[“მსოფლიო სპორტი“]
მადრიდის რეალის ცოცხალი ლეგენდა რაული სამეფო კლუბს ორშაბათს გამოეთხოვა. სანტიაგო ბერნაბეუზე სპეციალურად მისთვის მოწყობილ ცერემონიალზე 33 წლის თავდამსხმელი ირწმუნებოდა - ჯერ არ ვიცი, სად გავაგრძელებ კარიერასო. როგორც გაირკვა, იმ მომენტში რაულს არ სურდა თავისი მომავალი კლუბის დასახელება, ან ამ თემაზე სასაუბროდ მას უბრალოდ სათანადო განწყობა არ ჰქონდა. გუშინ კი, ესპანელი ბომბარდირის ახალი მისამართი მთელმა საფეხბურთო სამყარომ შეიტყო - რაულმა შალკესთან 2-წლიანი კონტრაქტი გააფორმა.ფურია როხას ექსფორვარდი გელზენკირხენელთა შეტევით პოტენციალს შესამჩნევად გააძლიერებს. შეგახსენებთ, რომ შალკეს მომავალ სეზონში ჩემპიონთა ლიგაში მოუწევს თამაში. რაული კი, სხვათა შორის, ამ ტურნირის ყველა დროის საუკეთესო ბომბარდირია - კონტინენტის ყველაზე პრესტიჟულ საკლუბო ტურნირში ჩატარებულ 130 შეხვედრაში მას 66 გოლი აქვს გატანილი. გერმანული კლუბის თავკაც ფელიქს მაგათს იმედი აქვს, რომ ესპანელი თავდამსხმელი შალკეშიც ძველი ინტენსივობით გააგრძელებს გოლების გატანას. ეს შესანიშნავი ამბავია ჩვენი კლუბისთვის. ძალიან მსიამოვნებს ის ფაქტი, რომ მსოფლიო დონის ვარსკვლავი შალკეში გადმოყვანაზე დავითანხმეთ. მომავალ სეზონში რაულის დიდი იმედი მაქვს. ახლა უკვე შემიძლია შეტევის ხაზზე აღარ ვიდარდო. დარწმუნებული ვარ, ჩვენი ურთიერთთანამშრომლობა ნაყოფიერი და წარმატებული იქნება, - განაცხადა მაგათმა რაულის პრეზენტაციაზე. მე კონკურენტუნარიან გუნდში გადავედი, რომელიც ჩემპიონთა ლიგაში ითამაშებს და ბუნდესლიგაში მუდამ მაღალი მიზნებისთვის იბრძვის. ფელიქს მაგათი და შალკე ჩემზე დიდ იმედს ამყარებენ და არანაირი უფლება არ მაქვს მათ ეს იმედი გავუცრუო. ყველანაირად ვეცდები აქაური გულშემატკივრების გახარებას, რომლებიც როგორც მითხრეს, საოცრად ერთგულები არიან და მძიმე მომენტებში გუნდს მუდამ გვერდში უდგანან. გუნდს სერიოზული მიზნები აქვს. ასე რომ არ იყოს, მე დღეს აქ არ ვიქნებოდი. სიმართლე გითხრათ, ძალიან მინდა ჩემპიონთა ლიგაში რეალთან შეხვედრა. იმედი მაქვს, ასეც იქნება, - რაულის პირველი გელზენკირხენული კომენტარი შალკეს ოფიციალურმა ვებ-გვერდმა გაავრცელა. ესპანელ თავდამსხმელს, რომელსაც პროფესიული კარიერის 16-ვე სეზონი რეალში (740 მატჩი, 323 გოლი) ჰქონდა გატარებული, გუშინ საკმაოდ დატვირთული გრაფიკი ჰქონდა. კონტრაქტის გაფორმება-პრეზენტაციის გარდა, მას ახალი კლუბის ფორმითაც მოუწია მოედანზე გასვლა. გერმანული გუნდის შემადგენლობაში რაულის პირველ ვარჯიშს დაახლოებით 2 ათასმა გულშემატკივარმა მიადევნა თვალი. ამ ამბავმა განსაკუთრებით შალკეს ხელმძღვანელობა გაახარა, რომელიც არ მალავს, რომ ჩემპიონთა ლიგის სამჯერ მომგები ესპანელი თავდამსხმელის დაახლოებით 50 ათასი მაისურის გაყიდვას გეგმავს. აქვე გეტყვით, რომ რაული გელზენკირხენელთა შემადგენლობაშიც 7-ნომრიანი ფორმით ითამაშებს. რაც შეეხება შალკეს, კლუბის მესვეურები სატრანსფერო ბაზარზე საკმაოდ აქტიურად მუშაობენ. რაულთან ერთად, რეალიდან მათ ცენტრალური მცველი კრისტოფ მეტცელდერიც გადაიბირეს. მათ გარდა დაიმატეს მცველები - აცუტო უტიდა, კირიაკოს პაპადოპულოსი, ტიმ ჰოოგლანდი, აგრეთვე თავდამსხმელი ერიკ იენდრიშეკი. ასე რომ, მომავალი სეზონისთვის შალკე სერიოზულად ემზადება. |
