„კორუფციამ ეს კარგი იდეა იმსხვერპლა“

commersant.ge

საფეხბურთო სამყარო მასშტაბური მოვლენისთვის ემზადება: ევროპის ჩემპიონატი 8 ივნისს ვარშავაში საზეიმოდ გაიხსნება. ცერემონიალი პოლონეთისა და საბერძნეთის ნაკრებების მატჩამდე 20 წუთით ადრე დაიწყება და ის 12 წუთს გასტანს. ევრო 2012–ის გახსნის სპეციალური სტუმარი უნგრელი პიანისტი ადამ გიორგი იქნება. ცერემონიალში ასევე მიიღებს მონაწილეობას 63 ქვეყნის 800–ზე მეტი ქორეოგრაფი.

უკრაინამ და პოლონეთმა ევრო 2012 –ის მომზადებისთვის 40 მილიარდი დოლარი დახარჯეს.

უკრაინის ვიცე–პრემიერის ბორის კოლესნიკოვის განცხადებით, უკრაინამ 55 მილიონი დოლარი პერსონალის მომზადებასა და ტურნირის ინფორმაციული და სარეკლამო მხარდაჭერისთვის დახარჯა.

კოლენსიკოვის ინფორმაციით, ტურნირისთვის მომზადება უკრაინას 5 მილიარდზე მეტი დაუჯდა. აღნიშნული სახსრები სატრანსპორტო ინფრასტრუქტურის, აეროპორტებისა და გზების კეთილმოწყობას მოხმარდა.

პოლონეთმა თავის მხრივ, "ევრო 2012"–ს მომზადებაში 34 მილიარდი დოლარი დახარჯა.

უკრაინაში ევროპის ჩემპიონატის მსვლელობისას 1 მილიონი ტურისტი ჩავა, ხოლო ჩემპიონატის გახსნას ტელევიზიით თვალს 150 მილიონი ადამიანი მიადევნებს.

,,ყველა სამუშაო შესრულებულია, ბოლო მონაცემებით, ევრო 2012–ის მომზადებისთვის 23 მილიარდი ევრო დაიხარჯა,” – განაცხადა რუსეთში პოლონეთის ელჩმა.

უკრაინელი ექსპერტის ვახტანგ კაპანაძის განცხადებით, უკრაინელთა 50% ქვეყანაში „ევრო 2012“–ის გამართვის იდეას არ ემხრობა, რადგან მიიჩნევს, რომ ამ ღონისძიების მოწყობაში ჩადებული თანხები არაეფექტურად დაიხარჯა. „თანხების ხარჯვისას ხდებოდა „ატკატები,“ ადგილი ჰქონდა კორუფციას. შედეგად არაერთი ობიექტი უხარისხოდ აშენდა და ამის ნიშნები უკვე ჩანს. რა თქმა უნდა, ამ მოვლენას დადებითი მხარეებიც აქვს – გაიხსნა ახალი აეროპორტები, მოწესრიგდა გზები, კეთილმოეწყო სასტუმროები, და ზოგადად, ქვეყანას უფრო ევროპული იერსახე მიეცა. მაგრამ ეს ყველაფერი ძალიან ძვირი დაჯდა. კორუფციამ ეს კარგი იდეა იმსხვერპლა,“ – განუცხადა commersant.ge–ს კაპანაძემ.