მსოფლიოში კომპიუტერული ტექნიკის ერთ–ერთი უმსხვილესი მწარმოებელი, Lenovo Group Ltd წელს პერსონალური კომპიუტერების გაყიდვების მოცულობით Hewlett-Packard Co–სთვის პირველობის ჩამორთმევას გეგმავს. ამასთან, Lenovo აპირებს ტექნოლოგიური პროდუქციის მსოფლიო ბაზარზე პირველი ლიდერი ჩინური კომპანია გახდეს.

Reuters–ის ექსპერტების შეფასებით, ბოლო დროს კომპიუტერების მწარმოებელი ჩინური კომპანიები მსოფლიო ბაზარზე აგრესიული საფასო პოლიტიკის, უცხოური შენაძენებისა და სწრაფად მზარდი შიდა ბაზრის წყალობით წარმატებებს აღწევენ. 2012 წლის მეორე კვარტალში Lenovo–ს საბაზრო წილი 14,9%–ს აღწევდა და Hewlett-Packard–ს მხოლოდ 0,6%–ით ჩამოუვარდებოდა.

ანალიტიკოსების შეფასებით, Lenovo–ს სწრაფი ზრდა მოხდა პერსონალური კომპიუტერების ბაზრის საერთო შემცირების და პლანშეტების მხრიდან საგრძნობი კონკურენციის ფონზე. „მხოლოდ დროის საკითხია, როდის გახდება Lenovo ნომერ პირველი, და არ იქნება გასაკვირი, თუ ეს წლის ბოლოს მოხდება,“ – მიიჩნევს Avant Capital Management–ის აღმასრულებელი დირექტორი ფრედერიკ ვონგი.

Lenovo–მ გაყიდვები მნიშვნელოვნად გაიზარდა მის მიერ გერმანული კომპანია Medion–ის შეძენისა და იაპონურ NEC Corp–თან ერთად საერთო საწარმოს შექმნის შემდეგ. გარდა ამისა, ჩინური კომპანიის შენაძენებს შორისაა IBM Corp–ის პერსონალური კომპიუტერების ბიზნესი, რომელიც მან 2005 წელს იყიდა. მიმდინარე წელს Lenovo–ს აქციები თითქმის 16%–ით გაიზარდა იმ დროს, როდესაც მისი კონკურენტების – HP–ის, Dell Inc–ისა და Acer Inc–ის ფასიანი ქაღალდები გაიაფდა.