქართველოში ჰეპატიტით დაავადებულ ადამიანთა ზუსტი მონაცემები ცნობილი არ არის. როგორც „პრესა.-ჯის“ დეპუტატმა მაგდა ანიკაშვილმა განუცხადა, დაავადებული ადამიანები, ყველაზე კრიტიკულ პაციენტთა ჯგუფია.  

დეპუტატის ინფორმაციით, ჰეპატიტით დაავადებული ადამიანების ზუსტი მონაცემების შედგენა ძნელია, თუმცა, არასამთავროების მიერ ჩატარებული ზოგიერთი კვლევის თანახმად, ირკვევა, რომ საქართველოში 100 ათასზე მეტი ადამიანია დაინფიცირებული.

შეგახსენებთ, რომ ჰეპატიტი ღვიძლის ანთებითი დაავადებაა.  შემთხვევათა 75-85%-ში ქრონიკულ მიმდინარეობას იძენს, თუმცა, ჯანდაცვის საერთაშორისო მსოფლიო ორგანიზაცის ინფორმაციით, დედამიწის მოსახლეობის ერთ მესამედზე მეტს ცე ჰეპატიტი აქვს, ხოლო ამ სენისგან წელიწადში დაახლოებით 1 მილიონი ადამიანი კვდება. მსოფლიოს ზოგიერთ ქვეყანაში, ცე  ჰეპატიტის ვირუსით, მოზრდილი მოსახლეობის 5-10%-ია ინფიცირებული.