[შორენა პაპაშვილი]
ქვეყნიერების აღსასრულის მოახლოების გარდაუვალობაზე უკვე არა მხოლოდ სხვადსხვა რელიგიები ქადაგებენ, უცხოური პრესა ამ საკითხთან დაკავშირებით მეცნიერულ დასაბუთებებსაც აქვეყნებს.მიწისძვრები ჰაიტიზე და ტაივანზე, ჩილეში და კამჩატკაზე იმის საბაბი გახდა, რომ ქვეყნის დასასრულის მოახლოების შესახებ ალაპარაკებულიყვნენ, თანაც არა მარტო ობივატელები. ზოგის წარმოდგენით დედამიწას ”არმაგედონი” კოსმოსიდან დაემუქრება და იგი უცხო პლანეტებიდან შემოტევის მსგავსი იქნება. ზოგიც უფრო რეალისტურად - გახშირებული მიწისძვრებითა და უზარმაზარი ვულკანური ამოფრქვევებით ”გვაშინებს”. ალბათ, მეორე მოსაზრება უფრო რეალისტურია, თუ ბოლო რამდენიმე წლის განმავლობაში მსოფლიოში გახშირებული ბუნებრივი კატასტროფების მიხედვით ვიმსჯელებთ. სტიქიურ მოვლენებს 21-ე საუკუნეში უკვე ასი ათასობით ადამიანის სიცოცხლე შეეწირა. უძლიერესი მიწისძვრა მოხდა სუმატრაზე ინდოეთის ოკეანეში. მიანმას, კარიბსა და შეერთებულ შტატებს თავს დაატყდა ტაიფუნები. მსოფლიოს ახალი ამბების გამოშვებები სავსეა წყალდიდობების, ტყის ხანძრების, მეწყერებისა და ტორნადოების შესახებ ცნობებით. მოჰყავთ ახალი შემაშფოთებელი მონაცემები გლობალური დათბობის მიმდინარეობის შესახებ. 2010 წლის დადგომისას კი მსოფლიო შეაძრწუნა ჰაიტიზე მომხდარმა მიწისძვრამ, რომელმაც მთლიანად დაანგრია ქვეყნის დედაქალაქი პორტ–ო–პრენსი. ამას მოჰყვა ტრაგედია ჩილეში. ბუნებრივია ამ ფონზე გაჩნდა ქვეყნიერების აღსასრულის პროგნოზები, რომ უკვე 2012 წელს წარღვნას უნდე ველოდოთ. ამაში კი იმოწმებენ ძველი, მაიას ხალხის კალენდარს, რომელშიც ჟამთა აღწერა სწორედ ორი წლის შემდეგ წყდება. უცხოელი ექსპერტები კი ამბობენ, რომ ჰაიტიზე და ჩილეში მომხდარი ტრაგედიები სავსებით თავსდება სეისმოლოგთა დაკვირვებების ასწლიან ისტორიაში. ”ასეთი მაგნიტუდის მიწისძვრა დედამიწაზე დაახლოებით წელიწადში ერთხელ ხდება. გაცილებით უფრო დაბალი მაგნიტუდის კი, დაახლოებით 30-50–ჯერ ნაკლები ენერგიის მქონე იმასთან შედარებით, როგორიც გამოიკვეთა ჩილეს მიწისძვრის შედეგად, წელიწადში 17-18–ჯერ ხდება,”- ამბობს ექსპერტი ალექსანდრე ზოლოტარიოვი. ზოგ მეცნიერს მიაჩნია, რომ ჰაიტიზე მომხდარი მიწისძვრა მისი მაგნიტუდის თვალსაზრისით ერთ–ერთი რიგითია. პრობლემა კი იმაში მდგომარეობს, რომ მიწისძვრა მოხდა უღარიბეს ქვეყანაში, ამიტომ მოჰყვა მას ასეთი დიდი მსხვერპლი. ჩილეში მიწისძვრა გაცილებით უფრო მძლავრი იყო, მაგრამ მსხვერპლი 200-ჯერ ნაკლებია,- აცხადებს ექსპერტი. საშინელი პროგნოზების ავტორები იმასაც წინასწარმეტყველებენ, რომ არქტიკის შემდეგ დადნება ყინულის საფარი გრენლანდიაში და მსოფლიო ოკეანის დონე აიწევს. ეს კი პლანეტის დიდ ქალაქებს, როგორიც არის ლონდონი, ნიუ–იორკი, სიდნეი, რომი, პარიზი და მადრიდიც კი, დატბორვით ემუქრება. წყალი დაფარავს ბაგამის, მალდივის კუნძულებს, სანქტ–პეტერბურგს, ვლადივოსტოკს და მაგადანს. ყირიმი კუნძულად გადაიქცევა, გოლფსტრიმი კი ზურგს შეაქცევს ევროპას და მას სიცივეში დატოვებს. მაგრამ ექსპერტ–კლიმატოლოგი იური იზრაელი ამ მხრივ მშვიდად არის. მისი აზრით, ყინულის ფარის დნობა გრენლანდიაში ათასწლეულების საკითხია. ეს კაცობრიობას უნდა ახსოვდეს და ამაზე უნდა იფიქრონ, მაგრამ უახლოეს რამდენიმე ათას წელიწადში გრენლანდიის ფარის სეიოზული დნობა არ არის მოსალოდნელი. დედამიწაზე კატაკლიზმები ყოველთვის ხდებოდა. კლიმატი ყოველთვის იცვლება. კლიმატის ახლანდელი ცვლილება დიდად არის დაკავშირებული ადამიანის საქმიანობასთანაც, მაგრამ ეს იმ ხარისხის არ არის, რომ ორიოდე წელიწადში გლობალური კატასტროფა გამოიწვიოსო,- გვამშვიდებენ მეცნიერები. რაც შეეხება ქვეყნის აღსასრულს, ლამის უკვე ამის შესახებ ყოველ წელს გამოაცხადონ. მახსოვს 2000 წლის დადგომას გულის ფანცქალით ველოდი, ფსიქოლოგიურადაც კი ვემზადებოდი ზეციდან წამოსული ცეცხლოვანი წვიმისთვის, მაგრამ ღვთის მადლით სამყარო ჯერ კიდევ აგრძელებს არსებობას და დედამიწა ძვებელურად ბრუნავს. |
.jpg)
