საქართველოს პრეზიდენტი დღეს ქობულეთში, ხუცუბანის ქვის საამქროში იმყოფებოდა.

მიხეილ სააკაშვილის განცხადებით, საამქროში დამზადებული ფილებით მთელ საქართველოში კეთდება გზები. ქვეყნის პირველი პირის თქმით, საქართველოში ყველაფერი ქართული პროდუქციით უნდა შენდებოდეს.

პრეზიდენტი საამქროში, სადაც ამჟამად 55 კაცია დასაქმებული, აჭარის მთავრობის თავმჯდომარესთან, ლევან ვარშალომიძესთან ერთად იმყოფებოდა. სააკაშვილი ქობულეთში, ქარხნებში დასაქმებული ხალხის რაოდენობით დაინტერესდა.

„ჩვენ ყველგან ვაკეთებთ ძალიან ბევრ საჯარო სივრცეს. ბათუმში 22 კილომეტრიან ბულვარს ასევე, შადრევნებს, პარკებს, სავარჯიშოებს, კინოთეატრს. ეს კი, კეთდება იმისთვის, რომ ხალხს, რომელიც აქ ჩამოვა ყველაფერი უფასო ჰქონდეს. სწორედ ეს არის „ვარდების რევოლუციის“ ბრენდი - ყველაფერი ხალხისთვის გაკეთდეს, რომ მათ უფრო მეტი სარგებელი მიიღონ“,- განაცხადა სააკაშვილმა.

ქვეყნის პირველი პირის შეფასებით, ადგილზე სასტუმროები დამსვენებლებს უფრო მეტ თანხას ახდევინებენ, ვიდრე რეალურად არის. „ფასების დაწევაზე ჩვენ უკვე ვმუშაობთ“,- დასძინა პრეზიდენტმა.

internet.ge