რადიო „კომერსანტი,“ FM 95,5

რატომ არის მნიშვნელოვანი ეროვნული ავიახაზების არსებობა ქვეყნის ავია-ჰაბად ჩამოყალიბებისათვის: პარლამენტის დარგობრივი ეკონომიკის კომიტეტის თავმჯდომარის მოადგილე აცხადებს, რომ გატარებული ეკონომიკური რეფორმები ქვეყნის რეგიონულ ჰაბად ჩამოყალიბებისთვის მყარი წინაპირობაა. მისივე თქმით, საქართველოს, როგორც ავია-ჰაბის ჩამოყალიბებას ძლიერი ნაციონალური ავიახაზების შექმნაც შეუწყობს ხელს.

საინფორმაციო ანალიტიკური პორტალის „ბიპიაის“ დირექტორის განცხადებითაც, საქართველოს საჰაერო, სარკინიგზო და საპორტო მდებარეობა სტრატეგიულია და ქვეყანა ჰაბი როგორც ლოჯისტიკური, ისე მგზავრთა გადაყვანის კუთხით შეიძლება გახდეს. ექსპერტთა თქმითაც, რომელთაც „კომერსანტი“ ესაუბრა, ეროვნული ავიახაზების ძირითადი მახასიათებელი ფასის და ხარისხის ადეკვატურობა უნდა გახდეს.

იმის დასადასტურებლად, თუ როგორ უწყობს ხელს ეროვნული ავიახაზების არსებობა ჰაბად გარდაქმნას, ექსპერტებს დუბაის მაგალითი მოჰყავთ, საიდანაც ახლო აღმოსავლეთიდან ევროპის მიმართულებით რამდენიმე ათეული მილიონი მგზავრი გადაადგილდება. მათი განმარტებით, დუბაიში მოქმედმა ავიახაზებმა ხელმისაწვდომი საერთაშორისო ფრენები შესთავაზა მსოფლიოს თითქმის ყველა ქვეყანას.